VISAO MISAO OBJECTIVO SPORTIMOR FH KKN HOME FH LPV ARTIGOS FH MUZIKA LIA MENON FH RESPONDE
Congresso  Nacional de Recontrucão de Timor-Leste Frente Revolucionaria de Timor-Leste Independente Partido Democratico Frenti-Mudança FM Partido Socialista Timor Partido do Desenvolvimento Nacional Associação Social-Democrata Timorense União Nacional Democrática de Resistência Timorense União Democrática Timorense Partidu Republikanu Partido Libertasaun Povu 

Aileba Partido Democrática Republica de 

Timor Associação Popular Monarquia Timorense Partido Unidade Nacional Partido Milénio Democrático Klibur Oan Timor Asuwain Aliança Democrática Partido Timorense Democrático Partidu Democrática Liberal Partido do Desenvolvimento Popular Partido Democrata Cristão
"Bye bye" depois da cimeira da CPLP. ... dar lugar às novas gerações, para que estas se preparem para defender o país das ameaças à soberania do país.
H
O
M
E
Timor-Leste seeks SPC membership
Um consórcio petrolífero que atenue a hegemonia australiana
Sukses Selenggarakan KTT CPLP, Timor Leste Dapat Pujian
KTT CPLP Hasilkan Sejumlah Draft Resolusi
Teacher brings Timor tale to life
Concluída em Dili a X Conferência dos CEG da CPLP
   Cimeira CPLP
Passos elogia Xanana
e fala em «nova fase» da nação timorense
Prof. Dr. Pe. Inocencio Piedade, SJ “Hatene lao ba oin, defikuldade laos importante.”
Aqui também se fala português Apenas 56,1% fala, escreve e lê em tétum

sábado, 3 de Março de 2012

Uza lian materna lori hanorin iha ensinu pré-primáriu no tinan dahuluk primáriu (Perspetiva no dezafiu sira)

Husi *Hercus Pereira Santos

Iha ita-nia rai laran mosu diskusaun ne’ebé maka manas tebes aleinde eleisaun prezidensiál no lejizlativa maka konabá polítika ne’ebé atu uza lian materna lori hanorin iha pré-primáriu no iha possibilidade atu kontinua ba tinan dahuluk ensinu primáriu nian.

Polítika ne’e hahú uluk ho projeitu pilotu ba distritu tolu maka hanesan Lautem, Manatutu, no Oekusi.

Atu hatan ba hanoin no preokupasaun maluk balu sira nian ne’ebé maka interesante ha’u tenta hafahe ha’u-nia hanoin sira naklibur sai ba buat ne’ebé ha’u hanaran ukun-fuan báziku sira lori kompreende polítika uza lian materna lori hanorin iha ensinu pré-primáriu no tinan dahuluk primáriu hanesan tuir mai.

Ukun-fuan dahuluk: Ita presiza la bele kahur sasan sira entre ensinu pré-primáriu no tinan dahuluk primáriu nian ho konseitu aas sira.

Maluk balu kuandu ko’alia konabá polítika uza lian materna iha ensinu pré-primária no iha tinan dahuluk ensinu primáriu nian sira iha liu tendénsia lori halai liu ba hanoin konseitu ne’ebé maka aas liu no dala barak la kondiz ho nivel pré-primáriu no primáriu nian. Dala barak maluk sira ne’e uza fali terminolojia no konseitu ne’ebé sientífiku liu iha área estudu linguístika nian ou halai liu ba ba koñesimentu aas ne’ebé labarik sira seidauk iha biban lori estuda. Ita presiza la kahur sasan edukasaun pré-primária no tinan dahuluk primáriu nian ho edukasaun nível aas nian.

Ita bele uza matenek hanoin aas nian lori analiza kestaun ne’e maibé ita la bele hatama fali sasan husi ensinu aas nian atu sai hanesan tiha fali matéria ba labarik sira atu apreende no uza iha sira-nia prosesu aprendizajen nia laran. Ukun-fuan dahuluk ne’e hanesan “sine qua non”. Se ita la simu ukun-fuan ne’e ita sei lakon leet de’it tempu lori debate ba kestaun uza lian materna sai nu’udar lian instrusaun lori halai ba-mai de’it mas la kona ba ninia hun loloos.

Ukun-fuan daruak: Ita la bele kahur polítika edukasaun nian ho polítika linguístika nian

Ita presiza haketak polítika linguístika ho polítika edukasaun nian ein relasaun ho lian buat rua ne’e la hanesan. Maibe tebes duni sira kaet ba malu. Iha parte polítika edukasaun nian uza lian materna sai nu’udar lian instrusaun ba ensinu pré-primáriu no tinan dahuluk primáriu nian ne’e ninia objetivu maka buka ajuda labarik sira lee no hakerek atu sira sai kritivu liu iha sala laran ho sira-nia ambiente kulturál rasik, ho sira-nia realidade moris loron-loron rasik, ho sira-nia lian rasik ne’ebé sira moris mai uza nanis kedas ona iha sira-nia interesaun ho sira-nia família uma laran liu-liu inan ho aman no maun alin sira rasik. Labarik sei fasil liu atu sai kreativu iha sala laran bainhira lian instrusaun ne’e lian ne’ebé maka sira domina nanis ona husi uma mai. Hanesan buat ne’ebé maka ita-nia Primeiru Ministru hateten katak bainhira ita aplika lian materna ita fó kondisaun atu labarik sira aprende di’akliu no fasilita interesaun entre alunu ho profesór, alunu ho alunu no alunu ho komunidade. Hanoin hanesan ne’e tanba lian materna hanesan lian ne’ebé maka labarik sira domina di’ak tebes no fásil ba sira atu uza iha sala laran no sira sei senti “ a vontade” hato’o sira-nia hanoin tanba sira halo parte ba ambiente ida-ne’ebé familiar nanis ona ba sira. Tanba lian materna ne’e hanesan W. Mackey (1992) ninia definisaun ne’ebé nia bazeia ba nasaun sira-ne’ebé maka nia halo ninia estudu ba lori hamosu kritériu tolu hanesan tuir mai: primazia, lian dahuluk ne’ebé ita aprende no kompreende (Kanadá), domíniu, lian ne’ebé maka ita domina di’akliu (Suisa), assosiasaun, pertense ba grupu kulturál ou étniku balu (Áustria).

