VISAO MISAO OBJECTIVO HAKSESUK BOLA FH KKN HOME FH LPV ARTIGOS FH MUZIKA LIA MENON FH RESPONDE

20131219

Polemiku Konaba Estatementu Rezignasaun Maun Boot Xanana Nudar Primeiru Ministru RDTL

Husi Estanislau S.Saldanha, staf Dosenti DIT

"Em tempo da Resistência, Xanana Gusmão em vez de definir a guerra como a arte de matar, definiu-a como a arte de conviver com o inimigo. Hoje, em tempo da Independência Ukun-rasik-an Xanana afirma com convicção de que a arte de governar esta na essência de conviver com o povo." (Dalia Kiakilir)
Maun boot Xanana Gusmao deklara ona publikamente nebee sita husi media nasional barak katak nia sei rezigna an nudar Primeiru Ministru iha Tinan 2014 ka Tinan 2015. Estatementu rezignasaun nee hamosu polemika makas iha sosiedade Timor-Leste. Ema balu aseita no balu la aseita. Artigu badak nee hakarak fo hanoin konaba estatementu rezignasaun Maun Xanana Gusmao nudar PM iha ambitu:(1). Eskenariu sa ida husi estatamentu politika nee. (2). Tanba saa Maun boot Xanana Gusmao hakarak rezigna an. (3). Konsekuensia sa pasca rezignasaun Maun Boot Xanana. Ho (4). Sa ida mak sei presiza halo hodi asegura tranziasaun ba susesaun lideransa nasional iha tempu mai? 

Eskenariu sa ida? No Tanba Sa?

Hare husi oklu politika, estatementu rezignasaun nee hamosu eskenariu lubuk ida:

(1). Maun boot Xanana hakarak duni atu rezigna an, no dudu fali jerasaun foun hodi lidera Timor-Leste ba oin. Nian mos idade no kole ona, hakarak buka fali jerasaun foun, hanoin ho enerjia foun hodi lidera Timor-Leste ba oin iha tempu globalizasaun ho kompetetivu iha nivel rejional ho global. 

(2). Estatementu nee hanesan manuver politika hodi sukat nia popularidade. Too orasnee Maun boot nia popularidade sei iha ka lae? Karik popularidade politika seiiha, ema barak no povu sira sei husu nian atu kaer nafatin pasta PM. Maibe popularidade la iha ona, maka nia obriga an, bele taka hotu obra diak nebee nia halo durante lidera funu hodi kontra okupasaun Indonesia no too ikus libertanasaun. Estatementu rezignasaun nee hanesan sasukat ida ba nian hodi kontinua lidera ka avansa ba eleisaun tinan 2017. 

(3). Prepara kondisaun hodi halo koligasaun ho Partidu Fretilin tanba governu ida agora nebee kompostu husi Partidu CNRT, PD ho Frente Mudansa lao la efetivu nola populer tanba interese partidariu ho inkapasidade pesoal nebee hamosu  problema inefisiensia, tendensia korupsaun,ho degradasaun moral (poligamia, eskandalu sex ho "perselingkuhan"). Maun boot Xanana hahu lakon fiar ba membru Partidu CNRT rasik ho mos partidu sira seluk nebee hamutuk harii governu no sai membru governu.

(4). Estatementu nee hanesan politika ida hodi observa ema ho grupu sira nebee iha ambisaun politika ho poder politika. Nunee Maun boot bele prepara an hodi hasoru ema kagrupu sira nee. Liu-liu antisipa ba eleisaun tinan 2017, maske sei dok.

