Oportunistas: Hanesan deit Ex-autonomistas e Ex-nacionalistas

Hosi: Ferdinand Ximenes )*

Tuir loloos hau la preciso hakerek buat hirak ne pois compatriotas Celso Oliveira e Felipe Rodrigues Pereira hakerek ona. Compatriotas rua ne hotu iha rasão.

Tuir hau nia hare sentimento anti ex-autonomistas la’os buat generalizado ida. Ema sira la kontente liu ho ex-autonomistas sira maka oportunistas sira ou sira be lakon iha competeição ou lakon iha kose porque la hetan fatin be sira buka.

Ex-autonomistas refere ba ema sira be uluk defende autonomia ou Timor-Leste “merdeka bersama Indonesia” enquanto oportunistas refere ba ema balu be uluk defende “merdeka sendiri”, mas agora halai tun sa’en buka beneficio ba an. Sira nia passado nudar ema resistencia outra coisa nebe ita respeita tebes e sira nia ambição atu hetan cadeira outra coisa nebe ita questiona.

Iha politika, oportunista refere ba ema sira halai tun sa’e buka oportunidade hotuhotu hodi hetan cadeira. Bele mos dehan oportunista maka ema sira la iha caracter e principio pois sira ne’e buka beneficio ba an liu hosi dalan badak, sira la interesse ho questão moral, etico e principio.

Ita labele considera ex-autonomistas sira be tama partido tuan ou foun depois de Timor ukun an hanesan oportunistas pois antes de Timor ukun an sira consistente defende sira nia principio to’o lakon iha referendum. Por derrota ne, sira precisa adapta an ba moris foun, defende principio ho valores foun tuir Timor-Leste independente nian hodi contribui ba desenvolvimento Timor nian. Oportunista so refere de’it ba sira nebe Timor ukun an ona, sira muda partido dala rua ou dala tolu ona hodi buka kadeira. Estes são os verdadeiros oportunistas.

Hare ba conceito oportunista, ita labele limete deit fo carimbo oportunistas ba ema ex-autonomistas sira nebe muda partido tun sa’en mas ema sira ex-resistencia mos hetan hotu carimbo oportunistas, principalmente sira be muda partido tun sa’en hodi buka cadeira. Neduni, oportunistas e bele dehan mos traidor maka ema hirak be buka cadeira de’it, troka partido tun sa’en, trai nia principios, valores e trai nia partido rasik. La’os buka oportunidade atu serbi povo mas buka oportunidade atu hetan cadeira lalais e hariku an lalais. Traidor la’os porque atu defende fali integração ou autonomia mas halo traição ba ninia partido e halo campanhe hasoru nia partido ho nia camarada sira rasik. Imoral ou amoral liu tan ba sira nebe partido apresenta sira nia naran hodi sai membro Governo depois to’o ikus sira nega e halai sai hosi nia partido e halo campanhe contra nia partido origem.

Fretilin Mudansa sira ita labele considera nudar oportunista ou traidor pois sira sei afirma an nudar FRETILIN. Sira halo aliança ho CNRT tanba problema interno nebe sira hasoru iha sira nia partido laran. Mas se sira halai los ona ba CNRT maka sira mos la escapa hosi carimbo oportunista. Dala ruma balu oportunista duni, pois depois de hetan tiha cadeira nudar deputado/a e membro Governo, agora sira nonok tiha ona pois cadeira nebe sira buka liu hosi FRETILIN la hetan e hetan ona liu hosi CNRT.

Tuir informação balu nebe hau hetan hosi quadros PD nian balu, iha 2007, Xanana husu PD fo nia quadros balu ba ajuda hari CNRT. PD autoriza e haruka duni sira nia quadros lubuk ida ba. Quadros sira ne balu continua PD nafatin e balu Xanana obriga sira tama CNRT. Ida ne mos chantagem ida hosi Xanana mas tambem fraqueza hosi quadros sira ne rasik nian pois Xanana preciona bosok sira hakruk kedas pois tauk Xanana hasai sira hosi Governo. Parece hetan gosto ona nudar membro Governo e haluha ona nia partido tanba ne lakohi resiste ba Xanana nia pressão. Pior liu tan maka ida halo campanhe aat hasoru rasik ninia partido ho ninia camarada sira be promove sira ne.