Iha parte ida-ne’e maka profesór sira tenki uza métodu ida-ne’ebé fó-biban atu labarik sira bele kretitvu duni iha sala laran. Ita sei bele hadook an husi métodu antigu ne’ebé maka halo labarik sira memoriza de’it sasan sira sein hatene sasan ne’e rasik saída. Mentalidade memoriza ne’e di’ak no labarik ho idade ki’ik iha kapasidade boot atu memoriza sasan sira maibé infelizmente sira la hatene arti ou sentidu reál husi buat ne’ebé maka sira aprende ne’e. Ema hotu simu katak komprensaun ba buat ida importante liu duké memoriza sasan sira tanba fásil lalais tebes atu haluhan fali. Komprensaun lae, nia sei kontinua moris no bele hamosu kbiit interpretasaun nian. Pedagogu sira iha tempu antigu sira-nia funsaun maka lori labarik sira ba eskola katak lori ba soi matenek ka koñesimentu.

Tanba ne’e maka ita presiza buka uza métodu pedagójiku ida-ne’ebé maka bele lori labarik sira ba koñesimentu ne’ebé maka sólidu. La bele ohin “hafal” aban haluhan. Nu’udar Carol Benson, Ph.D hateten katak “instrusaun liuhusi lian ida-ne’ebé maka alunu sira la ko’alia hanaran “imersaun” (Skutnabb-Kangas 2000) hanesan ita hatama labarik ba bee laran sein hanorin uluk nia nani. Maibé iha parte ida-ne’e ha’u-nia hanoin lian materna la’ós fatór úniku biar nia sai nu’udar fatór dahuluk atu labarik sira bele hetan matenek ne’ebé maka di’akliu no sólidu. Fatór daruak maka profesór tenki domina métodu ne’ebé maka bele lori labarik sira hetan matenek ho di’ak. Sein métodu profesór hanesan ema ne’ebé lakon dalan no lahatene atu lori labarik sira atu ba ne’ebé ou hanesan ema ne’ebé la’o iha dalan nakukun ne’ebé la’o lori si’ik-si’ik de’it dalan no ne’e la ajuda dezenvolvimentu labarik nian ou halo dezenvolvimentu labarik nian la’o “macet” hela de’it. Iha parte ida-ne’e maka formasaun pedagójiku importante tebes atu evita profesór sira hanorin “asal-asalan”. Fatór datoluk maka ema sira-ne’ebé hanorin presiza hatene mós maka psikolojia edukasaun nian hamutuk lori apreende mós psikolojia labarik sira nian. Pelumenus profesór sira hetan netik koñesimentu báziku ba área sira-ne’e lori hatene oinsá maka enfrenta ho labarik sira iha sala laran. Oinsá maka trata labarik sira ho di’ak no loos. Satan idade nurak labarik sira nian ne’e sensitivu tebes. Buat ne’ebé maka sira aprende husi hanorin na’in sira inklui liafuan no hahalok sira sei influénsia ba sira-nia intelijénsia, modu hanoin no komportamentu iha futuru (iha-ne’e família maka soi papél importante liu). Bazeia ba fatór daruak no datoluk maka kuandu ita hanoin katak kualkér ema ida bele hanorin naran katak nia hatene lian (fatór dahuluk) la to’o. Fatór tolu ne’e ha’u hanaran fatór internu katak fatór ne’ebé depende ba kapasidade profesór sira nian. Ita presiza maka formasaun atu profesór sira bele soi kapasidade sira ne’e ho di’ak. Kapasidade sira-ne’e ita la haree ho matan maibé ita bele sukat ho sasukat sira-ne’ebé lori ita hatene profesór sira-nia kapasidade ho nune’e ita bele hadi’a no aprefeisoa liután.

Maibé biar profesór di’ak ida no nia soi matenek aas no koñesimentu kle’an tebes iha ninia área nia sei la halo buat ida ou pelemunus nia sei hetan difikuldade iha ninia knaar hanorin nian se la eziste fatór sira hanesan tuir mai ne’e ne’ebé ha’u hanaran fatór esternu. Fatór esternu dahuluk maka maka qualidade materiál didátiku nian inklui sasan sira-ne’ebé nesesáriu lori ajuda labarik sira-nia estudu. Fatór daruak maka kondisaun fíziku eskola nian inklui kadeira, meja, ahi, bee, nsst. Fatór datoluk maka fatin no ambiénte ba eskola. Fatin no ambiénte eskola nian mós sai nu’udar fatór importante ida atu lori haree. Eskola ida porezemplu la bele harii besik fali merkadu ou kampu tebe bola nian. Se lae estraga de’it konsentrasaun alunu ho profesór sira nian. Fatór dahaat maka hanesan fatór ikus nian husi fatór esternu maibé fundamental tebes atu insentivu kualidade hanorin profesór sira nian ho di’ak. Maka fatór bein-estar profesór sira nian. Iha-ne’e inklui saláriu ne’ebé sufisiénte ba profesór sira. Kondisaun ekonomia profesór sira nian bele influénsia ba kualidade hanorin nian.

Atu atijnje taxa susesu eskolár husi polítika edukasaun nian mínimu liu ona maka ita presiza haree netik mós fatór sira hanesan ha’u temi iha leten ne’e.

