VISAO MISAO OBJECTIVO SPORTIMOR FH KKN HOME FH LPV ARTIGOS FH MUZIKA LIA MENON FH RESPONDE

quarta-feira, 25 de julho de 2012

Formação Governo (2a Parte): “Inclusão Politica” no “Aliança Maioria”


 Formação Governo (2a Parte):
 “Inclusão Politica” no “Aliança Maioria”

Martinho G. da Silva Gusmão


Mauricio Giraloi, jovem CNRT ida husi Baucau, hatudu katak “inclusão” no “aliança maioria” ne’e hanesan deit. Maibe, participante balun dehan fali katak idéia ne’e hamosu de’it confusão nune’e sira rejeita atu halo governo “aliança maioria” ida nebé “inclusivo”. Tuir ha’u nia hanoin, “aliança maioria” no “inclusão” ne’e hanesan moeda (osan, ka Macassae dehan lawa-masikana) nebé sorin baluk ida labele haketak malu ho sorin seluk. Iha sorin ida, “inclusão” ne’e hatudu liu ba conceito político (aspecto legitimidade) iha sorin seluk, “aliança maioria” ne’e mai husi conceito jurídico (aspecto legalidade). Nune’e iha “deliberative democracy” nia laran, regra da lei (rule of law) ka estado constitucional sai hanesan sasukat. Democracia nebe haketak an husi rule of law hanesan jogo ida nebe la iha esquema sistemático (Habermas, The Inclusion of the Other, 2001: 129 ff).

“Multicultural policies”

Ha’u hakarak hahu foti declaração husi Romeo Moises no Aderito Hugo nebe halo “public-lying” (kebohongan publik) ida kona ba pensão ba idosos no pensão ba veterano sira. Ne’e la’os programa CNRT nian, maibe PSD no FRETILIN nian. CNRT hari’i fulan ida molok tuir eleição 2007, afinal ita rona ona programa kona pensão ba idosos no pensão ba veterano ne’e kleur ona. Maski, ida nebe hetan successo mak pensão vitalícia ba eis-titular sira. Xanana Gusmão mak litik fali Romeo Moises. Xanana halo pergunta honesto, “ita nia programa?”, hanesan baibain Romeo Moises sempre mangame: “ita nia programa”. Maibe, la importa. Importa liu mak oinsa Xanana Gusmão bele formula Plano Estratégico do Desenvolvimento Nacional (PEDN).
Tuir ha’u nia hanoin, PEDN la’os mai husi Idea (Platão) ka razão pura (Kant), maibe multicultural policies ida. PEDN la’os no labele sai hanesan patrimônio CNRT nian (buat nebé Xanana hateten bebeik). Nu’udar multicultural policies, PEDN mai husi colaboração PD, PSD, ASDT no UNDERTIM hodi lori ba forma “We-consciousness, “... a generalized constructivism as a ‘believed’ or ‘imagined commonality’ (Max Weber), the ‘invention of the ethnic nation (H. Schulze) ...” (Habermas 2001: 130). PEDN – hanesan buat nebe Xanana dehan bei-beik – atu sai hanesan patrimônio nação nian hodi hatudu ita tomak nia necessidade no partido nebe de’it bele foti pedasuk ida-ida atu sai prioridade nacional.
Ha’u mos rona debate iha PN kona ba PEDN. Wainhira mai halo “apresentação” iha Diocese Baucau, PM Gusmão ko’alia lalais no halai de’it! Amo-lulik sira no Amo Bispo la consegue halo pergunta barak no hetan resposta klean, tan dehan katak helicóptero hein ona atu semo ba Díli (to’o almoço nebé ami oferece mos la bok oituan kedas). Nune’e, ha’u bele compreende oituan tan sa mak FRETILIN “walk-out” iha Dili. Iha Baucau, AMP mak “walk out” fali husi aula Diocese. Bispo no Padre sira mak loke ibun hateke tuir kareta nia suar no rai-rahun nia suar.
Tuir ha’u nia observação, PEDN hetan legalidade liu husi PN  nebé AMP mak lidera. FRETILIN no PUN “walk-out”. Agora, CNRT hakarak foti ida ne’e nu’udar ninia propriedade mesak tan Xanana ninia energia atu halo defesa ba PEDN (lori halo political marketing iha sub-distrito 65 nia laran). Pode ser, aban-bainrua Xanana la ukun ona, PEDN mos hatun bandeira ona. Barak ka oituan, CNRT hakarak kesi sira nia esperança tomak ba Maun Boot atu sai oituan hanesan deus ex machina, nune’e partido bele nakdoko maibe Xanana bele lori estabilidade no paz ba ema hotu.
Posição no liderança Xanana nian importante duni! Ninia pensamento luan no naruk (“ha’u nia matan hateke dook tebes”). Maibe, tan ida ne’e mos dala ruma halo katak ninia estratégia política naksalak hotu no hatudu inconsistência ba ninia resistência no consistência moral rasik. Ninia resultado, decisão lubuk ida sai namkari no namtate hotu. Exemplo mak KKN – CNRT dun PD, PD sukit PSD, PSD dudu ba ASDT no to’o Governo AMP hotu, sira hatudu malu ho “projecto dudu dada”. Maski Xanana dehan “foti 0.50$ mos hasai”, maibe AMP rame-rame foti $50 too $50.000 ba leten, ne’e be sira dudu malu  no dada malu hela deit. Buat ida de’it  mak metin nafatin: Xanana Gusmão ninia “abertura” ba pluralidade cultura política (problema otonomista no integracionista; sempre hatudu cultura la hanesan) no complexidade social (Díli avançado liu no runguranga liu, Lospalos to’o Oecusse atrazado liu no hakmatek hela) hodi nune’e ema hotu-hotu nebé iha diferencia bele hasoru malu ho nia, tur hamutuk no hateke malu mata-laran atu ko’alia. To’o FRETILIN nebé nia tane-metin iha resistência nia laran mos bele “avontade” lori spanduk ka hakerek iha didi-lolon atu tolok nia rahun didiak.
Ha’u hanoin, liu husi conferencia CCD ne’e Xanana continua sai maestro ida hodi dirige orquestra política. Maibe, sira nebé kaer instrumento político mak seidauk hatudu harmonia. Sira nebé hananu hamutuk iha coro ne’e nia lian sei fals hela. Nune’e, ema nebé rona sira – liu-liu militante no organização massa FRETILIN – halo huru-hara fali. Dasaaarrr política mercado lama!!!