Sentimento ida anti ex-autonomistas la’os mai hosi povo ki’ik pois povo ki’ik sira la iha ambição ba poltica. Ema ex-resistencia sira be frustrado por la hetan cadeira maka hamosu sentimento anti ex-autonomistas sira. Porque? Ita bele nota hosi sira be tur ona iha cadeira la iha sentimento anti ex-autonomistas mas sira be seidauk hetan cadeira ka lakon hikas ona cadeira maka halo ida ne. Começa kedas hosi primeiro Governo FRETILIN nian to’o AMP nian. Balu uluk seidauk sai membro Governo sempre lori veteranos nia naran koalia maka’as hodi contra autonomistas sira mas hetan tiha fatin e sai membru Governo la’os deit la contra ona ex-autonomistas sira mas nem buka hadia moris veterano sira nian.

Precisa mos reconhece sentimento anti ex-autonomistas mosu por culpa de ex-autonomistas sira rasik porque falta de consistencia. Ida ne maka aumenta descontentamento ba sira. Nusa maka Gil Alves uluk simu diak iha ASDT nia laran e hetan fiar sai Secretario Geral ASDT nian e agora ASDT rasik maka odi tebes nian e husu hasai nia hosi Governo? Nusa maka Xanana protege Gil Alves enquanto ASDT exige atu hasai Gil hosi Governo? Porque Gil Alves nia kose kaber e maka’s por isso maka Xanana la brani hasai.

Ida ne mos acontece iha partido sira seluk. Se ex-autonomistas sira hatene tau an e la sai oportunistas, sira sei hetan tratamento diak tebes e respeitado iha partido nia laran e iha liur. Bele hare, Aisha Basserawan, bendahara FPDK nian, ohin loron sei respeitado nafatin iha FRETILIN porque nia consistente ho FRETILIN. Enquanto Gil Alves, lakon respeito total iha nebe de’it porque sai oprtunista bot e buka kose tun kose sa’en hodi hetan fatin sira be nia buka.

Mas ema balu la interesse ho tratamento diak, ou respeitado, importante maka sai membro Governo ho deputados/as hodi bele hetan pensão vitalicia e moris diak e garantido iha futuro.

Claro, nudar povo ki’ik laran moras duni haree ema sira nebe uluk lakohi funu ba ukun an sira maka agora ukun fali sira. Pior liu tan maka balu sai arrogante e halo estilos ou trata aat povo ki’ik sira wainhira hetan boot ona. Ida ne maka halo povo ki’ik sira laran moras liu, mas se karik sira haraik an e ukun ho diak maka ema ida la sei laran moras ba sira, excepto politico oportunistas e ambiciosos sira be la hetan cadeira.

Ita tem que simu realidade, realidade nebe mai hosi ita nia independencia rasik. Se lakohi simu ex-autonomistas sira atu ukun la’os kontra sira liu hosi insulta ka marginaliza sira hosi vida politica, economica e social Timor-Leste nian mas evita partido nebe sira nakonun ba hodi labele ukun. Ida ne’e maka naran kombate politika demokratikamente. Evita oinsa? Lalika ba reforsa e vota ba partido nebe ex-autonomistas sira nakonun iha laran, por exemplo hanesan CRNT nebe hetan acusação ema ex-autonomistas ho oportunistas sira nakonun iha laran.