Enkuantu polítika linguístika nian oin seluk fali maka oinsá atu prezerva, dezenvolve no haberan lian. Atu dezenvolve lian ida dalaruma linguístika sira rasik iha hanoin ne’ebé maka oioin. Ne’e maka natureza ita ema nian sempre iha hanoin ne’ebé maka la hanesan. Iha-ne’e maka papél estadu nian importante tebes atu interven hanesan dalan ida husi dalan sira seluk maka harii Instituisaun Nasionál Língístika (INL) hanesan oras ne’e daudaun ita soi tiha ona atu lori hala’o knaar sira-ne’e. Maibé estadu rasik liu-liu orgaun ezekutivu maka governu liuhusi ministériu ne’ebé tutela ba knaar ne’e tenki fó kondisaun hotu-hotu atu INL bele hala’o ninia knaar sira ho di’ak liután. Tanba oras ne’e daudaun tuir buat ne’ebé maka ita haree iha realidade INL seidauk hala’o ninia knaar ho másimu. Ita haree hanesan atividade INL nian la’o neineik liu. Ha’u lalika ko’alia halai liu ba dezenvolve lian nasionál sira seluk. Ha’u fó ezemplu lian nasionál no ofisiál ida seluk maka tetun ninia sosializasaun seidauk másimu.

Tebes duni, ita hahii knaar INL nian ne’ebé ho matenek no esforsu tomak hamosu ona Matadalan Ortográfiku ba Tetun Nasionál no Hakerek Tetun tuir Banati. Maibé ita presiza sosializaun liután atu tetun padraun ne’e bele naklekar no hetan duni abut iha sosiedade nia laran liuhusi “prática de uso” iha moris loron-loron nian. Atu to’o iha realidade ne’e ha’u hanoin no urjente tebes atu governu hanoin ona oinsá harii Departamentu Lian Tetun nian iha Fakuldade Siénsia Edukasaun (futuru Fakuldade Edukasaun, Arte no Umanidade) iha Universidade Nasionál Timor Lorosa’e nia laran ne’ebé bele halo parseria diretamente ho INL. Aleinde bele lori halo formasaun ba profesór lian tetun nian para hanorin iha eskola sira hotu iha rai laran tomak, departamentu ne’e bele sai mos hanesan fatin ida iha-ne’ebé insentiva estudante hamutuk ho profesór sira buka hakerek daudaun ona buat ruma konabá ita-nia lian lokál sira inkluindu ita-nia kultura, arte no literatura sira. Ita presiza hahú insentiva ona atu profesór universitáriu sira hakerek. Fó sira lisensa sabátika atu lori halo peskiza profunda ruma lori eleva sira-nia nivel karreira no matenek, iha tempu hanesan, ne’e hanesan dalan ida sira fornese mós materiál ho kualidade di’ak ba komunidade akadémika.

Kuandu ita hahú buat sira ne’e sei hetan difikuldade iha tinan dahuluk sira maibé kuandu nia la’o biar karik ho neineik (karik ne’e maka akontese ba INL) ita sei komesa haree ona susesu, fallansu no frakeza sira atu lori hadi’a liután. Ha’u hanoin katak só iha mundu akadémiku maka ita bele halo debate no troka hanoin ba malu no halo kontribuisaun lori dezenvolve ita-nia lian lokál sira (inklui área sira seluk mós). Iha-ne’e la to’o atu departamentu ne’ebé assume papél ne’e hanesan oras ne’e la’o hela daudaun maka husi departamentu lian portugés ou departamentu lian inglés tanba iha departamentu rua ne’e sira-nia atensaun ba lian lokál sira ladun másimu. Se ita iha duni hanoin lori hametin ita-nia lian lokál sira atu la bele lakon no haberan tan lian tetun ninia kualidade maka urjente tebes duni ona atu harii departamentu lian tetun nian.

Importante maka INL halo kolaborasaun ho jornalista sira. Papél jornalista sira nian importante tebes atu promove hakerek tetun ho di’ak (kazu tetun nian presiza habelar liután formasaun ne’ebé maka INL halo hela daudaun ba jornalista sira). Agora kuandu ein relasaun ho lian lokál sira ita presiza ona mós atu hanoin programa ruma ne’ebé maka relevante. Enkuantu iha futuru lian lokál sira idak-idak soi ona ninia gramátika no disionáriu ne’ebé sai nu’udar padraun lori uza maka ita presiza mós hahú hanoin mós atu iha komunidade linguístika sira idak-idak bele soi mós jornál aleinde hafahe informasaun ba komunidade maka hanesan dalan ida lori promove lian sira-ne’e.

Ba momentu agora daudaun ein relasaun ho lian tetun maka ita hahii duni hanoin husi INl nian ne’ebé maka lori fó sai ba públiku katak “média” soi knaar lori divulga tetun. Hanoin ne’ebé maka matenek tanba konsiente ba importánsia papél média nian iha sosiedade nia laran. Maibé ita mós la bele haluhan katak ita-nia média sira balu sei presiza apoiu atu sira bele hala’o sira-nia knaar jornalista nian ba oin. Katak média sira presiza insentivu finanseiru ruma ou modu ruma (nu’udar ezemplu ida de’it orgaun estadu nian balu hola sira-nia jornál) ne’ebé bele ajuda sira taka sira-nia despeza husi produsaun nian. Tanba ne’e estadu presiza halo kolaborasaun ho subriña “média” sira nian ne’ebé maka iha. Lori identifika problema saída maka média sira hasoru no estabelese kritériu balu hanesan pré-rekezitu lori hetan apoiu husi estadu. Apoiu ne’e tenki mai husi Prezidénsia Repúblika atu garante imparsialidade média nian ou bele mai husi governu naran katak imparsialidade média nian la bele fa’an lori hetan apoiu. Média tenki independente. Tanba ha’u haree iha realidade jornál di’ak balu “gulung tikar” tanba de’it problema finanseiru. Ou balu iha hela situasaun “agonia” nia laran.

Iha nasaun boot sira ita la susar hetan jornál balu ne’ebé maka gratuita. Porezemplu hanesan iha Portugál iha jornál sira hanesan destak, negócios, económico, nsst, ema sira ba tau iha “stand” públiku sira liu-liu hanesan estasaun komboiu sira (iha Lisboa) ou hanesan iha Universidade do Minho sira tau iha kantina sira atu ema bele livre lori foti. Realidade ne’e karik akontese iha ensinu superiór sira hotu iha Portugal laran. Tanba sira hatene no konsiente katak informasaun ne’e importante tebes.

