Importante Timor-Leste hamoris fali ETNA nudar agencia Nutizias

Foto Media SECOM

Dili. Forum Haksesuk (FH). Importante Timor-Leste hamoris fali ETNA ka ANTL (East Timor News Agency) ka Agencia Noticias de Timor-Leste (ANTL) tanba nudar rai no estadu soberanu precisa duni iha "Agencias Noticias" sai nudar instrumentu politika importante ba Estadu no Nasaun. Governu RDTL liu husi SECOM (Secretariu Estadu Comunicação Social) organiza seminariu Internasional konaba “Agencias de Noticias de Timor-Leste, Oprotunidade e Desfios”, halo iha Hotel Timor, Dili, Timor-Leste. Hola parte iha seminariu ne’e oradores husi Agencias Antara Indonesia no Lusa Portugal. Mos oradores nasionais hanesan Dr. Mari Alkatiri no Dr. Ramos Horta.

Dr. José Ramos Horta iha ninia intervensaun iha Seminariu Internasional konaba “estabelecimento da agencia de noticias de Timor-Leste: Desafio e oportunidades”, iha Hotel Timor, Dili, Quinta-Feira (14/08/2014), ”importante ba Timor-Leste hamoris fila fali ETNA/ANTL, tanba rai hotu-hotu, kiik ka bot ninia dimensaun hotu-hotu iha ninia Agencias Noticias, USA iha VOA; Xina iha Shinghua; Rusia iha Itartask, no sel-seluk tan”. Haktuir tan Dr. José Ramos Horta ne’ebe nudar, “Estadu liu husi Governu tenki investe ho Orçamento Estadu ne’ebe hatur hanesan ETNA/ANTL hanesan investementu ba politika externa”, argumentu Dr. José Ramos Horta, fundador ETNA iha tinan 1975.

Haktuir tan Dr. José Ramos Horta, ”ETNA/ANTL sei sai nudar instrumentu ba tatoli informasaun konaba politika diplomatika; seguransa no defesa; jusitisa no intereses ekonomika no komercial iha kampu internasional”.

Dr. Ramos Horta mos defende, ”investimentu publiku la signifika, lakon independensia husi prestasaun servisu ETNA/ANTL nian,tanba BBC nudar exemplu importante, 100% subsidius husi Governu maibe ninia independensia no kredibilidade mos la kestiona”.

Tenik tan Dr. José Ramos Horta, eis-Prezidente Republika RDTL ne’e, ”tenki investe iha rekursusu umanus ne’ebe qualifikadu diak, domina lian barak liliu Engles no Portugues, mos bahasa Indonesia no Tetum, tanba agencias noticias buka tama mos iha merkadu anglofona tanba sira mak domina liu mundo”, defende Dr. José Ramos Horta.

Iha biban hanesan Dr. Mari Alkatiri, eis-Primeiru-Ministru RDTL iha I Governu Konstitusional katak, ”agencia noticias importante ba Timor-Leste”. Dr. Mari Alkatiri mos, ”importante ba servisu Agencias Noticias ne’ebe ho responsabilidade, profisionalismu no objetividade”. Tenik tan Dr. Mari Alkatiri, ”defende atu futuru agensia atu kontinua adopta naran ETNA tanba ninia valor historika, harii iha tinan 1975, situasuan dificil ne’ebe mak ETNA mosu hodi kontra balansa ba probaganda ne’ebe monopoliu husi ANTARA”.

Husi parte seluk, Rahmat Nasution Dahlan, husi Agencia ANTARA katak, ”agencia Noticias ba Timor-Leste importante, tanba agencia nudar orgaun komunikasaun sosial ne’ebe ninia informasuan buka equilibriu no manten koesaun no unidade nasional rai ida no nasaun ida nian”. Ho lian seluk, ”Agencia noticias hodi manten Unidade no nasionalismu”.

António Sampaio Jornalista Agencia Lusa, haktuir konaba procesu ETNA ne’e rasik ne’ebe nia mos envolve nudar editor iha tinan 1991/92 konvite husi Dr. Ramos Horta, ”kontestualiza procesu historia moris ETNA no ema ne’ebe mak servisu primeiru ho Dr. Ramos Horta nudar primeieru editor mak Roger East, Jornalista Australiano ne’ebe mate iha Dili, loron 08 fulan Dezembru tinan 1975, nia editor ba dala uluk”. Haktuir tan António Sampaio, ”iha tinan 1991/92 Dr. Ramos Horta convida nia hodi kolobora edit noticias ba ETNA, ne’ebe hetan citasauns husi agencia bot hanesan REUTER”.

Ba oin ETNA bele konta ho apoio husi Agencia Lusa iha parte kapacitasaun rekursus humanus no apoios teknikus ba multimedia ba estabelece Agencia Noticias”.

Husi parte Governu RDTL, liu husi Vice Primeiru-Ministru Fernando La Sama de Araujo, haktuir katak, ”elabora no haforte partipasaun no publiku nia kunyesimentu konaba razoens no importansia harii Agenjia Nutizias Timor-Leste, ligadu ba esforsu sira hametin soberania povu no estadu; unidade; seguransa no estabilidade nasional; dezenvolvimentu nasional”. Haktuir tan La Sama, ”liu husi Agencia ETNA bele sai hanesan veikulu hodi dada investores sira husi liur mai investe iha Timor-Leste”.

António Ramos Naikoli ne’ebe modera debate entre Dr. José Ramos Horta no António Sampaio, ”estabelece paralelismu procesu historika harii ajencias ANTARA Indonesia no ETNA Timor-Leste, hanesan iha kontextu historia hanesan, ANTARA harii molok Indonesia Independencia, harii iha tinan 1939, fundador mak Adam Malik. Objektivu harii ANTARA hodi kombate informasaun ne’ebe monopoliu husi potensia kolonial Holanda. Mos ETNA harii iha tinan 1975, fundador mak Dr. José Ramos Horta, hodi kontra ka balansu ba informasaun ne’ebe mak ANTARA ható konaba konfilitus Timor-Leste ne’ebe tuir versaun Indonesia nian”.

Haktuir tan António Ramos Naikoli, ”Adam Malik no Ramos Horta, sira nain rua asumi papel nudar diplomata ba parte rua no hasoru malu iha tinan 1974 entre Adam malik no Ramos Horta. Sira nain rua okupa kargu nudar xefi Diplomasia, Adam Malik nudar MENLU RI no José Ramos Horta durante periudu naruk nudar Porta Voz Resistencia iha kampu Diplomatika no ikus mai sai Ministru Negocius Estranjeirus iha Primeiru Governu Constitucional (2002-2006)”.

Tuir SECOM Nelio Izaac Sarmento, ”Governu tau ona perioridade ba estabelece Agencia Noticias ETNA iha tinan 2015 tanba tinan ida iha ona planu orçamento”. Hatutan Nelio Izaac Sarmento, ”ne’e komitmentu V Governu Konstitusional nian ba estabelece Agencia Noticias de Timor-Leste ka ETNA”. Tenik tan Nelio Izaac Sarmento, ”ho estabelecimentu Agencia Noticias de Timor-Leste laos signifika atu hamate fali media no jornalista nasionais sira lae, maibe kompletu no ajuda malu”.

Textu: FH Dili