Nacionalismo: “Imagined community ... limited ... sovereign

Pergunta nebé curiosamente ha’u hakarak foti mak ne’e: Saida lerek mak AMP II (CNRT, PD, FM) no oposição (FRETILIN) hanoin kona ba hari’i estado (state building) atu nune’e bele realiza povo nia mehi? Oinsa mak sira hakesi an ho sentimento kona ba “nacionalidade”, ka “nacionalismo”, “chauvinismo” no “patriotismo”? Pergunta ne’e ha’u foti, tan partido sira nebé agora kaer ukun ne’e sukit malu, dulas ibun ba malu no insulta malu kona ba otonomista, oportunista no traidor ... maski tetu no dasin ba sira hanesan de’it. Se CNRT iha otonomista oportunista barak, keta dehan FRETILIN no PD ho FM la iha.
Matenek nain Ben Anderson hateten katak, "In an anthropological spirit, then, I propose the following definition of the nation: it is an imagined political community … and imagined as both inherently limited and sovereign”, katak, haré husi espirito antropologico, Ben Anderson hatur definição ida kona ba nação nu’udar comunidade politica nebé moris iha ema hanoin de’it iha nia ulun laran ... no ema hanoin hanesan limitado no soberano   (cfr., Imagined Community: Reflections on the Origin and Spread of Nationalism, 1991, pp 5–7).
Tan sa mak Anderson dehan “imagined community”? Foti husi autor ida husi França, Anderson hakerek nune’e ... Or l’essence d’une nation est que tons les individus aient beaucaup de choses en commun, et aussi que tous aient oublié bien de choses”. Nune’e, essência husi nação ida mak ema ida-idak haré/hanoin sasan bara-barak nu’udar hotu-hotu nian, nune’e mos ema hotu-hotu lalika hanoin katak sasan ki’ik-aon sira hotu-hotu nian. Atu tau exemplo, ema ida-idak hanoin katak nia Timor oan maski nia moris iha Lospalos maibe nunca hasoru malu ho ema Oecusse, ka Bobonaro oan maibe nunca haré Baucau. Hasoru malu iha Díli, sira hanoin fali an nu’udar kinamoko ka atoni, firaku ka kaladi. Wainhira sira fila ba Lospalos, Baucau, Bobonaro ka Oecusse ... ema iha neba dehan fali “Díli oan sira”, ka, “ema sira husi Díli”. Runguranga liu, wainhira dehan “sira husi parte nacional nian”. Ema hotu nebé mai husi Díli ne’e “nacional”. Ema nebé la’os husi Díli hetan liafuan péssimo “sub-nacional”. Ho ida ne’e mak Anderson foti tan fali husi Gellner no hakerek kroat oituan dehan, “Nationalism is not the awakening of nations to self-consciousness: it invents nations where they do not exist”. Tan ne’e, biar iha tinan 10 nia laran ne’e Timor Leste ne’e “Díli-centric” ... ema sira nebé moris iha Distrito la laran moras. Tan ne’e nacionalismo ne’e hanesan “fabricação” ka “falsificação” husi partido político nian. La’os imaginação no criação kona ba “State-building”. Concretamente: issue kona ba otonomista, oportunista no traidor ne’e mosu iha Díli laran no iha político sira nia le’et; iha Distrito ema hare malu husi aspecto “feto-san uma mane”.
Tan sa mak na’i-ulun político sira bele nanal mamar liu nune’e? Uluk FRETILIN mak nanal mamar loos halo insultos ba AMP. Agora, CNRT mak halo fali. Anderson nia liafuan karik, nia dehan, tan na’i-ulun sira hatene katak nação ne’e “imagined ... as limited ...”