Importante mós maka estadu loke dalan atu harii fatin ruma lori halo publikasaun ba livru sira atu nune’e hanesan dalan ida lori insentiva públiku sira hakerek ou halo tradusaun husi livru importante sira iha mundu akadémiku nian. Husi ne’e maka aleinde habelar lian ninia uzu iha tempu hanesan dalan importante tebes lori hafahe koñesimentu no informasaun ba sosiedade nia laran. Tebes duni hanoin hanesan iha leten ne’e karik mehi ida no lori tempu no esforsu atu realiza. Maibé ne’e dalan prinsipál tebes tanba tempu ohin loron nian matenek maka kbiit (Alvin Toffler). Ita sei la laran rua-rua lori dehan katak importante tebes atu sosiedade hetan matenek no informasaun lori ajuda ninia dezenvolvimentu.

Agora maluk sira-ne’ebé sai pioneiru ba polítika uza lian materna sai nu’udar lian instrusaun ba ensinu pré-primáriu no tinan dahuluk primáriu nian tenki tau iha konsiderasaun preokupasaun populasaun nian konabá kualidade lian materna lori hamosu daudaun ona gramátika, disionáriu ruma atu sai nu’udar mata-dalan lori hakerek lian sira-ne’ebé maka atu uza lori hanorin ba labarik sira ho «di’ak no loos». Ha’u hakerek entre aspas tanba buat ida di’ak no loos ba momentu agora sei nakloke atu lori hadi’a ou nia atu sai di’ak no loos ou sai diakliu ou loos liu iha tempu oin mai. Lian buat ida dinámika tebes. Sempre nakloke ba transformasaun no mudansa tuir situasaun tempu nian. Tanba lian ne’e hanesan Valter Tauli hateten katak “instrumentu ida-ne’ebé bele halo avaliasaun, altera, korrije, regula, hadi’a di’ak liután….”. Tanba ne’e harii Departamentu Lian Tetun importante tebes atu bele fó mós kontribuisaun ba knaar sira hanesan iha leten ne’e ho kolaborasaun hamutuk ho INL.

Maibé tebes duni bainhira ko’alia konabá lian sempre halai direta ou indiretamente ba polítika linguístika. Hanesan uza lian materna lori hanorin ne’e nu’udar dalan ida husi polítika linguístika mós lori prezerva, dezenvolve no haberan lian ninia kualidade. Iha polítika rua maka ita hetan iha-ne’e. Polítika edukasaun nian ho polítika linguístika nian. Polítika edukasaun nian atu hetan susesu eskolár ba labarik sira-nia estudu no iha polítika linguístika nian maka uza lian materna lori sai nu’udar lian instrusaun hanesan dalan ida ona lori prezerva no dezenvolve lian sira-ne’e ho di’ak liután.

Iha polítika edukasaun nian maka ita tenki tau iha hanoin no bazeia ba ita-nia lei inan ne’ebé prevee nanis kedas ona iha artigu 59 liu-liu alínea 2 ne’ebé hateten “ema hotu-hotu iha direitu atu hetan oportunidade ba ensinu no formasaun profisionál hanesan” (CRDTL-Anotada). Ne’e katak edukasaun tenki hanesan ba ema hotu-hotu. La bele esklui labarik sira husi sira-nia direitu atu hetan edukasaun. Sein kualkér motivu. Tanba ne’e maka ita presiza hanoin mós ba labarik defisiente sira ne’ebé maka matan aat ou tilun diuk sira-nia edukasaun oinsá? Matéria didátiku ho maneira oinsá maka ajuda sira bele aprende ho fasilidade iha sira-nia prosesu aprendizajen? Kestaun ida seluk atu tau iha hanoin maka iha komunidade sira-ne’ebé maka sai nu’udar komunidade multi-linguístika katak iha komunidade sira-ne’e soi lian liu husi ida. Nu’udar ezemplu de’it iha sidade Díli laran ema mai husi lian oioin. Lian mambae, lian fatuluku, lian nauweti, lian kemak, lian makasae, nsst. Lian oioin sira-ne’e sira uza iha sira-nia família uma laran ou entre lubun uma kain sira. Sira-nia oan sira-nia eskola oinsá? Karik sei identifika alunu pré-primária sira ne’e mai husi lian saída-saída de’it depois koloka profesór sira tuir lian ne’ebé maka iha? Ou kuandu atu simu alunu sira determina kedas ona katak iha pré-primáriu A simu alunu sira husi lian mambae; pré-primária B simu alunu husi lian fatuluku, nsst? Karik hala’o tuir ida ikus ne’e iha duni perigu ba hamosu dalan ba konflitu entre komunidade lian sira-ne’ebé la hanesan. Iha ne’e liu-liu tanba kuandu mosu tentasaun monu ba sentimentu orgullu demais ou sentimentu superioridade lori haree lian sira seluk la vale ita bele monu duni ba konflitu bazeia ba lian (husi parte ida-ne’e ita sei bá haree iha ukun-fuan ikus nian; ukun-fuan daneen).

