TINAN ATUS LIMA: Kapítulu 33 – Restaurasaun Misaun Katólika iha Timor (1874--1910) (Parte dahuluk)

500 ANOS – TINAN ATUS LIMA  Emar Timor Ho Malae Mutin Hasoru Malu  

Dom Carlos Filipe Ximenes Belo

Kapítulu 33–Restaurasaun Misaun Katólika iha Timor (1874--1910) (Parte dahuluk)

Iha tinan 1874, Amo Papa Pio IX ho Liurai Portugal Dom Luís I assina Konkordata ida hodi halós situasaun Misaun katolika sira iha Asia. Ho surat Amo Papa Pio IX nian, bolu Bula Universis Ecclesiis, loron 15, fulan Juñu tinan 1874, Amo Papa haketak Misaun katolika iha Timor hosi jurisdisaun Arquidioseze Goa, no hatama ba dioseze Macau. Pio IX mos foti Dom Manuel Bernardo de Sousa Enes (1873-1883), hanesan Bispu Macau no tau matan mos ba Kolonia Timor.

Iha ninia surat ba padre Superior Misaun katolika nian iha Timor, padre Luís Xavier de Mesquita, Amo lulik Lourenço de Gouveia, Governador do Bispado de Macau husu nia atu rekoñese Dom Bernardo Enes hanesan ninia bispo, no husu atu amo lulik no sarani sira iha Timor simu desizaun Vatikanu nian ne’ebá.

Tanba Misaun Katólika iha Timor tama ona dioseze Macau, maka Governador do Bispado Manuel Gouveia foti amo lulik António Joaquim de Medeiros hansan vizitadór, no haruka nia ba Timor atu haree situasuan in loco.

Iha nia surat ba vizitadór, Governador do Bispado haruka buat sira tuir mai ne’e:

1. – Buka hatene situasuan uma kreda Dili nian; uma misaun nian, no kondisaun livru sira nian;
2. – Uma kreda hira mak sei diak atu halo missa iha laran; no hatais ba missa no sasan sira seluk nia kondisaun;
3. – Rai misaun iha Timor niania área sukat kilómertu hira?
4. – Haruka sai hosi Timor amo lulik indianu sira, no husik hela iha Dili, amo lulik timoran, padre Jacob dos Reis e Cunha.

Atu kumnpri knaar ne’ebé Governador do Bispado fó, amo lulik António Joaquim de Medeiros, ne’ebe to’o momentu ne’ebá, hala’o kanar Reitor Semináriu Macau nian, nia halo viajen ba Timor, hahú loron 30 Novembru 1875. Amo lulik seluk akompaña nia: padre Carlos Joaquim Gonçalves, professor iha Semináriu.

To’o tiha Dili, vizitadór padre António Joaquim de Medeiros ba vizita reinu sira: Dili, Motael, Hera, Lacló, Manatuto, Laleia, Cairui, Viqueque, Luca no Barike.

Iha loron 5 fulan Abril 1876, padre António Medeira fila hikas ba Macau: Maibé antes ke sa’e ró-ahi, nia husik hela hanesan superior foun padre Carlos Joaquim Gonçalves ne’ebé troka padre indianu Luís Xavier de Mesquita. Nia mos haruka sai hosi Timor amo lulik sira hosi Goa (Índia), padre Simeão Joaquim José Piedade Lobo no João Camilo de Azevedo. Padre Luis Mesquita sei embarca iha Janeiro 1877; padre Medeiros mos haruka padre Jacob dos Reis e Cunha sai hosi Betano no Alas, ba hela iha Dili. (sei tutan)

Dom Carlos Filipe Ximenes Belo
Premio Nobel Paz 1996