VISAO MISAO OBJECTIVO SPORTIMOR FH KKN HOME FH LPV ARTIGOS FH MUZIKA LIA MENON FH RESPONDE

terça-feira, 29 de maio de 2012

Corrupção Eleitoral (1a): Osan atu Sosa “Poder”


Martinho G. da Silva Gusmão

Wainhira Presidente Consórcio Nacional Timorense (CNT), Jorge Serano no Rui Castro dehan iha RTL (25.05.2012) katak CNE la halo socialização kona ba “bandu” atu fo osan ba partido político, nune’e sira la hatene tuir an, ha’u hanoin katak ne’e declaração enganadora ida (= lohi nian). Ha’u la fiar katak empresário sira “inocente” (la hatene buat ida, sala laek) hasoru “jogo” ida nebé sei halimar ho osan barak. Ema hotu hatene ona, katak, wainhira empresário ida fo osan husi $ 100,000 to’o $ 300,000 ne’e la fo saugati de’it. La iha grátis, tan osan ne’e la’os graça Maromak nian maibe empresário nia kosar-wen rasik. Até, ema balun fo esmola iha Igreja $0.50 de’it mos ko’alia barak ona (to’o tolok tan catequista sira), sa tan osan boot hanesan ne’e?
Husi biban seluk, CNE no CAC hala’o conferencia internacional ida kona ba transparência no fiscalização ba contas campanha eleitoral nian (Centro Convenção de Díli, 24 Marsu 2012). Iha neba, CNE no CAC hakarak bolu ema hotu atu hanoin lisuk kona ba corrupção eleitoral. Maibe, ho laran todan tebes ami hateten katak partido político sira la iha “minat” atu tuir sessão ida ne’e. Sa tan empresário sira. Ba empresário sira, liafuan “corrupção” ne’e hanesan busa-ho-laho-hafuhu malu (hanesan film cartoon “Tom and Jerry”, loron ida Tom [busa] mak duni Jerry [laho], dala ruma fali Jerry mak hatun Tom). Ne’e duni, ba empresário no político sira, liafuan “corrupção” ne’e sai ona hanesan ameaça no terror. Di’ak liu ba sira buka dalan seluk.
CNE ho CAC bolu orador husi Indonésia no Austrália. Orador husi Makmah Konstitusi (MK) Indonésia nian, DR. Hamdan Zoelva, SH, MH hateten katak iha eleição nia laran, mosu bebeik “uang haram untuk belanja politik”. Nune’e mos, orador husi Austrália – Michael Maley – encoraja nafatin Timor oan sira atu hanoin kona ba assunto “corrupção eleitoral”. Nia dehan katak iniciativa CNE no CAC “… ida ne’e halo hau laran haksolok tebes atu haré katak tópico ida ne’e foti ona iha Timor Leste. Iha rai barak, problema nakfera iha publico nia let no bolu ona politica na’in sira nia atenção wainhira corrupção sai ona parte ida nebé nia hun no abut metin tiha ona no fokit la diak ona iha processo eleitoral nia laran. Timor Leste absolutamente la’os iha condição ida ne’e nia laran” (“... it is particularly pleasing to see this topic being addressed now in Timor-Leste.  In too many other countries, the problem comes to the forefront of public and political attention only when corruption has become a deeply entrenched and intractable element of the electoral process.  Timor-Leste is absolutely not in such a condition”).
Artigo ida ne’e la’os atu foti reagem hasoru Presidente CNT Jorge Serano no halo defesa ba Presidente CNE Faustino Cardoso Gomes, maibe atu “salva” tiha no kaer metin tiha questão kona ba “compras do poder”. Ita labele husik de’it problema osan ba partido político ne’e hanesan lia-anin ida – ita hatene anin hu’u hela, maibe ita la hatene nia mai husi nebé no sei hu’u to’o iha nebé (?).

Corrupção Eleitoral: saida mak ne’e?