Ukun-fuan datoluk: Ita la bele loke dalan atu hamosu “gab” ba jerasaun futuru

Kestaun ida seluk tenki haree mós maka oinsá la bele kria “gab” entre labarik sira-ne’ebé sira-nia inan-aman iha uma laran ko’alia ho lian inglés ou lian portugés ho labarik sira seluk. Ita keta haluhan katak ohin loron inan-aman lubuk ida ona biar sei minoria maibé hahú ko’alia ona ida husi lian rua ne’e ba sira-nia oan. Ou oan husi inan ou aman ema husi dalen portugés ou inglés. Ne’e katak labarik sira ne’e sira-nia lian materna maka lian portugés ou lian inglés. Ita bele dehan katak labarik sira ne’ebé ho lian materna portugés ou inglés sei hetan kondisaun ne’ebé maka di’akliu iha sira-nia prosesu aprendizajen no sira-nia intelijénsia no koñesimentu ba matenek sei avansa liu ba oin. Tanba lian rua ne’e soi liu materiál didátiku barak no ho kualidade inklui profesór ho kualidade hatene hanorin no insentiva labarik sira-nia matenek. Ho nune’e sei loke dalan hamosu diferensa boot entre jerasaun labarik sira-ne’ebé sira-nia lian materna maka lian rai laran ho labarik sira-ne’ebé maka sira-nia lian materna maka lian inglés ou lian portugés. Se sira-nia lian materna maka inglés ou portugés karik depois sira remata tiha pré-primáriu sira sei kontinua ba ne’ebé? Ba International School ruma ou ba eskola portugeza? Ne’e la’os katak sira sei hetan liu previléjiu ba edukasaun? Karik jerasaun rua ne’e kuandu hasoru malu iha nivel ensinu balu hanesan ou iha primáriu, pré-sekundáriu, sekundáriu ou iha universidade sei iha posibilidade boot atu jerasaun lian materna maka lian rai laran sei ladun iha kbiit natón lori kompete ho jerasaun ne’ebé maka lian materna maka lian inglés ou lian portugés.

Fenómenu ne’e la’ós hatudu katak ita kria daudaun hela ona prosesu ida lori hamosu “gab” ba jerasaun futuru? Ita la’ós haketak hela daudaun ona jerasaun futuru? Ou karik ida-ne’e maka ita mehi lori harii ita-nia nasaun? Ha’u fiar metin katak lae! Maibé mós ita tenki tau iha hanoin Timor-Leste la bele kria kondisaun atu hamosu dalan ba grupu balun de’it maka hetan liu asesu ba edukasaun di’ak. Kuidadu mós ba maluk sira ne’ebé tebe rai lori aprende lian rai laran de’it. Haree lian rai liur hanesan fali poténsia ba neo-kolonizasaun tanba iha ema balu bele uza sentimentu hadomi kultura rai laran hanesan lasu ida atu ita tau de’it matan ba ita-nia lian rai laran nian lori haluhan tiha fali katak moris agora iha tempu modernu, iha era globalizasaun nian no ita presiza mós hatene lian ne’ebé maka bele lori ita ba soi koñesimentu iha área oioin matenek nian. Ita presiza akumula buat rua ne’e. Hadomi no hamriik metin iha ita-nia lian rasik hanesan dalan lori prezerva ita-nia kultura, lisan no Istória mas ita mós presiza loke an lori simu no aprende lian husi rai liur atu sai hanesan dalan ida lori ita ba hetan matenek iha área oioin ne’ebé bele muda ita-nia moris no lori hadi’a no foti ita-nia rain.

Oinsá ho maluk sira-ne’ebé maka sira-nia lian materna maka lian indonézia? Ita keta haluhan katak iha labarik sira ne’ebé maka inan ou aman husi Indonézia no sira-nia lian materna maka lian indonézia. Oinsá ho sira-nia estudu? Ita presiza haree sasan sira-ne’e hotu ho di’ak. Karik iha mós ezemplu seluk.

Ukun-fuan dahaat: Polítika nasaun nian bazeia ba objetivu no realidade Istórika idak-idak nian.
Iha ema balu sujere sira-nia ideia atu tau lian materna sai hanesan de’it dixiplina ida nu’udar lian lokál lori hanorin iha eskola sira hanesan buat ne’ebé maka Indonézia sira halo iha tempu okupasaun nian. Mai ha’u ideia hanesan ne’e di’ak mós maibé iha Istória no objetivu maka la hanesan. Indonézia rasik molok Ukun Rasik An iha 1928 liuhusi juventude lubun balu sira deklara nanis ona katak Indonézia Independente sira-nia lian maka Lian Indonézia(melaiu) ne’ebé ninia orijin mai husi Riau. Sira hakotu kedas ligasaun ho lia-olandés nian lori la uza tan ona nia sai nu’udar lian ofisiál. Hanesan forma ida lori kontra kolonializmu. Hanesan sira temi iha sira-nia “Undang-Undang Dasar 1945” kolonizasaun tenki hamoos iha mundu rai-klaran. Ne’e realidade polítika sira nian. Sira-nia objetivu maka haberan, hadi’a no habelar lian melaiu (lori hanaran sai Lian Indonézia) ninia kualidade. Malaiu ne’ebé hakerek ho alfabetu adaptadu husi árabe nakfilak uza fali ortografia latina ne’ebé halo husi C. Van Ophuysen iha tinan 1901. No iha 1941 sira hamosu “Komisi Bahasa Indonesia” lori halo peskiza ba gramátika no liafuan sira ba lian indonézia ne’e. Sira-nia polítika maka buka uluk liafuan sira husi lian sira seluk ne’ebé maka sira iha ou hili liafuan balu husi nasaun aziátika nian sira. Hili liafuan husi lian internasionál europeiu nian maka opsaun ikus liu. Ne’e tanba ita bele haree momoos kedas katak hanesan Professor Geofrey Hull hateten olandés sira la habelar sira-nia lian no kultura ba ema rai na’in sira. Olandés sira taka an tebes. Enkuantu sira sai husi Indonézia, Indonézia nia lian sira la hetan influénsia maka’as nein sira-nia toman moris nian ou sira-nia relijiaun hetan abut iha sosiedade Indonézia nia laran.