(5). Estatamenetu nee hanesan manuver Maun Boot Xanana nian hodi konsolida forsa interna Timor-Leste nian hodi hasoru Australia. Tanba gosta ka la gosta maun boot ho nian membru governu balu hasai ona estatementu ida forti no pozisaun ida firmi hasoru Australia iha kazu espionaze ho klaim mina liu-liu kampu mina ho gas iha Greater Sunrise. Estatamentu nee diak no afirma pozisaun Timor-Leste nudar nasaun soberanu, direitu ho demokratiku nebee iha dignidade. Maibe hasoru nasaun boot ho kompanya minarai multinasional presiza "common ground" ho unidade nasional nebee metin. Sein nee nasaun boot ho kompanya minarai bele utiliza forsa interna balu hodi destabiliza, doko maun boot no bele hamonu hanesan mos kazu krizi tinan 2006 nebee hamonu Governu Fretilin nebee lidera husi Mari Alkatiri.

Sa ida mak Sei Mosu Karik Maun Boot Xanana Rezigna An husi Primeiru Ministru? Sa ida mak sei halo hodi antisipa?

Pergunta nee importante tebes hodi buka nian resposta diak ho komprehensivu. Gosta ka la gosta durante nee maun boot Xanana Gusmao nia karisma boot tebes hodi asegura unidade ho estabilidade nasional ho vizinu diak ho nasaun seluk liu-liu ho Indonesia. Nunee mos karisma eroismu nudar lider boot iha funu liberta nasaun,Maun Boot Xanana bele infrenta veteranu barak nebee iha interese ketak-ketak, no balu sai fali kontra produtivu ba dezenvolvimentu nasional hodi muda povu nia moris ba diak. Maun boot Xanana konsege netraliza maske ho kustu ida karu via subsidiu oioin nebee halo tensaun makas ba orsamentu estadu.

Rezignasaun nee bele halo ema tauk tanba bele hamosu instabilidade nasional. Nee hanesan aspeitu psiko-politika ida hamosu trauma ba sosiedade. Liu-liu liga ba krizi politika iha tinan 2006. Maibe instabilidade nasional nee mosu bainhira Xanana rezigna an sein prepara kondisaun. Liu-liu rezigna an nee halao bainhira iha perturbasaun politika. Maibe realidade agora la iha pertubasaun politika, de facto, Xanana agora besik tebes ho Partidu Fretilin, liu-liu nian lider politika sira hanesan Mari Alkatiri ho Lu Olo.

Bahau bainhira lider nasional sira sei hamutuk sei la iha instabilidade nasional. Liu-liu lider sira jerasaun 1975 iha konsensu hodi tuur hamutuk akompainasusesaun lideransa nasional via dalang demokratiku no tuir prinsipiu nasaundireitu demokratiku nebee artikula iha Konstituisaun RDTL. Bainhira lider siranee hamutuk, sira bele dezeina lina jeral ba dezenvolvimentu nasional ho set upkriteria lider nasional alternativa hodi lori Timor-Leste ho povu ba diak.  

Maske nunee importante tebes tenki hatene katak sedu ka tarde maun boot Xanana sei sai duni husi Primeiru Ministru RDTL. Tanba idade ka forsa natureza sei la posibiliza Maun Boot kaer governu ba tinan naruk. Nunee presiza duni iha faze tranzisaun hodi asegura susesaun lideransa Timor-Leste lao diak, pas, demokratiku no sein hamosu konflitu.

Iha ambitu nee, hau hanoin presiza buka konsensu nasional entre lider politika sira hanesan Xanana, Alkatiri, Lu Olo, Taur Matan Ruak, Jose Ramos Horta ho Lere hodi buka figura alternativa nebee akomodatif, diak no matenek, demokratis no iha vizaun ba dezenvolvimentu. Bainhira hamosu lider konsensual ida mak sei pozibiliza lider sira nee tau “kanurun tohar” hodi hatudu dalang ba vizaun,misaun ho programa foun dezenvolvimentu nasional Timor-Leste hodi transforma sosiedade ho nasaun ba diak.

Atu halao knaar nee, lider nasional sira nee bele forma konselhu katuas ka bele integra iha Konselhu Estadu (State Council), nebee lider sira nee hotu tama iha laran, hodi akompaina governu foun nebee lidera husi figura foun.