! Partido hanesan companhia empresarial ida, limited group ida: manan katak hetan projecto, lakon katak la hetan projecto. Sira imagina “eleição” nu’udar tenderização ida atu manan projecto. Hanesan baibain, companhia nebé lakon, sei la ko’alia barak. Maibe, sira nebé tama iha kategoria “the best-one” no “the best-two” tem que halo negociação ho makaer-ukun sira (detentor do poder) atu hetan percentagem (“take and give”?). Ne’e duni, Anderson hakerek, “The most messianic nationalists do not dream of a day when all the members of the human race will join their nation in the way that it was possible, ...” – katak, nasionalista ida nebé messiânico liu (FRETILIN ka CNRT, PD ka FM) mos la mehi kona ba loron wainhira ema tomak husi rasa oi-oin sei to’o ka moris iha nação nebé uluk sira mehi katak bele hari’i. Concretamente: nacionalismo nu’udar “limited” sei taka ibun, wainhira empresário sira husi Indonésia contribui osan barak ba partido CNRT, FRETILIN, PD no FM ... inclui lori Ikang Fawzi no Marissa Hacque mai halo campanha ba CNRT no militante FRETILIN, PD no FM balun ba nonton. Ha’u “estranha” (merasa heran), tan sa mak Sarjana Hukum sira CNRT nian hanesan Carmelita Caetano Moniz no Dionísio Babo la hare matan mos, katak, presença Ikang Fauzi no Marisa Hacque (Governadora Província Banten, Indonesia) mai halo fali campanha eleitoral iha Timor Leste ba CNRT no “Viva Xanana”, hanesan fali ita ne’e sei Propinsi ke-27 nafatin no la’os “... Estado de direito democrático, soberano, independente e unitário, ...” (CR art 1o). Keta haluha, artista sira Indonésia nian iha era Marisa ho Ikang halo declaração atu condena ami estudante RENETIL tan halo demonstração iha Jakarta mak ne’e. Keta halo, sira iha relação ho figura balun iha comissão politica no campanha AMP nian nebe tuda lisuk mahasiswa sira halo demonstração iha Jakarta karik? Maibe, ne’e problema nacionalista Díli nian, ... se mak sibuk fali ho ida ne’e iha Distrito 12 nia laran?
Xanana hatene katak nia mesak de’it labele hari’i Estado no Nação ne’e, maski membro CNRT ko’alia hanesan partido sira seluk tem que hakruk ba sira (hanesan uluk FRETILIN mos halo nune’e). Dala ida tan, Anderson hakerek katak nação “... imagined ... as sovereign ...”; nia hatutan “...because the concept was born in an age in which Enlightenment and Revolution were destroying the legitimacy of the divenely-ordained, hierarchical dynstic realm”. Iha historia da filosofia política, conceito “soberania” ne’e mosu atu halakon tiha conceito “majestada”. Liafuan “majestada” ne’e hatudu ba legimitade Liu-rai no Imperador sira nebé hanoin katak sira nia poder mai husi Maromak. Mosu tiha era iluminação (Aufklärung) no revolução (Frances 1789), moris mos nacionalismo nebé hatur iha “soberania” povo nian. Ha’u hanoin, FRETILIN sadere an ba “partido histórico” no “povo lulik”, CNRT sadere ba Xanana Gusmão: “lider histórico” no “carismático”. Maibe, FRETILIN no Xanana Gusmão sai tiha ona hanesan “sua majestada”. Ne’e duni, contra FRETILIN ka Xanana Gusmão hanesan fali contra “maromak”. Agora FRETILIN no CNRT mak rakut malu. Povo hateke de’it sira nia hahalok no “cuek habis”. Tan sa nacionalista ulun moras haksesuk malu kona ba “otonomista” sira? Se “otonomista” sira tama iha FRETILIN laran ne’e sira nacionalista hotu kedas, tan FRETILIN lulik nune’e nia halulik hotu otonomista sira. Ema seluk bele ko’alia, maibe simu de’it. Vice versa, se nacionalista sira haré “otonomista” sira iha CNRT nia laran, sira simu de’it ona tan Xanana Gusmão iha neba. Dala ida tan, povo haré no hanoin iha laran: “githu adja kok repot?!