Enkuantu ita, iha Timor-Leste, molok ukun an partidu sira hotu ne’ebé maka moris iha tempu 1974-75 hakarak prezerva nafatin lia-portugés iha sosiedade timorense nia laran. Liu-liu partidu sira-ne’ebé hakarak Ukun Rasik An hanesan Fretilin (Ukun rasik an kedas ona) ho UDT (Ukun rasik an ho etapa) hateten momoos kedas katak lian portugés sei sai nu’udar lian ofisiál ba Timor Independente lori halo parte mós ba Komunidade Dalen Ofisiál Lian Portugés nian. Mehi ne’e realiza duni hafoin okupasaun Indonézia nian remata. Ita-nia polítika maka hatuur kedas Lian Portugés nu’udar ida husi lian ofisiál iha ita-nia lei-inan. Tanba portugés sira husik sira-nia toman moris nian inklui ai-han, suku, dansa, múzika, relijiaun no lian ba ema rai na’in sira aprende. Pelomenus husi pontudevista linguístika nian lian portugés ninia liafuan sira kahur malu ho lian tetun-terik lori hamosu lian foun ida maka lian tetun ida ne’ebé sai nu’udar lian franka depois nakfilak sai nu’udar lian ko-ofisiál ida iha ita-nia nasaun foun ne’e. Iha ne’e liu-liu tanba iha kaben malu entre lian tetun terik ho lian portugés akontese ho naturál tebes. Lian tetun ida agora oin seluk tebes husi lian tetun terik no nia soi léksiku husi lian portugés maka’as tebes. Ita-nia polítika linguítika hatuur nanis ona husi INL katak fonte leksikál dahuluk no prinsipál ba lian tetun maka mai husi lian portugés no ortografia tetun nian balu mós bazeia ba lian europeia nian (lian portugés lori muda tuir de’it son ba tetun no iha liafuan balu ninia hakerek adota tuir lian kastellanu nian). Tanba ne’e hanoin lori halo tuir nasaun Indonézia nian konabá uza lian nu’udar matéria ida iha ensinu nia laran presiza haree diadi’ak husi pontudevista Istóriku, polítika no objetivu.

Iha realidade Istórika ida-ne’e hatudu mai ita katak ita halo desizaun polítika la hanesan ho Indonézia sira. Kuandu ita uza lian materna sai nu’udar lian instrusaun ba ensinu pré-primáriu no tinan dahuluk primáriu nian ne’e mós tanba ita-nia polítika la hanesan. Nu’udar estadu soberanu, ukun na’in sira ne’ebé maka hetan lejitimasaun liuhusi eleisaun iha beran (poder) lori determina ita-nia polítika hotu-hotu inkluindu polítika uza lian materna nu’udar lian instrusaun ba ensinu pré-primáriu no tinan dahuluk primáriu nian. Importante iha-ne’e maka ukun na’in sira presiza sosializa no loke debate lori halibur hanoin sira-ne’ebé maka di’akliu. Maibé ita la bele lori Indonézia ninia polítika lori tau fali mai ita. Ita la bele halo tuir Indonézia sira tanba idak-idak ho ninia polítika rasik. Indonézia hanoin katak halo sai de’it lian lokál sira nu’udar dixiplina tanba sira haree karik ida-ne’e maka fó liu vantajen ruma diak ba sira. Enkuantu ita fali ita haree katak uza lian materna sai nu’udar lian instrusaun iha ensinu pré-primariu no tinan dahuluk primáriu nian tanba sei ajuda liu labarik sira aprende lee no hakerek ho lalais liu no ajuda sira bele sai kreativu iha interesaun sira nian ho profesór sira iha sala laran tanba uza lian ne’ebé sira hatene nanis kedas ona husi uma laran. Lori halo sira hetan baze ida sólidu iha intelijénsia kakutak nian atu bele hetan susesu eskolár iha sira-nia vida akadémika nian. Konkluzaun katak objetivu husi polítika Indonézia nian ho Timor-Leste nian la hanesan.

Iha kestaun ida-ne’e kuidadu mós ba maluk hirak ne’ebé maka sai responsável ba polítika uza lian materna ba ensinu pré-primáriu no tinan dahuluk primáriu nian atu la bele uza realidade susesu no insusesu husi rai liur nian lori tau loloos tiha de’it mai ita nian. Nasaun idak-idak ho ninia partikularidade Istóriku no kulturál rasik. Nasaun sira seluk bele sai de’it nu’udar ezemplu ida ba ita. Ita maka determina ita nian rasik tuir ita-nia realidade rasik lori alkansa objetivu ne’ebé maka ita hakarak hetan.

Ukun-fuan dalimak: Siénsia no koñesimentu inklui lian buat ida dinámika

Atu dezenvolve buat ida ita tenki hahú. Ita hahú tenki tuir prosesu naturál sasan nian ou katak “segundo o processo natural das coisas”. Buat ida sei la la’o sei ita la hahú halo nia la’o. Maibé ita halo nia la’o tenki tuir prosesu ne’ebé maka naturál. Bebé ida kuandu to’o iha idade atu la’o nian nia buka tenta atu la’o. Família sira sei ajuda kaer nia liman lori halo nia koko lori la’o.

Iha kestaun ida-ne’e ha’u hetan preokupasaun balu ne’ebé maka la gosta no la simu lori kestiona tanbasá maka Timor ne’e sempre nakonu ho projetu pilotu hela de’it. Preokupasaun iha-ne’e mosu se projetu pilotu hela de’it bainhira maka ita la’o ba oin. No maluk sira ne’e lakoi tebes atu halo projetu pilotu ba ita-nia rain.

Hanoin hanesan ne’e superfisialmente ita haree hanesan di’ak tebes. Maibé difísil iha realidade moris nian. Tanba iha siénsia no koñesimentu buat ida “instant” ou “langsung jadi” no “estátiku” la eziste. Buat ne’ebé maka eziste maka aperfeisoamentu. Ida hahú hamosu depois seluk sei aprofunda no aperfeisoa liután. Hahú daudaun ho buat ne’ebé maka iha. Tanba ho nune’e iha prosesu nia laran depois sei hamosu biban ida iha-ne’ebé kuandu ita iha ona kondisaun natón ita sei aperfeisoa nia di’akliután. Kuandu iha ona aperfeisoamentu ne’e sei kontinua iha ho mudansa dezenvolvimentu ne’ebé maka iha. Ne’e ba oin nafatin ona.

