Parlamentu Kolabora ho Tribunal Rekursus hodi investiga PJR

Dili. Liu semana rua nia laran, hafoin iha segunda-feira (18/04/2011), hala'o votasaun ba Resolusaun no. 63/II/2011, tamba konseque quorum ho total deputadus 38. Resolusaun aprova ho votasaun favor 29 deputadus, kontra 2 no abstensaun 7.

Kuriozu ba ita ho novidades maka Resolusaun ne’e aprova ho votasaun favores husi deputadu nain 4 husi OMP (Oposisaun Maioria Parlamentares) ka partidu FRETILIN, maka hanesan deputada Cipriana Pereira, Deputada Josefa, Deputado Osorio Florindo no Deputado Francisco Geronimo. Abstensaun 3 husi AMP, maka Presidente Parlamento Nacional, Fernando Lasama de Araujo, Ir. Mario Carrascalao (PSD) no Pedro Costa (CNRT), hakerek Media AMP, Quarta-feira (20/04/2011).

FRETILIN fahe Malu

Konaba resolusaun ne’ebe maka AMP apresenta hodi husu ba Tribunal Rekursus, nudar instancia judisial ne’ebe áas liu iha Nasaun ne’e, atu investiga PJR, baseia ba Kodigu Procesu Penal no Estatuto Ministeriu Publiku.

Hatan ba resolusaun ne’e Presidente Partidu Fretilin, Francisco Guterres Lu’olo, antes haktuir katak "Resolusaun ne’ebe ható husi AMP, halo interverencia ba orgaun soberania seluk (in JND, edisaun Segunda-feira, 11/04/2011)". Liu semana ida deit, iha segunda-feira (18/04/2011), iha kedas votasaun ba Resolusaun no. 63/II/2011 no hetan aprovasaun husi Parlamentu Nasional, inkluindu votus husi deputadus nain 4 husi bankada Fretilin.

Resolusaun atu tulun Tribunal Rekursus halao ninia knar tuir Konstituisaun

"Resolusaun ne’ebe maka AMP hatama ba Plenariu Parlamentu Nasional hodi vota ne’e, tuir Konstituisaun RDTL no ajuda Tribunal Rekursus hodi halo no halao ninia knar lolos tuir Konstituisaun RDTL", haktuir Deputado Rui Meneses husi PD ba AMP Média iha Uma Fukun Parlamentu Nasional, Segunda-feira (11/04/2011).

"Resolusaun ne’e iha duni fatin tamba hodi ajuda Tribunal Rekursus halao nia knar lolos tuir Konstituisaun RDTL. Tuir lolos Tribunal Rekursus nudar instansi judial áas liu iha Timor-Leste, la prezia queiza ruma maibe kasu wainhira torna publika, automatikamente Tribunal Rekursus halao kedan investigasaun", argumenta Rui Meneses husi PD.

Konaba iregularidade atuasaun Prokuradora Jeral Republika (PJR), Dra. Ana Pessoa Pinto, dala barak ona maka deputados sira husi AMP bolu ba Tribunal Rekursus nudar instansia judicial ne’ebe áas liu iha Timor-Leste hodi investiga maibe to’o oras ne’e Tribunal Rekursus seidauk hala'o ninia knar ne’e lolos.

Ex-Deputado Hermes Barros, husi Bankada PSD nian, mos halo deklarasaun politika iha Uma Fukun Parlamentu Nasional konaba ”investigasaun ba Prokuradora Jeral Republika, Dra. Ana Pessoa Pinto (dekl. politika, 19/10/2010)“.

Husi CNRT, liu husi deputado Natalino dos Santos, mos husu nafatin investigasaun ba Prokuradora Jeral Republika (PJR) Ana Pessoa Pinto, liu husi deklarasaun politika iha Parlamento Nasional, nebe "Husu Tribunal Rekursus atu investiga Sra. PJR, Dra. Ana Pessoa Pinto" (dekl. politika, 01/03/2011).

Tuir Direktur ONG LABEH, Chistofer Samsong, iha konferensia imprensa quarta-feira (20/04/2011) iha ninia knar fatin Komoro, Dili, "husu atu Parlamentu Nasional hasai Imunidade Dra. Ana Pessoa Pinto nudar Prokurador Jeral Republika no Tribunal Rekursu Investiga (TVTL, 20/04/2011)".

Baze legal ba investigasaun

1. Tuir Kodiku Procesu Penal (KPP) iha artigu 12, lina a) koalia konaba: "kompete ba seksaun kriminal husi Supremu Tribunal Justisa, tuir materia kriminal: julga procesus krimis kometidus husi juizes husi supremu tribunal Justisa, PJR no ajentes husi Ministeriu Publiku ne´ebe hala'o sira nia knar iha Tribunal". Tamba Timor-Leste seidauk estabelece Supremo Tribunal Justisa (STJ), neduni procesu hotu-hotu haruka ba Tribunal Rekursu.

2. Estatuto Ministeriu Publiku (EMP), Artigu 42, lina 3), "inqueritu ba Prokurador Jeral Republika (PJR) no Adjuntus PJR". Surpremu Tribunal Justiça (STJ) halo investigasaun ba PJR, Dra. Ana Pessoa Pinto. Tamba Timor-Leste seidauk estabelece STJ, neduni Tribunal ne´ebe iha liu kompetencia maka Tribunal Rekursus!

Fontes

1) Resolusaun Nº. 63/II/2011, 18.04.2011. 2) AMP Média, 11.04.2011 no 20.04.2011. 3) Deklarasaun Politika, ex-Deputado Hermes Barros, PSD, 19.10.2010. 4) Deklarasaun Politika, Natalino dos Santos, CNRT, 01.04.2011. 5) Konferensia imprensa LABEH, TVTL, 20.04.2011. 6) Jornal Nacional Diário (JND), edisaun Segunda-Feira (11/04/2011, pajs. 1 e 15)!