La justu hatudu liman deit ba ex-autonomistas sira maka oportunistas mas ex-nacionalistas barak mos sai oportunistas e pior liu tan balu sai explorador e corruptos. Sira ne bolu ex-nacionalistas porque sira agora hanoin de’it cadeiras, hanoin de’it sai boot, hanoin deit explora ema seluk e hanoin deit nauk e tau nia ema iha fatin-fatin, la hanoin Timor ba Timor oan sira hotu, independentemente hosi sira nia passado defende ukun an. Sira ne agora facil tebes fa’an nia an. Ema sira ne la iha caracter, la iha moral, la iha principio, la iha valor e dignidade mas que tuir democracia nian ne’e la’os crime ida.

Interessante tebes Felipe Rodrigues Pereira hakerek :“Tempu hirak liuba Hakerek’nain hato’o perguntas ba maluk balun husi partidu PD nebe’e mak halai-tama ona ba CNRT, sira hatan ho razaun ‘fundamental’ ida. Sira la’kohi husik maluk eis-otonomista sira mak utiliza fali CNRT hodi ukun nasaun ne’e iha futuru. Sira tama CNRT ho objektivu buka atu selvaguarda CNRT husi utilizasaun maluk eis-otonomistas sira. Ida ne’e razaun ‘fundamental’ ka atetude prakmatiku ida hodi asegura no kontinua kaer k’nar iha estrutura gevernasaun ka estadu nian?!, presiza tempu atu justifika”.

La’os hosi PD de’it maka halai ba CNRT camarada, mas iha mos militante sira FRETILIN, ASDT ho PSD e sira seluk tan. Balu ninia presidente ho Secretario-Geral. Hare deit Pedro Alturas hosi PST ho Vicente Guterres e sira seluk tan. La precisa tempo hodi justifica sira hotu be halai ba CNRT atu impede ema ex-autonomistas atu ukun ou lae. So ema buta huruf/iletrado ho matan delek iha politica sira maka bele fiar ba sira nia rasão. Se sarjana/licenciado ida, mestrado ida, doutor ida ka lider politico ida maka ko’alia, ne so hatudu sira nia beik. Lia husuk maka ne:

Nusa maka la buka salva guarda sira nia partido rasik mas sira ba salva guarda fali partido ema seluk nian? Nusa maka la defende sira nia lider ba defende fali lider partido seluk nian? Sira nia autoridade politica ho moral ba sira nia partido iha nebe? Ema hanesan ne se los maka fiar? Sira hotu mesak oportunistas, subar iha cortina anti-autonomistas nia kotuk ho salva ou ajuda Xanana nia kotuk hodi buka cadeira. Ida ne maka rasão lolos.

Xanana ninia politica maka reconciliação, ne’e signifika Xanana sei fo cadeira ba se de’it maka iha capacidade, la interesse ema ne ex-autonomistas ou lae. Bele hare, rasão saida maka lori Xanana lakohi hasai Gil Alves enquanto ASDT rasik exige hasai Gil hosi Governo. Rasão ida maka politica reconciliação ne rasik e razão seluk Gil hatene kose e mos karik iha buat ruma hosi kotuk, ne so Xanana ho Gil maka hatene.

Hau la fiar sira be halai ba CNRT ne bele influencia Xanana muda nia politika em relação ho reconciliação ou dehan ba Xanana hodi labele usa ema sira ex-autonomistas? Sira hotu agora iha CNRT hare Xanana hanesan Maromak, buat sala ho los nebe sai hosi Xanana nia ibun los ba sira hotu. Por isso hau la fiar sira ba muda Xanana nia hanoin. Pois se sira ko’alia contra Xanana, cadeira nebe sira buka mos sei la hetan, neduni sira prefere sai lambe botas ou “maulambe” diak hodi bele hetan cadeira. Ida ne maka agora Xanana tauk liu, tauk oportunistas sira bele enfraquece ninia lideransa tanba oportunistas sira buka hadau malu cadeira e hateten aat malu iha CNRT nia laran.

