Protokolu sabraut tamba PN seidauk aprova Lei konaba Protokolu Estado nian

Iha serimonia solene sira hare lalaok Protoklu seidauk diak, balun dehan sabraut no balun fali dehan seidauk iha Lei hodi regula. Iha cerimonia rua foin dadaun ne’e, ida cerimonia Desmobilizasaun ba antigos Combatentes FALINTIL, iha loron 20 Fulan Agosto tinan 2011 no seluk cerimonia ba transformasaun BPA (Bank Payment Autority) ba BCTL (Banco Central de Timor-Leste), iha loron 13 Fulan Setembro tinan 2011.

Iha cerimonia ida uluk, wainhira protokolu bolu ba fó kondekorasaun, bolu Presidente Republika nudar numeru Um Soberania Timor-Leste nian, tuir kedan bolu eis-PM Mari Alkatiri no Ana Pessoa Pinto ne’ebe laos pertence ba orgaun soberania. Hafoin ikus foin bolu Prezidente Parlamento Nacional (Segundo Homem hierarquia Estado), Vice PM lori Governu nia naran (numeru tres iha hierarquia Estado) no Tribunal Rekursus (numeru quarto hierarquia Estado). Ex-Primeiro Ministro no Prokuradora Jeral Republika (PJR) laos pretence ba orgaun soberania.

Cerimonia transformasaun BPA ba BCTL, mos akontese hanesan, wainhira ba asina plakar transformasaun BPA ba BCTL, bolu Presidente Republika, Presidente Parlamento Nacional, Primeiro Ministro, bolu kedan ex-titulares no husik ba kotuk ex-titular Proklamador RDTL, Francisco Xavier do Amaral no Prezidente Tribunal Rekursu ne’ebe konstitui numeru quarto iha hierarquia Estado hela ba ikus.

Reasaun ba cerimonia ida ikus, deputada Teresa Amaral, iha sesaun plenariu Tersa-Feira (13/09/2011), husi ASDT haktuir katak, ”hau lamenta no ladun konkorda ho protokolu. Katuas kumpri, nia foin sai husi check up. Nia kumpri duni hodi ba, fuk mutin-mutin kumpri, mas iha ne’eba, ninia naran la iha. Husu atu hare’e, nia proklamador duni ka lae?”.

Husi parte seluk, Deputado Adriano do Nascimento, husi PD, mos secunda konaba lalaok protokolu nian, ”konaba ba protokolu, la’os deit ohin, iha seluk mo’os sabaraut hela. Lei protokoler seidauk iha, hare’e ona ba”, defende Adriano do Nasciemento, xefi bankada PD.

Lei Protokolu Estado, submete ona ba Parlamento Nacional no hahu ona diskusaun iha fulan Abril 2010, maibe to’o agora meja Parlamento la bok tan. Se Deputados sira konsciente katak protokolu sabraut, nusa maka la dudu ona ba acelara debate hodi aprova? Se lae, hotu-hotu kontribui ba sai sabraut liu tan. Iha Republika Demokratiku la iha Lei Protokoler Estado ne’ebe hatur orgaun soberania sira ida-idak iha nia fatin. Se lae, protokolu lalo tuir deit ho ida-idak nia hanoin no hakarak, ikus mai mosu kritika katak ”Protokulu sabraut“, ne’e responsabilidade se nian?

Dili, 16.09.2011

Editorial Forum Haksesuk!