Aliança Maioria “Inclusivo”

Ha’u observa katak intuição nebé Xanana Gusmão foti mak diak – haré ba acordo programático. Hanesan ha’u dehan ona, AMP ne’e mai husi concieto jurídico ida. Juridicamente, partido sira mak sei forma Governo wainhira manan eleição. Ita nia sistema eleição hatada ba método proporcional no competição husi multipartidarismo. Iha 2012 ne’e, partido sira nebé manan eleicao mak CNRT (36%), FRETILIN (29%), PD (10%) no FM (3%). Sira seluk lakon. La hanesan ho rai-seluk (Cabo Verde, Guine Bissau, Portugal, São Tome e Príncipe), ita nia rai Timor Leste la fo kbiit ba PR atu halo arbitragem ba governabilidade. Tan ne’e, CR artigo 106o (haré mos CR artigo 85o alínea d; 86o alínea h) temi mos frase ida “ouvir os partidos” nebé iha sira nia representante sira iha PN (manan eleição). PR nia knar mak “nomear”; Partido sira mak “indigitar” Primeiro Ministro. So que, CR la dehan katak ita nia PR “ouvir os partidos” iha TVTL ka iha ninia Palácio Ai-tarak-laran.
Politicamente, aliança maioria ne’e mosu atu reúne iha crença política ida nia laran. Xanana hateten momos kedas, katak, uluk ne’e sira hahu luta no hanoin katak FRETILIN ne’e simu de’it monopartidarismo. Maibe, iha processo luta nia laran, Xanana sai husi FRETILIN no loke dalan ba nacionalismo-multipartidarismo. Oinsa mak ita haré AMP husi perspectiva multipartidarismo nian? Ha’u afilia ba analista Giovanni Sartori (Itália) nebé ko’alia kona ba “formato del sistema partitico e la meccanica funzionale”. Sartori nia teoria sai famoso no sai sasukat atu oinsa mak partido sira hari’i aliança maioria iha sistema parlamentar nação/ estado sira Europeu nian. Ha’u kaer to’ok Sartori nia teoria atu fo hanoin kona ba cenário nebé Xanana Gusmão hatoo ba conferencista sira atu halo “aliança maioria parlamentar”:

