ITA KIAK DUNI MAIBE LAOS KATAK ITA NE´E FRAKU (lemah)

By DEOLINDO DA COSTA*

Hakfodak ita la sente tinan nen ona ita nia nasaun hamrik mesak (sura husi 20 de Maio 2002) buat barak mak muda no transformado tuir prosesu dezenvolvimento iha ita nia rai, buat barak mos sei lao nafatin nungka iha mudansa no buat barak mak sei falta hodi Governo bele trasa planu dezenvolvimento ba futuru.

Mudansa ou transformasaun nebe ita hotu hakarak, ida ne´e laos kulpa ema nain ida ou parte ida nian responsabilidade deit maibe ita hotu nia responsabilidade.

Kiak hanesan problema ida nebe maioria ita nia komunidade infrenta, ne´e duni ema barak usa oportunidade ida ne´e hodi usa ema kiak hanesan objektu ida atu hetan benefisio, exemplo hanesan trafico humanu akontese tanba ema hatene katak ema kiak sempre mehi hakarak hetan osan ou sasan liu hosi dalan oi-oin, entaun se iha tempo ida ema hosi rai seluk mosu mai promete buat oi-oin ba sira hanesan hetan serviso iha rai liur ho salario nebe boot, iha liur campo de trabalho barak no depois trata tan sira nia pasaporte entaun sira mos parece ba duni tanba posibilidade atu hetan osan sira sente nak loke ona ba sira, maibe sira lahatene katak ema seluk atu usa sira hanesan asset atu hetan benefisio (Trafico humanu acontece iha area fronteira Maliana, baseia ba dadus husi team investigasaun iha maliana katak ema nain hamutuk 72 mak identificado tama ba indonesia e depois direita ba Malaysia, Thailandia no Singapura no agora dadaun husi parte investigasaun halo hela investiga ba sira ida-idak nia familia iha Maliana).

Ida nee realidade akontese tanba problema kiak nebe iha husi resultadu facilitasaun kampo de trabalho nebe limitado iha ita nia rai, ema barak mak seladauk hetan serviso hodi ida ne´e problema ida ne´e wainhira ita liga ba iha conflito iha ita nia Rai katak baseia ba resultado avaliasaun konflito nebe halao hosi BELUN ba 53 suku iha Timor Laran tomak katak barak liu problemas ou konflitos social nebe mak mosu iha ita nia Rai tanba numeru desemprego nebe as tebes hodi hamosu acsaun-acsaun nebe sei hamosu ba violencia mak hanesan Joven hemu tua lanu, gosta envolve groupo arte marxiais.

Nudar hakerek nain hakarak descobre uitoan kona ba buat balun nebe mak akontece hela iha ita nia let, iha ema seluk nebe ho egoista usa oportunidade ita nia Kiak ne´e hodi haneha ita nia ema kiik sira iha base, hau temi ona buat balun iha leten hanesan isu trafico humanu nebe mos akontece ona foin dadaun nee, ita mos precisa hare buat balun mak akontece iha ita nia rai laran hanesan exemplo ita nia maluk sira nebe mak serviso iha loja, restorante, no fabrica kiik sira hanesan industria halo kafe no sigaru nebe selu ita nia ema sira ho salario nebe minimu tebes no se kalkula ba necessidade atu usa ba an karik sei la to´o.

Standar nebe mak fo sai se karik hau la sala upah/salario minimu ba level non skill ne´e mak $80 - $ 100, maibe realidade nebe ita hasoru katak iha loja balun selu ita nia ema $30-$40 kada fulan, no serviso mos liu oras kadaves selu salario $40 dollar maibe loron sabado no dominggo mos tama serviso. Hanoin to´ok ba, se nia moras osan $40 dolar ne´e to´o ka lae atu hola aimoruk? Han hemu to´o ka lae tanba fos karon ida $18 no to´o 20 dollar ona? Hola roupa bele to´o ka lae ?

Hakerek nain koko hasoru ita nia ema sira ne´e balun, nebe sira expresa duni katak osan la to´o maibe pasencia serviso tanba presiza tebes osan hodi bele aguenta vida familia, iha loza nain ema chinesa ida iha Maliana neba fo hatene katak ami la obriga sira atu serviso no sira rasik mak hakarak mai atu serviso, no wainhira fo hatene katak sira nia salario $40 dollar kada fulan mos sira rasik aceita mak ami mos simu sira hodi serviso.

Los duni liafuan ida ne´e sai atu nia defende an maibe mos karik tuir hau nia hanoin no recomenda katak nudar ema estrangeiro ida nia tengki mos hakruk ba regulamentus no lei ruma kona ba direitu trabalhadores nebe mak existe iha ita nia nasaun, laos mai atu halo tuir deit ida-idak nia hakarak nungka iha sentimentu nebe kasian no la iha interese hakarak contribui hamenus kiak iha ita nia Rai, maibe atu mai halo fali penindasan ida nebe mak tempu uluk kolonialista sira halo tia ona ba ita.

Ho hanoin ida ne´e karik bele fo kesadaran uitoan ba ema hotu iha Timor atu comemora loron trabalhadores iha dia 1 de maio,2008.

