Mario Carrascalão: Nudar 2º VPM ka KAK? (2)

Artigu ne'e STL hatun iha loron Sabadu (21.02.2009), iha pags. 1 no 15)!

Oinsa maka MC kombate Korupsaun

Milena Pires (MP) ba xefi gabinete 2º VPM ne´e mos problema ba MC rasik tamba, MP ne´e Presidente PSD, Zacarias da Costa ninia kaben. Iha ne´e mos hatudu hanesan lalenok ida KKN ka lae? Minimu liu tenke konaba ba letra tolu ne´e ida: Korupsi, Kolusi no Nepotisme. Tuir MC Carrascalao ba Jornal Timor Post (18/02) katak nia maka hili duni MP atu sai ninia xefi gabinete tamba hare ba kriterius ninia kompetencia.

Maibe imagem nebe maka sei hatudu ba liur no liliu ba povu nebe maka tau expektativa áas katak MC maka atu bele hamos KKN iha Governu AMP nia laran. Oinsa maka bele kombate KKN enquanto nudar agente Estadu mos pratika dadaun ona KKN?

Aliansa MC no Ana Pessoa

Iha mos hipótese katak Presidente Republika (PR) tuir ninia kompetencia iha Konstituisaun RDTL maka hili Prokuradur Jeral Republika (PJR) ba mandatu tinan 4 (K-RDTL artigu 86º linya k). Ema nebe maka temi barak ona no iha perfil ba tur iha fatin ne´e maka Ana Pessoa (AP) maka ba tur iha PJR. Eskema luta ba poder ne´e dada ba mai jogu husi Mari Alkatiri (MA) maka hatou naran AP ba PR, ka kandidatu ideal nebe maka Fretilin faksaun MA prepara ba sai PJR liu husi PR.

Aliansa MC no AP iha momentu rua (2)

Ida (1); MC fó suporta ba Ana Pessoa sai nudar PJR (JND, 09/02/2009). Iha ne´e hatudu katak MC no AP tama iha eskema luta ba kaer poder iha Timor-Leste, ida ba kaer PJR no seluk ba kaer nudar 2º VPM.

Rua (2); Iha debate OJE2009, wainhira haksesuk malu konaba Orçamento ba gabinete Presidente Republika nian, nota katak Deputada AP sempre hatou proposta hodi hasae tan Orçamento ba gabinete PR nian ka hamos orçamento ba KAK hodi tau fali osan ba gabinete PR nian. Iha votasaun hare momos tendência ba votasaun husi MC nebe sempre alinya ho AP.

Kandidatu sira seluk ba 2º VPM

Naran MC ba tur iha kargu 2º VPM Laos ona buat foun ida, emar Timor oan tomak hatene katak nia maka sei ba tur iha fatin ne´e, tamba deit kreterius oi-oin no avaliasaun nebe ita hotu hatene ba MC ninia kompetencia, liliu wainhia kaer Ukun no Bandu nudar Governador iha Indonésia nia ukun. Maibe ikus-ikus mai naran ida 2º VPM mos mosu naran seluk husi Partidu sira nebe hamutuk iha AMP, UNDERTIM hatou ninia kandidatu maka Dr. Cristiano Costa no mos tuir kreteriu proporcionalidade PD mos iha direitu atu hetan fatin nebe 2º VPM, maibe fó suporta ba MC ba tur iha 2º VPM wainhira troka ho Ministrus sira nebe maka PSD iha iha gabinete IV Governo Constitucional.

Iha implika negociasaun intensivu iha AMP laran, buka argumenta tau proposta hotu-hotu, sukat ida nebe maka bele iha duni kbit ba kaer kargu 2º VPM. Iha sei dada ba mai, se maka hakarak hakiduk no semana hakarak impoen ninia interesse grupo ka partidus iha debate iha AMP laran. Tuir argumentu proporcionalidade PD mos hakarak tau ninia kandidatu ba 2º VPM, PD hakiduk waihira troka ho Ministro Ekonomia no Desenvolvimentu (MED).