1)                  Wainhira CNRT lakohi halo aliança maioria ho FRETILIN, ne’e la’os tan “despresa to’o mate” ka “la mehi hetan”, maibe tan hakarak atu hases an husi “sistema a partito egemonico” nebe halakon (elimina) fali “autoritária” husi oposição nia liman. Xanana mos haré hela oinsa mak labele hamosu “totalitário” wainhira FRETILIN no CNRT moris hamutuk iha aliança ida. Tan ida ne’e bele oho democracia, wainhira “partido histórico” no “lider histórico” hamutuk, então totalitarismo autocrático mak sei ukun liu husi sistema monopartidarismo. La iha ema ida mak sei brani kontra “lulik” no “maromak”. Razão seluk nebé conferencista sira hato’o durante sorumotu ne’e hanesan ódio no vingança de’it, tan CNRT (liu-liu Xanana) hetan duni liafuan aat barak husi FRETILIN. Maibe, CNRT no FRETILIN “balda malun liafuan” la’os espelho democracia ba ita.
2)                  Wainhira CNRT hili PD no FM atu halo aliança maioria, ne’e mos tem que haré husi sikun ida, katak, CNRT mesak nia força la to’o atu ukun. Ha’u kaer nafatin Sartori nia liafuan atu hatudu katak,
a.       CNRT la iha kbiit atu kaer buat hotu (predominante), tan ninia “voto” la to’o atu “un partito domina lo scenario ininterrottamente” (partido ida domina cenário nafatin ba nafatin no la kotu). Atu hari’i Estado, povo Timor Leste fo de’it voto 36% ba CNRT. Nia labele taka matan no taka tilun ba ema seluk, maibe hamoris duni cultura “inclusão”.

b.      CNRT bele de’it halo “pluralismo moderato/ multipartitismo limitato” – tan, PD no FM de’it mak bele tama. Maibe, ida ne’e la significa katak CNRT mak laran luak atu fo “cadeira” ba PD no FM. Ida ne’e la’os ona democracia, maibe anti-democracia, tan la hateke ba partido ne’e nu’udar parceiro no aliado ba razão-estratégico, maibe razão-instrumental.

c.       Uluk, aliança maioria moris iha “pluralismo polarizzato/ multipartitismo estremo” nia laran – tan CNRT la’o hamutuk ho PD, PSD, ASDT no UNDERTIM. Sartori dehan, iha aliança ne’e nia laran mosu duni “un centro stabilmente al governo” (partido hotu defende malu atu Goveno AMP metin tan sira hakesin malu metin iha compromisso no consenso). Maibe, mosu mos “una doppia opposizione” (uma dupla oposição), wainhira membro CNRT, PD, PSD, ASDT no UNDERTIM rasik halo oposição iha PN (centro direita) iha assunto balun hodi fo vantagem ba FRETILIN (centro esquerda). Husi ne’e mosu kedas dinâmica democracia nebé Sartori hanaran “tendenza centrifuga” – Tetum karik: kaer ikun la toman.

Multipartidarismo nebé infeita democracia bele determinante ba AMP rasik atu hamosu “inclusão” ba cultura politica iha Timor Leste. Iha ne’e idéia husi Sartori kona “meccanica della costruzione” (mecânica da construção) bele fo alicerço ba inclusão nebé metin no saudável.
Ida uluk (1), “potenziale di coalizione” (kbit atu halo coligação ka aliança) wainhira CNRT (ha’u prefere dehan tan “Xananaismo”) nu’udar mais votado  hatudu nafatin ninia consistência moral no persistência política atu forma “inclusão” hodi nune’e bele mosu utilidade ba sistema no processo governativa ida. Keta dehan, maibe partido médio (PD) no ki’ik (FM) iha duni relevância, dala ruma mos indispensável ba inclusão governativa.
Ida seluk (2), “potenziale di intimidazione ... o ricatto” (potencia ba intimidação) wainhira FRETILIN nebé la tama iha inclusão governativa (sai oposição ba governo), maibe iha papel central, graça ba ninia “disponibilidade dos votos”, ba ninia “representação dos interesses” no ninia presença iha sessões plenárias PN nian bele condiciona processo atu foti decisão. Ne’e duni, hakarak ka lakohi, wainhira haré ba kbit no knar nebé FRETILIN hatudu, AMP (CNRT, PD no FM) tem que kesi metin sapatu talin no kalsa talin atu funcionamento govenativo la’o di’ak. A lias, “inclusão” no “unidade” AMP metin nafatin. Se lae “A Deus CNRT, bem vindo AMP”. Only God knows!!!

*) Hakerek nain, Comissário CNE representante husi Igreja Católica; coordenador sub-comissão EDUCAÇÃO ELEITORAL (estudos, pesquisa & publicações).

Sem comentários:

Enviar um comentário

Nota: só um membro deste blogue pode publicar um comentário.