Siénsia no koñesimentu moris iha espíritu aperfeisoamentu nia laran. La iha espíritu ida-ne’e maka siénsia ho koñesimentu sofre estagnasaun no iha possibilidade boot atu lakon no mate inklui lian mós. Mai ha’u ida husi invensaun boot liu ita ema nian maka lian. Lian hanesan buat ida-ne’ebé dinámika tebes. Nia nakloke ba mudansa tuir tempu no situasaun komunidade linguístika ida nian. Importante tebes atu orgaun ne’ebé responsável ba lian tenki halo filtru tuir biban ne’ebé maka iha lori harii lian ninia padraun atu soi uniformalizasaun iha nivel eskrita nian lori satan husi ninia influénsia ne’ebé maka ladun di’ak bainhira influénsia sira atu harahun fali lian ne’e rasik. Maibé iha-ne’e ha’u-nia hanoin ne’e limite de’it ba lian nasionál ne’ebé ninia emar sira naklibur hamutuk iha espasu organizasaun teritoriál ida de’it nia laran. Iha nivel internasionál nian ita tenki haketak duni tanba dalabarak iha prosesu Istória pasadu nia laran buat barak haketak ita no lori halo lian idak-idak biar uluk hun ida de’it sai diferente fali tanba sofre influénsia husi fatór liur ne’ebé maka la hanesan ou sofre mudansa tuir idak-idak ninia realidade. Porezemplu iha-ne’e tetun ofisiál Timor-Leste sai diferente husi tetun Belu. Tetun rua ne’e la bele soi padarun ida de’it. Tanba idak-idak la’o dalan ketak-ketak ona.

Bazeia ba hanoin iha leten ne’e maka ha’u mós la simu Akordu Ortográfiku lian portugés nian (maibé ba desizaun polítika estadu nian ha’u nu’udar sidadaun hakruuk lori simu de’it no halo tuir de’it. Ha’u sempre haketak pontudevista pesoál husi desizaun estadu nian). Tanba lian ne’e mosu lori refere ba sasan ne’ebé ita haree no la haree tuir idak-idak ninia realidade. Biar lian ida de’it maibé ho realidade ne’ebé maka la hanesan ne’e maka sei influénsia ba konseitu balu ninia arti la hanesan entre nasaun sira-ne’ebé uza lian ida de’it ne’e. Inklui mós ba espresaun idiomátika sira no liafuan balu iha nasaun ida iha maibé ba nasaun seluk la iha. Sei iha mós pronúnsia ou logat ne’ebé maka la hanesan. Tanba lian ne’e dinámika tebes. Tanba ne’e atu hariku lian hanesan iha nivel internasionál nian di’akliu mai ha’u nasaun sira mantein idak-idak ninia estilu hakerek no ko’alia. Maibé iha espasu kloot nia laran hanesan entre rejiaun sira estadu ida-nia laran de’it di’ak tebes atu soi lian ninia padraun ida de’it atu la halo konfuzaun iha hakerek tanba ita-nia (povu husi komunidade línguístiku ida de’it maibé soi buat balu ne’ebé maka la hanesan) dependénsia iha moris loron-loron nian ne’ebé intensivu liu kompara ho nível entre nasaun nian. Porezemplu lian mambae entre maluk sira husi Ainaro, Ermera, Aileu iha nivel ko’alia idak-idak ko’alia tuir ninia realidade maibé importante mós atu buka tenta soi mambae ninia padraun hakerek nian ida de’it no iha tempu hanesan halo mós esplikasaun ba diferensa ruma ne’ebé maka lian ne’e soi iha rain sira ne’ebé maka ko’alia lian ne’e. Ne’e hanesan atu lori fasilita hakerek lian ho padraun ida de’it no iha tempu hanesan maluk sira husi lian ne’e maibé husi fatin la hanesan bele entende malu di’ak liután iha sira-nia konversasaun loron-loron nian.

Tentativa sira hotu ne’e, hanesan ha’u hateten tiha ona iha leten, katak lian ne’e dinámika no ita ema bele inventa naran katak tuir prosesu orden naturál sasan nian. Naran katak ema lubun barak maka soi lian ne’e no hotu-hotu simu lori aplika iha ninia moris loron-loron nian. Invensaun iha-ne’e invensaun ne’ebé respeita nesesidade naturál ema lubun ida nian. Nunka bele halo invensaun artifisál ba lian ida lori obriga komunidade sira simu afinál komunidade rasik la iha nesesidade no la preparadu atu simu. Ezemplu husi ne’e maka Ludwik Lejzer Zamenhof médiku poláku ida tenta inventa lian artifisiál ida ho naran esperanto no nia hahú publika versaun inisiál husi lian ne’e iha tinan 1887 atu sai lian franka ba mundu internasionál. Maibé iha realidade esperanto nunka bele hetan kbiit lori sai lian franka ba komunidade internasionál sira nian hotu. Tanba lian ne’e rasik hamosu liuhusi invensaun ne’ebé artifisál liu. Biar nasaun balu maka simu no ema barak uza lian ne’e nu’udar lian franka maibé lian ne’ebé maka sai lian franka prinsipál liu ba komunidade internasionál sira maka inglés. Inglés adota nu’udar ida husi lian ofisiál ba Klibur Nasaun Sira (Nações Unidas). Iha nasaun ne’ebé-ne’ebé de’it simu inglés no hanorin lian ne’e atu bele komunika ho ema husi lian sira-ne’ebé la hanesan husi nasaun sira iha mundu ne’e. Importante husi ezemplu sira iha leten ne’e maka ita hahú halo no hadi’a sasan sira-ne’e daudaun no ho tempu ita ema sempre iha espíritu lori hadi’a atu nia sai di’ak liután lori responde realidade ne’ebé maka ita hasoru ou iha. Naran katak buat hotu-hotu tenki naturál no ema hotu-hotu sinte nesidade lori uza lian ne’e no ita nunka bele impoen se iha baze ema barak la simu.