Se sira hanoin tuir ema matenek e politico nian, tuir lolos sira reforça sira nia partido rasik hodi enfraquece ou derrota CNRT hodi labele ukun. Iha ne automaticamente evita ex-autonomistas sira la fila ba Governo ou sira seluk labele ba tan Governo. Nusa maka sira husik hela sira nia partido hodi ba hadau malu cadeira ho ex-otonomista sira iha CNRT? Sira nia moral nudar politico iha nebe? Ita lalika ko’alia moral tanba oportunistas sira la conhece moral, sira so hatene de’it iha nebe iha lucro ho beneficio, sira hobur iha neba.

Konkluzaun, sira hotu nebe halai ba CNRT hanesan de’it, la interesse uluk defende ukun an ou autonomia, sira hotu mesak oportunistas hanesan. La’os ne de’it mas traidor hotu dala ida, usa partido ou partido dudu sira ba tur iha cadeira depois sira fila fo tebe ba nia partido rasik. Balu nega mata-matak katak la’os partido maka dudu sira ba Governo, mas sira haluha tiha naran iha lista sira be partido sira entrega ba Xanana. Karik sira nia naran la tama lista ne, Xanana la sei usa sira e partido sira coligação mos sei contra sira pois iha Governo coligação ida boot la iha fatin ba independentes, mas sira tama ba Governo porque partido ruma maka dudu ba. Ida ne maka sira la hatene.

Se ema ex-autonomistas sira la tuur iha Governo e estrada continua kuak tun kuak sa’en, ahi mate lakan, be moos la iha, ema kontinua hamalaha, numeru desemprego aumenta ba nafatin e ema kiak barak ba beibeik, se maka dehan povo sei kontente tanba de’it ema resistencia ida maka ukun? Se povo contente por ema resistencia sira de’it maka ukun, tuir lolos la iha ema ida bele tolok Xanana arbiru hanesan ohin loron. Ema tolok Xanana porque ahi mate beibeik, estrada kuak tun sa’en e buat aat barak sei kontinua permanence hanesan uluk nafatin, taxa desemprego aas nafatin, corrupção buras nafatin. Se povo hakarak ema resistencia maka ukun e la interesse ho buat diak sira, tuir lolos Alkatiri labele monu. Alkatiri monu la’os ema ex-autonomistas sira nakonun iha FRETILIN nia laran, mas ukun maka la diak e povo moris la hakmatek. Xanana mos sei monu la’os porque ema ex-autonomistas sira nakonun iha CNRT mas presença oportunistas sira hotu nian maka sei enfraquece Xanana alem de Xanana nian gestão administração ho planeamento rasik la diak e la responde aspiração ho necessidades povo nian.

Xanana iha tendencia mamar tebes, acomoda corruptores ho incompetentes sira. Se nia serio duni karik, estrada iha Dili laran la kuak tun sa’en ona, ahi la mate lakan ona, transito sira la runguranga ona, sistema administração la’o los ona e corruptores sira balu mos semo sai ona hosi Governo ka ba tribunal ona. Maibe buat hotu bidu iha nia fatin e cada vez mais sai pior ba beibeik.

Defisil tebes oportunista ida ba contra oportunista seluk sa tan ex-autonomistas sira maka lori tama sira ba CNRT ou lobby fatin ba sira. Mas dala ruma sira brani funu malu hodi hadau cadeira. Se sira funu malu duni, sei enfraquece CNRT e sira hotu sei la hetan cadeira, por isso sira sei acomoda malu hodi hetan cadeira. Funu kala sei mosu so depois de eleiçoes e quando sira la hetan cadeira ona foin sira contra ex-autonomistas sira.

Buat nebe halo moe tebes maka ema ba buka kadeira subar iha kortina contra ex-autonomistas ou salva ou ajuda Xanana nia kotuk . Xanana la precisa ema ruma atu salva nia pois nia iha experincia barak ona sai hosi dificuldades oioin e bele salva an. Justru ema sira dehan hakarak salva Xanana ne, sira maka precisa Xanana hodi salva sira ho salva sira nia posição la’os contrario. Se sira contra duni ex-autonomistas sira, sira iha coragem ka lae tebe sai ex-autonomistas sira hosi Governo e CNRT? Realidade hatudu sira la kontra ex-autonomistas sira iha CNRT nia laran, pois se sira contra CNRT bele rahun e sira hotu la sei hetan kadeira.