MC no problema nebe sei mosu

Waihira aceita atu tama mai hola parte iha AMP, tenke obedece ba kriterius balun maibe hili tolu (3) deit, hanesan:

• Ida (1); ema ne´e iha duni ninia kompetencia teknika no profisional;
  
  Rua (2); ema iha duni ninia dedikasaun ba servisu;
  
  Tolu (3); tama iha estrutura ka gabinete governu AMP tenke obedece ba hierarkia ida.

Ba kriterius rua (2) uluk, MC kumpri neduni nia merece ba kaer kargu nudar 2º VPM. Maibe difícil ba MC maka ne´e, MC obedece ka lae hierarkia ba organizasaun ka estrutura Governo AMP nian?

Ida (1); MC nudar Governadur iha Indonésia nia Ukun, nia hatudu katak líder ka nai Ulun ida nebe kontroversial ho hierarquia iha leten. Hatudu momos katak nia kontra decisaun husi leten, liliu decisaun husi Jakarta iha biban neba. Iha kontextu Ukun Rasik An, mos MC hatudu katak nia iha difikuldade ba obedece ba hierarkia iha leten. Neduni lian bot maka ne´e MC nudar 2º VPM nia obedece ba PM Kay Rala Xanana Gusmão ka lae?

Rua (2); MC nudar Presdiente PSD, nia hatudu katak nia mos iha líder nebe iha ninia fraquesa, nebe buat humano tamba ita emar moris sempre iha ida-idak ninia fraquesa. MC sempre exige obidencia ba sira kraik ba nia no rona ordem hierarkia husi leten (husi MC, red). Tamba kontradisaun iha lideransa MC nian ne´e maka provoka PSD nakfera dala rua (2). Uluk kasu Leandor Izaac mos provoka PSD nakfera. PSD salva tamba eleisaun 2007 halo koligasaun ho ASDT, ikus mai nia maka hetan deputadus 6 no ASDT 5 deit. Seluk iha kongressu PSD iha fulan Dezembro tinan 2008, MC ho Ministrus no depuatdus sira seluk halo kampanya ba favor ba kandidatura Presidente PSD Zacarias Albano da Costa hodi kontra kandidatura Fernando Gusmão nian. Zacarias ne´e aposta pessoal MC nian, tamba ne´e maka MC dehan “Zacarias iha kapacidade atu sai PM iha eleisaun 2012”. Analise ba resultadu kongresu PSD nebe kandidatu nebe MC, Ministrus sira no deputadu sira halo kampanya fó suporta maibe to´o resultadu kandidatu Zacarias nebe hetan suporta husi MC manan deit ho 33 votus ka suara. Leitura nebe maka halo konaba kongresu PSD nian maka ne´e: MC ladun hetan suporta makas husi massa PSD rasik, maske estruturas, liliu estrutura ekonomika, estrutura politika (hierarkia Partidu) ba suporta ba kandidatura Zacarias Albano da Costa nian ne´e makas maibe ladun reflekte ba resultadu nebe maka Fernando Gusmão hetan. Maibe base suporta ba Fernando Gusmão hanesan ho Zacarias Albano da Costa, maske Fernando iha desvantagem iha estruturas maibe iha diskursu politiku ninia kandidatura hetan suporta husi base partidu nian, ninia reflekte husi resultadu nebe hetan husi kongresu rasik, lakon ho 33 votus.

Neduni MC nian mos dehan ona katak “Hili liu VPM do ke KAK (STL, 18/02)”. Se hili VPM, nia mai laos atu ba halo fali servisu KAK nian. Hili VPM atu mai ajuda hodi halao makina estadu nian. Limitasaun ba kompetensia no ninia funsaun entre 2º VPM no KAK klaru los, iha ninia baliza. Mário Carrascalao: Hili 2º VPM ka KAK?

*) Hakerek nain Timor oan hela iha Same/Díli, Timor-Leste!