VISAO MISAO OBJECTIVO HAKSESUK BOLA FH KKN HOME FH LPV ARTIGOS FH MUZIKA LIA MENON FH RESPONDE

20151207

TINAN ATUS LIMA: Kapítulu 35 – Restaurasaun Misaun Katólika iha Timor (1874--1910)' (Parte datoluk)

500 ANOS – TINAN ATUS LIMA  Emar Timor Ho Malae Mutin Hasoru Malu  

Dom Carlos Filipe Ximenes Belo

Kapítulu 35 Restaurasaun Misaun Katólika iha Timor (1874--1910)' (Parte datoluk)

Ho surat Provisão loron 1 fulan Marsu tinan 1877, Governador do Bispado Padre Manuel Gouveia foti padre António Joaquim de Medeiros ba Superior no Vigário Geral Misaun Katolika iha Kolónia Timor. Iha loron ne’e mos, fo sai surat provisuan seluk hodi nomeia amo lulik na’in walu (8) ba missinariu iha Timor; padre sira ne’e, nia’in hitu ema portugés no ida seluk, amo lulik xinés ida. Padre sira naran mak tuir mai ne’e:

Padre Sebastião Maria Aparício da Silva, padre Manuel Maria Alves da Silva, padre José António Pires, padre Manuel José Branco, padre Francisco Pedro Gonçalves, padre Francisco Melo, padre Carlos Ferreira Baptista. Amo lulik na’in hitu ne’e halo sira nia estudu iha Real Colégio das Missões Ultramarinas, iha Cernache do Bonjardim, Sertã, Portugal. Amo lulik xinés naran Francisco Leong, nia estuda iha Macau.

Ho Provisuan loron 5 Abril 1877, amo Bispo Dom Manuel Bernardo Enes foti padre Carlos Ferreira Baptista ba pároku Dili nian.

Amo lulik sira halo juramentu iha Bispo Macau nia oin, hodi promete atu kumpri didiak sira knaar iha Timor. Amo Bispo mos haruka padre Superior foun atu uza selu (selo/meterai) ba Timor, ne’ebe iha retratu Nain Feto nian, no ho hakarek : “Missões da Imaculada Conceição – Timor”.

Iha loron 10 fulan Abril, amo lulik sira sa’e korkoa boot naran “Trio” ba Timor. Viajen ida ne’ebá lori loron lima nulu resin tolu (53). Ro to’o Dili iha loron 2 Juñu 1877. Iha viajen ne’e, amo Superior lori sasan kompletu ba misa: paramentus, kalis, patena, galleta, armariu, imagens, meja, kadeira, no osan 4.000$00 réis.

Iha fulan Jullu, Padre Superior hahú fahe na’i lulik sira ba ida-idak nia fatin:

- Padre Superior, António Joaquim de Medeiros hela iha Lahane;
- Padre Francisco Xavier de Mello hela iha Oe-Cusse, hodi tau matan ba reinu Oe-Cusse no Ambenu, no Noimuti.
- José António Pires, hela iha Batugádé, hodi tau matan ba reunu Balibó, Kowa, Sanirin no Cotubaba (Atabai).
- Padre Manuel Maria Alves da Silva hela iha Manatuto, no tau matan ba reinu Lacló, Laleia, Vemasse no Cairui.
- Padre Sebastião Maria Aparício da Silva, hela iha knua Lacluta, hodi tau matan ba reinu Viqueque, Barique, Dilor, Bibiçuço no Samoro.
- Padre Carlos Ferreira Baptisa, paróku Dili.
- Pade Francisco Pedro Gonçalves, toma konta Bidau ho Hera. Nia mos kaer osan hodi representa amo lulik missionaria sira.
- Padre Manuel José Branco, pároku Motael no professor iha Eskola Dili. - Padre Francisco Leong, hela iha Dili, hodi tau matan ba ema xiné ne’ebé sarani, liu liu sira ne’ebé hela iha Dili.
- Padre Joacob dos Reis e Cunha, timoroan, ho knaar “ambunante”, hodi vizita sarani sira namakari Iha Luca, Betano, Manufahi, Feriksari, Alas, Raimean, Camanasa no Suai.

Amo lulik sira hahú tau matan ba sarani sira hodi hanorin doutrina, saran, fo kaben no fo mina sarani ba moras sira; hahú vizita suku, no loke eskola. Founfon sira la hela iha uma kalén no hada ho baki; maibé, hela uma hanesan timor sira nian: halo ho tali tahan, ho nuu tahan, no didin ho au no bebaak. Neneik Relijiaun katólika tama knua sira iha Timor laran. Faze ida ne’e ita bolu RESTARURAÇÃO KA REVITALIZASAUN.

Dom Carlos Filipe Ximenes Belo
Nobel Premio Paz 1996

Sem comentários:

Enviar um comentário

Nota: só um membro deste blogue pode publicar um comentário.