Partido sira be ninia quadros sira halai ba CNRT mos la precisa hirus e tuir lolos tem que husu obrigado pois halai sira ne nudar processo filtragem ida hodi ta’is ema ho principio metin sira maka hela e sira be la iha principio eh buka cadeira de’it ba hamutuk iha CNRT.

POrque Xanana mos agora buka tun sa’en atu forma pre-coligação ho partido seluk? Porque nia fiar CNRT la la manan ho maioria absoluta iha eleição mai e FRETILIN bele manan nafatin hanesan uluk. Tauk FRETILI maka sei forma Governo coligação iha 2012 mai. Alem de ida ne Xanana mos tauk ho presença boot oportunistas sira nian iha CNRT nebe halo povo sei antipatico ho CNRT e halo CNRT sei lakon votos barak. Tanba ne nia hakarak pre-coligação hodi bele garante vitoria iha eleiçoes 2012 mai.

Balu fali, ohin loron seidauk halai ba CNRT maibe haruka dadaun recado ba CNRT hodi hein cadeira. Maka hosi sorin promote cadeira ruma, sira la iteresse ona ho nia partido origem. Grupo ida ne maka hakarak defende mos pre-coligação ho CNRT, tanba hanoin ho CNRT maka sira sei hetan fatin, se partido la’o mesak sira sei la hetan fatin. Ema sira hanesan ne maka sai fali porta-voz partido seluk nian iha ninia partido laran rasik, defende fali interesse partio seluk nian iha ninia partido laran rasik e la defende ninia partido nia interesse. Ema sira la fiar an e hanoin de’it cadeira sai candidatos fortes ba traidor, tanba sira hanoin so ho tabele maka sira bele moris e hetan cadeira.

Politico diak maka ema nebe hamrik metin iha fatin halo combate politico tuir principios nebe claro e consistente e sempre buka buat nebe diak liu ba ninia partido hodi serbi povo, la’os duni kadeira tanba interesses pessoais.

Balu fali dehan sira ba ajuda Xanana deit? Se nia iha hanoin diak tebes nusa maka la ajuda ninia partido rasik mas ba ajuda fali lider hosi partido seluk nian? Sira ba CNRT por ema ka por politica? Se por ema, quando Xanana mate sira mos hakarak mate ou lae? Karik sira ba por CNRT nudar partido hau foti chapeu ba sira, porque partido la sei mate quando partido ne defende principios, valores ho interesse povo nian. Ema nudar individuo sei mate mas nudar povo la sei mate.

Se los duni, iha CNRT nia laran nakonun ho ex-autonomistas sira e atu evita ema eks-autonomistas sira labele ukun maka diak liu iha proxima eleisaun mai, lalika vota ou halo coligação ruma ho CNRT. Nune maka evita hotu kedas ona ema autonomistas sira atu tur tan iha Governo. Mas se halai ba CNRT, ou hanoin halo coligação ho CNRT, significa sei loke dalan ba ex-autonomistas sira tur iha Governo no sai deputado quando partido ne hetan votos barak. Mas se partido seluk la forma coligação ho CNRT maka oportunistas sira hotu sai stress pois sira ba hein tiha ona iha CNRT mas CNRT labele forma Governo neduni sira mos la hetan fatin. Atu fila ba nia partido origem ladiak pois ninia camarada sira la fiar ona e la usa ona.

Acho que iha logica precisa fo castigo politico ba oportunistas sira hotu, la interesse se ex-autonomistas ka lae. Castigo ida ne maka lalika vota ou halo coligação ho CNRT hodi forma Governo iha 2012 pois forma coligação ho CNRT significa halo coligação ho oportunistas sira. Tradição oportunistas sira nian maka halo traição e traição, neduni tem que cuidado ho sira.

)* Sidadaun Timor, hela iha Comoro.

Email: ferdinxim@gmail.com