Kazu ba lian materna sai nu’udar lian instrusaun ba ensinu pré-primáriu ou tinan dahuluk primáriu mós sei akontese prosesu ne’ebé maka hanesan. Responsável ba polítika ne’e iha intensaun lori hasae taxa susesu eskolár labarik sira nian. Ita koko hahú hala’o tok polítika ne’e. Sinál husi susesu polítika ne’e nian maka se iha aplikasaun iha baze maka buat hotu la’o ho di’ak no hetan duni rezultadu di’ak liuhusi taxa susesu eskolár labarik nian sa’e ne’e katak labarik no komunidade sira simu polítika uza lian materna nu’udar lian instrusaun nian biar matenek na’in balu la simu. Maibé se kazu kontráriu responsável husi polítika ne’e tenki simu realidade ne’e lori hapara polítika ne’e no Estadu liu-liu governu nu’udar orgaun estadu nian ne’ebé maka responsável ba ezekusaun planu dezenvolvimentu nasionál nian tenki kuidadu liután lori haree di’adi’ak no ho rigór tebes atu lori halo polítika foun ida para atinje duni objetivu hasa’e taxa susesu eskolár labarik sira nian.

Taxa susesu eskolár ne’e hanesan objetivu ida “harga mati” atu atinje. Ho nune’e maka ita presiza hahú halo buat ruma lori atinje objetivu ne’e maibé mós tenki sai naturál katak tenki tuir orden naturál sasan nian. La bele iha invensaun artifisiál liu se la lori susesu ba labarik sira no se komunidade sira la simu. Polítika ne’e depende ba reasaun husi komunidade sira liuhusi labarik sira-nia susesu eskolár nian. Se la hetan susesu entaun responsável husi polítika ne’e la bele impoen tan. Tanba ne’e hatudu momoos ona katak buat ne’e komunidade sira la simu. Maibé naran katak ita hahú halo buat ruma tanba husi ne’e maka ita sei hadi’a ou hasai ou bele mós troka. Husi realidade maka ita aprende liután lori halo sasan sira sai di’ak liután. Tanba ne’e maka importante maka ita hahú.

Ukun-fuan daneen: Konflitu étniku la mosu husi diferensa lian maibé husi sentimentu superioridade étniku ne’ebé maka demais liu.

Iha ema balu hanoin fali katak uza lian materna lori hanorin iha pré-primáriu no tinan dahuluk primáriu nian sei hamosu konflitu étniku ou sukuizmu. Hanoin hanesan ne’e hau hanaran hanoin lori buka lia. Lia la iha ita buka halo lia. Ema sira hanoin hanesan ne’e ha’u haree sira tauk lori afirma sira-nia identidade linguístika iha sosiedade nia laran. Lian nunka bele sai instrumentu lori hafahe ita. Se ita iha lian barak ne’e rikusoin ida. Ou ita hakarak nega ita realidade? Ita-nia realidade hatudu momoos katak ita soi lian barak. Realidade ida-ne’e la’ós sai nu’udar fatór ba konflitu étniku ou konflitu sukuizmu. Saída maka sai nu’udar fatór ba konflitu étniku ou sukuizmu maka ita-nia sentimentu superioridade husi étniku ida lori haree étniku seluk la vale. Ita-nia etnia maka di’akliu sira nian. Sentimentu superioridade étniku ida iha parte ida di’ak katak ita orgullu ho ita-nia etnia buat ida la di’ak maka kuandu ita “over-acting” lori trosa no ataka etnia sira seluk. Hahalok hanesan ne’e maka hamosu neineik ou kleur kontra atake husi parte seluk mós ba ita. Ida-ne’e maka dalan hamosu konflitu etnia ou sukuizmu la’ós lian.

Ba ema sira-ne’ebé maka iha sentimentu hanesan ne’e presiza maka halo edukasaun sívika ou tuir relijiaun-morál lori ajuda nia haree mundu ne’e la’ós kór ida de’it. Mundu ne’e iha kór oioin. Iha kultura oioin. Iha lisan oioin. Iha fiar oioin no iha lian oioin. Iha buat oioin iha mundu ne’e maka halo mundu ne’e furak. Ita presiza moris lori simu realidade ne’e. No nasaun Timor-Leste mós hanesan. Ita soi buat oioin ne’ebé maka di’ak; lisan oioin, fiar oioin no lian oioin. No buat sira-ne’e tenki sai nu’udar riku soin ita Timor-Leste nian. Entre ita timoroan ita soi diferensa lubun ida maibé ita presiza tau iha hanoin katak buat oioin ne’e halo parte ba na’in ida de’it maka Timor-Leste. Uma ida de’it maka uma Timor-Leste. Tanba ne’e buat ne’ebé maka ita presiza halo maka oinsá iha kuríkulu edukasaun nian tenki tau mós matéria ruma ne’ebé ajuda atinje objetivu sira hanesan espíritu nasionalizmu, patritizmu no unidade nasionál nian.

Estudante de Direito da Universidade do Minho no revizór ba tetun husi Konstituisaun Anotada Repúblika Demokrátika Timor-Leste.

Bibliografia

Livros

Calves, Louis-Jean – «As políticas linguísticas», Parábola Editorial, São Paulo, 2007.
Hull, Geoffrey – «Timor-Leste. Identidade, língua e política educacional», edição Instituo Camões.
Toffler, Alvin – «Os nossos poderes», Lisboa, 1991.
Fairclough, Norman - «Language and power», London, 1989.

Dissertação

Santos, Ana Sofia R. O ensino da língua portuguesa em Timor-Leste: o método “Português em Timor” e a importância do tétum (L1) na aquisação do português (L2).

Internet

http://webzoom.freewebs.com/jpesperanca/ling_timor.pdf

Sem comentários:

Enviar um comentário

Nota: só um membro deste blogue pode publicar um comentário.


who's online