Rafael Lopes-Pintor, hakerek kona ba Assessing Electoral Fraud in New Democracies: A Basic Conceptual Framework (www.ifes.org), hodi dehan katak, “Many observers view corruption as synonymous with electoral fraud. However, while fraud is certainly a form of corruption, it is only one of many forms that it can take, albeit one of the most obvious and high-profile.  Corruption refers to self-serving behavior that deviates from the formal rules of conduct governing the actions of someone in a position of public authority…. This includes several deep and systemic problems with governance and the rule of law, normally involving mismanagement of public funds or briberies.  Electoral fraud specifically refers to deceptive or negligent interference with the electoral process that intends to prevent the outcome from reflecting the will of the people”.
Husi ne’e ita haré katak fraude eleitoral no corrupção eleitoral bele haka’it malun, maibe la hanesan. Baibain, corrupção eleitoral ne’e hatudu liu ba oinsa mak “subar” ka “manipula” osan ninia montante ba publico ka lori osan atu “sogok”. Liafuan diak liu mak “angariação” ka “malam dana” ka “fund rising” atu bele subar sasan sira ba publico. CNT ninia bos, Jorge Serano ho nia colega Rui Castro hateten momos iha publico katak sira fo osan bebeik ona ba partido político sira, la’os de’it ba CNRT maibe mos ba FRETILIN (até dehan tan, “líder partido político balun mai husu osan husi kotuk”). Sira nia declaração iha media hatudu de’it buat ida, katak, empresário sira fo ona osan barak no fo nafatin osan ba na’i-ulun político sira. Maibe, to’o ohin loron CNRT nia programa angariação mak hamosu polemika husi Presidente Global Organization of Parliamentarians Against Corruption (GOPAC) Fernanda Borges no Presidente CNE Faustino Cardoso Gomes. Maibe, CNT nia presidente mos dehan katak “primeira vez mak fo ba CNRT”, no dehan tan katak partido boot sira seluk mos hetan (partido balun ba halo tiha tusan, depois mak haruka empresário sira selu). Rui Castro hateten tan, “lider partidu barak maka husu osan iha kotuk hodi suporta partidu maibe ema ida la kestiona”. Ha’u hanoin ita hare matan mos ona kona ba “mismanagement of public funds”!  Katak, osan tama sai ba cofre partido barak (liu-liu partido boot sira), maibe publico la hatene no la iha contabilidade nebe transparente.
Se mak sala? Ida ne’e mak ha’u hanaran pecado original (original sin) – sala ida mai husi ita nia hun no kona da’et ba ema hotu. Maromak tara bandu ona, maibe Adão ho Eva viola “bandu” ne’e hodi sala ida ne’e kona daet ba ema tomak. Tan sa mak hanaran “pecado original”? Tan, hahalok naksalak sira ne’e ninia maksalak hun mak lei rasik. Lei sira ne’e PN mak halo. Wainhira PN aten-la-brani atu halo lei maka’as ida, ita hotu hanesan ona moris iha “deep and systemic problems with governance and the rule of law”. Lei nebé mai husi Governo mak loke duni dalan atu labele mosu controla ba osan. Lei nebé PN aprova ne’e hanesan taka matan ba ku’ak sira iha oin. Lei nebé PR promulga hanesan selok tama política no processo democracia iha ku’ak laran.
Corrupção eleitoral mos bele kona da’et ba “buying vote” (sosa no fa’an votos). Ida ne’e hatur iha Código Penal art 234o. Maibe, caso ida ne’e susar tebes mosu iha Timor Leste ... liu-liu wainhira ko’alia kona ba eleição parlamentar. Tan ita adopta sistema “lista única”. Ne’e duni, candidato sira susar tebes atu “sosa votos” iha Timor laran tomak ba nia an. Ema ba vota iha partido, la’os candidato! Maibe, ita bele desconfia katak ema balun “sogok” (buka oin iha ...; hatudu an ba ...) presidente partido nian atu hatama candidato balun iha “nomor jadi”. Nune’e, ita bele haré to’ok ho matan-ikun ba presidente no secretario geral partido nian. Keta halo, partido sai tiha oligarquia ida nebe presidente partido bele monta ninia família ka grupo. Iha eleição presidencial, buying-vote ne’e nakloken liu tan candidato sira hotu mesak unipessoal.
Husi biban seluk fraude eleitoral hatudu liu ba oinsa mak ema muturabu tama iha processo eleitoral nia laran atu halakon ka hamaten ninia resultado. Ida ne’e mosu liu husi ilícito eleitoral no crime eleitoral (Código Penal arts 229o–242o). Exemplo, wainhira estudante sira iha UNITAL declara atu halo boicotte eleitoral hodi impede ema 5000 la ba vota. Tuir lei eleitoral, estudante sira nebé hakarak hala’o ação hirak ne’e hatan kedas tribunal no tama dadur laran. Ema ida-idak iha direito atu ba vota, maibe mos iha liberdade atu la ba vota. Maibe, la iha ema seluk mak bele taka netik dalan. Hahalok atu taka dalan ba ema seluk ne’e tama ona fraude eleitoral. Ka hanesan fiscais husi candidato TMR nian hakilar iha CNE atu lori ba tribunal hodi hapara processo apuramento iha CNE (iha caso urnas husi Buibau/ Baucau nian), tama ona fraude eleitoral. Tuir lolos, fiscais husi TMR nian tama dadur laran (maibe, CNE la foti medidas no PNTL mos hateke deit).

