VISAO MISAO OBJECTIVO SPORTIMOR FH KKN HOME FH LPV ARTIGOS FH MUZIKA LIA MENON FH RESPONDE

terça-feira, 6 de março de 2012

Dekretu ne’ebé aprova Lutu Nasionál ba Señór Francisco Xavier do Amaral nia mate

KOMUNIKADU IMPRENSA

Sorumutu estraordinária Konsellu Ministru 6 Marsu 2012

Konsellu Ministru hala’o soru-mutu estraordináriu ohin tersa-feira, loron 6 fulan Marsu tinan 2012, iha sala Sorumutu Konsellu Ministru nian, iha Palásiu Governu, iha Díli, no aprova ona:

1. Dekretu ne’ebé aprova Lutu Nasionál ba Señór Francisco Xavier do Amaral nia mate

Independénsia Timor nian proklama ona iha loron 28 fulan Novembru tinan 1975. Sai hanesan portavós Proklamasaun ne’e nian mak Señór Francisco Xavier do Amaral, ne’ebé iha otas ne’ebá sai hanesan Prezidente Fretilin nian. Tuir mai Señór Francisco Xavier do Amaral hetan kargu hanesan Prezidente Repúblika, Prezidente dahuluk Repúblika Demokrátika Timor-Leste nian.

Estadu iha obrigasaun, tuir kbit Konstituisaun nian (artigu 11°) atu valoriza no fó omenajen ba sira ne’ebé luta ba independénsia nasionál. Ne’e mak kazu Señór Francisco Xavier do Amaral nian ne’ebé, aleinde hanesan luta na’in ba independésia, husi kedas tempu hahú nian, iha limitasaun ba ninia liberdade, moris tinan barak hodi hala’o servisu forsadu iha nasaun okupante.

Señór Francisco Xavier do Amaral hetan ona rekoñesimentu nu’udar Proklamadór ba Independénsia no hanesan Primeiru Prezidente Repúblika Timor-Leste nian no hanesan mós Figura ida ne’ebé Importante tebetebes iha Luta ba Libertasaun no Independénsnia nasaun nian.

Haree ba iha tempu ninia mate, nu’udar devér Estadu nian fó ba nia onra fúnebre ne’ebé adekuada ba Individualidade ida aas Estadu Timor-Leste nian, hodi hanoin hikas no reflete kona-ba ninia moris nu’udar ema ida ne’ebé iha asaun ida signiafikativa tebetebes iha independénsia país nian.

Nune’e, Governu dekreta ona Lutu Nasionál iha territóriu nasionál tomak, ho sinál atu fó sentimentu kondolénsia nian ba Proklamadór Independénsia, señór Francisco Xavier do Amaral, nia mate.

Períodu Lutu Nasionál nian ne’e hahú kedas oras ne’e no termina iha oras 18.00 loron 8 fulan Marsu nian no durante loron ne’e tomak Bandeira Nasionál tenke mantén hasa’e to’o klaran de’it ka riin-balun de’it.

Iha sorumutu ne’e, halo mós aprovasaun kona-ba kriasaun Komisaun ida, hanesan responsável atu organiza no realiza serimónia fúnebre, kompostu husi reprezentante sira husi Ministériu Administrasaun Estatál no Ordenamentu Territóriu ne’ebé mak kordena hamutuk ho Ministériu Solidariedade Sosiál, Ministériu Saúde no mós Ministériu Defeza no Seguransa.

Konsellu Ministru hato’o ona votu kondolénsia ba família matebian nian, ba membru sira husi partidu ASDT nune’e mós ba populasaun Turiskai nian.

http://timor-leste.gov.tl

Sem comentários:

Enviar um comentário

Nota: só um membro deste blogue pode publicar um comentário.