Buat nebe mak hau hakerek ne´e hanesan hakarak descobre uitoan deit problemas kiik sira nebe mak presiza mos hetan atensaun, tanba ida ne´e sei ligado ho ita nia kiak, Los katak Ita kiak duni maibe mos ita iha dignidade, ita sei iha espirito atu hamrik no iha oportunidade atu ses dok husi kiak. Hakerek nain mos sente la kontente wainhira acompanha iha media rai liur nebe ema sira temi los katak Negara ingusan yang termiskin,bunuh saja Ramos Horta no hatete liafuan at seluk ba ita nia Presidente da Republica tanba deit miscomunicasaun liu husi media kona ba kaju attentadu 11 de febreiro iha media. Laran morasssss... ......... tanba maske kiak mos ita lakoi ema temi at no hatun ita no liu-liu hakarak intervensi ita nia problema interna mos (Ita hotu hatene katak kona ba crize no Matebian Sr. Alfredo momos ita hare iha intervensaun nebe hatudu mak, Major alfredo kanta, koalia, e hahalok kiik oan deit mos foka/publica siaran lansung husi Media balu iha rai liur neba los ka lae ?lolos ne´e ita tengki husu sira katak sira nia urusan no kepentingan saida kona ba ida nee?)

Ita nia uma laran nebe foer uitoan fo sai kedas iha liur, lahatene sira nia uma laran mos karik mos liu ita nian karik ?

Hakerek nain mos hakarak descobre uitoan kona ba hahalok violencia nebe mak buras iha ita nia rai husi crize nebe mak mosu, ida ne´e hau hakarak hare tanba ita hotu observa no evalua katak autor sira ne´e barak liu mai husi Joven. Hakarak halo deit hanoin komparasaun ida atu compara uluk iha tempu Indonesia nia ukun Joven barak mak tauk no dada an uit oan atu halo violencia tanba tauk sira nia naran foer iha policia, ou sira nia fotographia taka iha fatin-fatin, nebe ho hanoin katak se naran foer karik ita susar atu hetan acessu ba escola no hetan serviso, ne´e duni ita nia futuru mos karik sei la hetan diak tanba surat ida naran SKKB (Surat Keterangan Kelakuan Baik) ne´e ita hetan husi policia wainhira ita atu continua escola ou mos serviso iha instansi governu nian. Ne´e duni tanba hakarak deit hetan carta SKKB ne´e joven barak mos evita nia an atu lakoi envolve iha acsaun violencia. Hau hanoin no recomenda katak iha ita nia nasaun agora mos ita bele halo tuir exemplo ida ne´e hodi evita ema atu bele controla nia an husi hahalok violencia nebe mak nia hakarak halo. SKKB ne´e hau sujere atu ita nia seguranca PNTL bele coopera ho Univercidade sira no komponentes seluk hodi cria formatu ida kona ba SKKB ne´e atu aban bainrua usa hanesan requeriementu ida atu continua escola no buka serviso. Karik ita mos bele muda naran hanesan exemplo Carta Avaliasaun de Attitude (CAA).

Ida ne´e hanesan fo hanoin kiik oan ida atu oin sa mak ita bele hamenus acsaun violencia nebe mak sempre mosu no fo impaktu mos ba ita nia Kiak iha Ita nia nasaun Doben ida ne´e.

Buat balun tan mos hakerek nain hakarak descobre fo hanoin mak kona ba orsamento ida ita hotu rona iha 5 millaun dolares nebe mak la sala husi comissaun Europea atu aloka ba Instituto microfinancias sira hodi facilita credito perioridade ba Feto sira atu halo negosio, kestaun nebe hau foti mak wainhira ita aloka tia orsamento ne´e ba iha institusaun microfinancias sira hodi la kria regulamento ruma nebe mak interven ba mechanismo fo credito nebe mak ladun fo pasu ba creditor sira, maka tuir hau nia hanoin hanesan deit no la fo resultadu ida nebe mak halo ita satisfaz tanba durante ne´e institusaun microfinancias barak-barak maibe sira nia tipo de service (tipe pelayanan) ladun memuaskan, hanesan instituto microfinancias balu implementa weekly repayment (selu kada semana) ida ne´e karik sedauk kondiz ho ita nia dezenvolvimentu economia nebe kalkula ba daily income loron-loron, creditor barak mos ladun hetan oportunidade hetan creditu tuir sira nia hakarak no planu negosiu tanba Instituto Microfinancias sei halo kategorizasaun ba tipo osan (loan) nebe mak atu fo ba kategori clientes hanesan weekly loan, special loan, sallary loan. Ida ne´e sei fo impaktu katak osan nebe mak fo ba ne´e se sira nafatin tuir sira nia sistema maka hare deit ba, tanba durante tinan hirak ne´e microfinancias halao operasaun bara-barak maibe hare iha mercado sira iha distrito Dili ne´e mos ema sira husi rai liur mak dominan liu iha negosio loke loja roupa, restourante no faan dosi.

Tanba microfinancias fo deit osan ba ema nebe mak iha jaminan hanesan salario,rai, ka buat seluk tan.

Karik hau recomenda se bele halo regulamentu ida hamutuk ho Microfinancias sira atu sira bele decide mekanismo ruma fo ba ita nia ema sira nebe mak iha planu nebe klaro, no iha comitmentu duni atu halao negosio no halo kompetisaun ho ema nebe mak mai husi rai liur.

Karik mak ne´e deit hau apresenta hau nia escrita ida ne´e hodi hanoin ida hakarak defende ita nia dignidade, no contribui fo hanoin kona ba buat kiik sira nebe mak karik ita presiza hamosu no hadia hodi bele fo apoio ba ita nia prosesu dezenvolvimentu.

Hakerek nain rasik nia visaun personal rasik katak iha tinan sanulu oin mai lakoi tan laran moras tanba ema atu temi ita hanesan KIAK........ ..buras ho VIOLENCIA... ......no Lakoi mos atu ema sama ita nia DIGNIDADE... .....

VIVA TIMOR LESTE....... .. 20 de Maio 2008.

Deolindo da Costa (DEO)
Estudante UNTL (Administrasi Negara)
Tinan academia 1998
No hp : +670728 4409
Servisu iha NGO