Enquadramento legal

            Iha Brazil, Tribunal Superior Eleitoral (TSE) iha lei ida naran “ficha limpa”. Lei ida ne’e fo “autoridade” no “poder” tomak ba TSE atu tebe-penalto ba partido ka candidato ka empresário sira nebé halimar arbiru ho osan! Bele halo “angariação” iha kalan wainhira han hamutuk, maibe ninia regra claro. Se se de’it mak viola lei ficha limpa ne’e bele lakon ninia direito político tomak – labele tama partido político, labele sai candidato ba eleição saida deit. Se nia mak eleito ona, ka hetan ona cargo ida, nia sei husik hela cargo ida ne’e no tama iha dadur laran.
Timor Leste iha duni ninia “lutu” atu bele halo prevenção ba corrupção eleitoral. Ida uluk liu (1) mak mai husi Constituição da Republica artigo 65o n. 3 alinea d) – “Transparência e fiscalização das contas eleitorais”. Liafuan hirak ne’e mosu hikas fali iha Lei 6/2006 (altera ho Lei 7/2011) no Lei 7/2006 (altera ho Lei 8/2011) nia laran. Ita nia pergunta: se mak sei halo fiscalização ba osan sira nebé tama sai iha partido político ka candidato sira nia conta iha periodo eleitoral nian? Liafuan “fiscalização” ne’e hatudu ba knar no kbiit husi órgão ka instituição ida hodi bele foti decisão kona ba hahalok nebé diak no mos la diak; kona ba buat hotu nebé partido sira halo atu ema haré ka la haré. Kona ba osan, Lei-Inan fo knar no kbiit ba Tribunal Superior Administrativo, Fiscal e de Contas (CR art 129o). Maibe, tan tribunal ida ne’e seidauk hari’i, nune’e osan tomak bele tama sai hanesan we-suli ba mai. La iha doit metan oan ida mak ita kaer toman.
            Tuir mai (2), lei no. 3/2004 kona ba partido político sira no lei no. 6/2008 kona ba regime financiamento ba partido político sira. Iha neba dehan katak, osan husi partido político nian bele mai husi fatin sira hanesan:

  • Quota mai husi membro partido nian – husi presidente partido to’o militante no simpatizante sira tomak;
  • Angariação (fund rising) nebé partido halo hodi hetan osan husi ema seluk; hanesan CNRT halo no partido seluk (FRETILIN ka PD ka PSD ka ASDT no seluk tan ...) mos halo;
  • Patrimônio partido – katak, osan tama husi partido nia riku-soy sira hodi fila-liman atu manan osan ba actividade partido nian ...
  • Contribuição husi ema ida-idak (individual/ singular) ka husi grupo ka organização (colectivo), maibe nacional. Ema husi rai liur (estrangeira) la bele fo osan ba partido. Problema hanesan BTK no Montana Di’ak ne’e sei hamosu confusão tan ita haré momos “bapak” sira mak kaer projecto maibe ninia nain mak “ema laran”. Se mak sira ita la hatene!?
  • Subvenção publica nebé mai husi orçamento geral Estado nian. Partido sira hanesan FRETILIN, CNRT, PD, ASDT, PSD, KOTA, PPT, UNDERTIM no PUN hetan hotu osan. Lei no. 6/2008 mak hatur knar no kbiit CNE nian atu halo “apreciação das contas” liu husi audit. CNE la halo controla, sa tan fiscalização ka investigação (wainhira partido balun hatama kwitansi nebé CNE desconfia hela katak falsu). Ne’e duni, osan hirak ne’e ninia lalaok oinsa, CNE lalika ba sukit tuir. Lei la fo knar no kbiit atu CNE sai fali hanesan CAC ba partido político.

Lei no. 3/ 2004: Partidos políticos
Artigo 22o – financiamentos proibidos (osan nebé PP labele simu)
Lei 6/2008 – financiamento
Artigo 4o – receitas
a)      Empresas publicas (ka iha Indonésia hanaran Badan Usaha Milik Negara/ BUMN), hanesan ANP no BCTL
b)      Sociedades com capital exclusivo ou maioritariamente do Estado (hanesan Timor Telkom)
c)      Empresas concessionárias de serviços públicos – hanesan BTK, Montana Di’ak, Altramor no empresa boot sira nebé halo projecto husi Estado/ Governo;
d)      Pessoas colectivas de utilidade publica ou dedicadas a actividades de beneficiencia ou de fim religioso (ne’e duni, Igreja Católica ka Protestante ka religião Islam iha Timor Leste labele halibur osan hodi fo ba partido ...)
e)      Associações profissionais, sindacais ou patronais – hanesan Grupu Konsorsiu Nacional Timorense (CNT) nebé lidera husi Jorge Serano;
f)       Fundações;
g)      Governos ou pessoas colectivas estrangeiras – hanesan BTK no Montana Di’ak ...
1)      Dehan “receitas” tuir lei ida ne’e mak “subvenção publica” (osan mai husi orçamento geral Estado nian)
2)      Receitas próprias – quotas; angariação; patrimônio partido; empréstimos;
3)      Receitas de financiamento privado – contribuição husi ema ida-idak nacional nian;
4)      Subvenção publica – osan ba partido político sira nebé iha assento parlamentar;
5)      ... expressamente proibidas – katak, labele liu kedas simu osan husi “pessoas colectivas nacionais” (hanesan CNT, Montana Di’ak?, BTK? no seluk tan) no husi “pessoas singulares ou colectivas estrangeiras” (lista nebé diário ida hasai ne’e bele haré tuir deit).