Dezafiu ba Governu Foun

Karik Maun Xanana Gusmao rezigna an, presiza foti PM foun nebee lidera ema foun nebee tama nudar membru governu. Governu foun nee tenki orienta duni ba dezenvolvimentu, efisiensia ho hadok an husi korupsaun. Nunee governu foun nee tenki forma husi ema sira iha kapasidade, inparsial ho interpartidariu nebee bazeia ba meritu ho kapasidade professional.  

Governu foun mos tenki prontu simu inpopularidade no simu konsekuensia katak iha tinan 2017 sira iha posibilidade la re-eleitu fali. Nunee sei halo sira servisu makas hodi asegura efisiensia, kombate korupsaun no hamosu sistema servisu foun nebee orienta sira nia servisu ba interese povu nian diak iha tempu naruk.

Tanba iha Governu Maun Boot Xanana, halo politika (kebijakan) populis barak (diak ihakontestu agora, maibe la diak iha kontestu media ho longu praza) hanesansubsidiu ba veteranu sein limita, projetu governu veteranu sira mak kaer, subsidiu idozu, ho seluk. Kebijkan populis sira nee fo tensaun makas ba orsamentu estadu no mos hamosu tendensia dependensia sosiedade ba governu. Mos governu dezorganizadu, servisu parsial (la solid ka la integradu) nebee duplika servisu barak halo servisu sai la efetivu tanba deit la iha uniformidade hanoinho hahalok hodi halo planu, implementa ho asegura dezenvolvimentu ba interesepubliku nian diak.

Problema ba Timor-Leste mak nee bainhira kondisaun sira temi leten nee lao nafatin, sein solusaun ida diak, komprehensivu ho relevante mak dezenvolvimentu Timor-Leste iha tempu ruma bele paradu (impasse) tanba ita la iha orsamentu adekuandu hodi sustenta politika populis sira nee. Liu-liu minarai ita nian maran, no rekursu orsamentu seluk seidauk iha ka iha mos kiik tanba deit ita la konsege diversifika rendimentu mina no uza rendimentu mina inefisiensia. Nee bele hamosu konflitu nebee bele afeta sustentabilidade Timor-Lesta nudar nasaun nebee soberanu, povu moris diak, hakmatek, independenti, kompetividade makas no mantein nia identidade rasik.  

Tanba nee, importante tebes lider nasional sira tenki servisu hamutuk ona ho jerasaun foun hodi prepara planu tranzisaun ba susesaun lideransa nasional. No lidertuan sira tenki iha political and good will hodi simu tranziasaun susesaun lider nasional nee, no akompaina ho tulun hodi asegura la iha friksi nasional nebee hola hun husi interese personal ho partidariu lider sira nian.

Se mak bele sai lider konsensual iha faze tranzisaun?

Hau nian belun Antero Bendito husi Peace Studies UNTL hatoo ona figura 3 mak Dr. Bendito Freitas, Dr. Jose Luis Guterres ho Prezidenti PN Vicenti Guterres (Timor Post, 16 Dezembru 2013) hodi sai lider alterbativu governu nian. Nee karik hola husi ema partidu sira nebee forma governu agora. 

Maibe ba hau lider konsensual nebee bele simu atu lidera Timor-Leste iha faze tranzisaun too tinan 2017 karik Maun Boot Xanana hakarak rezigna an duni mak Doutor Rui Araujo, Fernando “La Sama” Araujo ho Dra. Ana Pessoa. Tanba sira hatudu tiha ona sira nia kapasidade ho esperiensia hodi lidera organ nasional ka estadu hanesan vise PM, Prezidenti PN ho Prokurador Jeral. No sira hatudu ona kapabilidade, kredibilidade ho integridade nudar lider nasional ida. Tanba nee, lider otas 1975 presiza konsidera no fo fiar ba sira hodi lidera governu iha faze tranzisaun.*  

Sem comentários:

Enviar um comentário

Nota: só um membro deste blogue pode publicar um comentário.