Mosu buat ruma mak la los, ka, kois oituan kona ba corrupção eleitoral karik, saida mak ita (CNE, CAC, MP) bele halo? Lei hirak ne’e la hatur lolos se mak atu halo investigação. Ne’e duni, ita nia sistema legal la hatudu lolos se mak sai “controlador” no “investigador” ba osan partido político nian.
Ikus liu (3), iha LEPN (art. 31o)/ LEPR (art. 30o) ko’alia kona ba “financiamento” iha parte kona ba “campanha eleitoral” nian. Dehan nune’e, “O financiamento das candidaturas rege-se por legislação especifica e, com as devidas adaptações, pelas normas aplicáveis da lei sobre partidos políticos”. Artigo ida hatudu katak PN ka Governo mak sei halo legislação especifica kona ba oinsa mak candidato sira ka partido político ka coligações partidárias sira buka osan, hetan osan no halo despesa ba campanha eleitoral nian. Hela furak liu, wainhira partido sira AMP nian (CNRT ho PD, ASDT, PSD no UNDERTIM) hamutuk ho partido sira OMP (FRETILIN, KOTA no PPT ho PUN) halo uluk lai legislação especifica ne’e. Iha lei ne’e nia laran, AMP no OMP hatur ona kona ba bele ka lae halo angariação (?); se bele halo angariação, la’o oinsa (?); se la bele, tan sa(?). Wainhira la iha legislação especifica ida ne’e, tan sa mak GOPAC no FRETILIN haklalak hotu ba publico (sa tan husu fali CNE atu halo investigação no lasu fali CNE hodi dehan “A CNE não pode ficar indeferente à situação aqui descrita ...). Ne’e duni, wainhira ita haksesuk malu kona ba angariação, Secretario Geral CNRT nian, Dr. Dionísio Babo, SH hatene duni katak “angariação” ne’e la contra lei. Tan sa mak la contra lei? Tan lei la iha duni atu contra. Iha principio ida dehan, “nulla poena sine leggi” – ita labele hateten ema sala, wainhira lei la iha. Ne’e duni, partido sira hotu hatene katak la iha lei, sira bele halo buat hotu nebe ema hare no mos la hare.
Baibain ita tau iha ulun hodi hanoin de’it katak, “rege-se por legislação própria ...” ne’e significa CNE halo proposta ba Governo atu PN aprova osan ba candidato/ partido político hodi halo campanha. Ninia conseqüência, partido ki’ik no foun sira ho CNE ninia serviço mak loron kalan hanesan oan ki’ak sira ba tane liman ba Governo no PN atu hetan osan (ida ne’e “desgraçado” tebes). Maski usa liafuan furak “assegurar o tratamento de igualdade ...” karik ba! Maibe, dala ruma partido ki’ik sira mos halo abuso! Xanana Gusmão dala ida dehan ba ha’u, “Amo, ita fo tiha osan $ 30,000 ba sira, Presidente partido ba aluga mikrolet hodi tara bandeira iha sorin-sorin mak la’o haleu Díli semana 2 nia laran hodi halo campanha mesak”! Ne’e mos abuso boot ida iha conceito “igualdade de tratamento” nia laran. La justo, wainhira partido boot hanesan FRETILIN no CNRT hasoru “rombongan makan grátis” wain be wain ho $30,000 hanesan de’it ho partido ki’ik nebe ninia presidente mesak mak han (no, sofer mikrolet ho nia konjak han iha warung).
Atu bele hatan ba Lei 6/2006 (altera ho Lei 7/2011) no Lei 7/2006 (altera ho Lei 8/2011) mak CNE aprova Regulamento 03/STAE/X/2012 kona ba campanha eleitoral nian. Iha Capitulo VI, artigo 29o–33o hakerek hikas buat hotu nebé mai husi Lei 3/2004 no Lei 6/2008. La iha buat foun. La iha meik no kroat nebé CNE bele kaer atu halo combate corrupção hasoru invasão husi partido bo’ot sira hanesan FRETILIN, CNRT, PD, PSD no ASDT ... inclui, partido ki’ik sira hanesan PUN, UNDERTIM, KOTA/PPT.
Obriga CNE atu halo “controla” ka “investigação” hanesan de’it ho hahalok atu haruka soldadu sira ba tiru malu, maibe la iha bala. Nune’e, CNE sai tiha hanesan bode expiatório (the scape goat) ba incapacidade no indiferença husi PN nebe la halo lei didiak [PN fiar liu ba Governo; no Governo namdoras tama de’it iha esboço da lei nebe STAE haruka]. Sira hotu halo sala tiha, maibe tuda fali fatuk no fakar rai rahun ba CNE.

*) Hakerek nain, Comissário CNE representante husi Igreja Católica; coordenador sub-comissão EDUCAÇÃO ELEITORAL (estudos, pesquisa & publicações).

Sem comentários:

Enviar um comentário

Nota: só um membro deste blogue pode publicar um comentário.