Harii Plataforma ho KADEIRA AIN TOLU

Husi* António Ramos Naikoli

Tuir plataforma foun nebe maka Fretilin ho ASDT harii (01/05) ne´e ho ninia objectivo final maka oinsa maka Partido rua nebe fahe poder ba malu waihira manan fila fali eleisaun legislativas (Bele antecipada ka legislativa iha tinan 2012), fahe kadeira hanesan: Prezidente Parlamento,Vice-Presidente Parlamento, PM, Ministros, Secretarios estado, no sst. Plataforma ne´e mosu hodi buka fahe maka kadeira ba malu, ida ne´e maka hanesan lalenok ida nebe leno dadaun katak Lu´olo, Xavier Amaral, Alkatiri ho Luisa Gomes ninia hanoin hodi halo Plataforma. Plataforma ida ke mosu mai, la iha lia nia ulun, isin no abut, iha liu maka lia tutun, oinsa maka fahe kadeira malu dadaun. Waihira Plataforma se hanoin deit maka fahe kadeira ba malu, plataforma ne´se la metin, hanesan tur iha kadeira maibe ho ain tolu deit. Neduni Plataforma ne´e, harii ho kadeira ain tolu.

KADEIRA AIN IDA:

Uluk dehan Katuas Xavier laos Proklamador RDTL iha loron 28/11/1975.

Lia fuan hirak ne´e sai husi Mari Alkatiri nia ibun no sai hanesan diskursu oficial ulun bot Fretilin sira nian. Waihira Parlamento Nasiona (PN), iniciativa husi ASDT no hetan suporte husi bankada ka fraksi sira seluk hodi fo voto rekonyecimentu ba Katuas Xavier Amaral nudar Proklamador RDTL iha loron 28/11/1975, Bankada Fretilin maka kontra (hare fila fali Lusa, Outubro 2003). Mari Alkatiri iha biban seluk dehan nune: ”«Laos Xavier Amaral maka proklama 28.11.1975, maibe CCF maka proklama RDTL. Mari Alkatiri dehan tan, ami hakerek testo Proklamasaun Independencia hafoin fo ba nia (Xavier Amaral) ba le deit»”. Mari Alkatiri ho Fretilin ninia hanoin ba katuas Xavier Amaral hanesan ciniku no oportunista politika. Ciniku tamba, dehan aat tiha Katuas Xavier Amaral tamba iha biban neba Xavier Amaral la tama ba Fretilin maibe harii fali ASDT hodi hadau votantes barak husi Fretilin, tamba deit Fretilin ninia mehi iha eleisaun ba Assembleia Konstituinte (AK) hakarak manan to´o 85% maibe monu ba 57% iha 2001. Kausa ba lakon votos Fretilin nian mos fo sala balun Xavier Amara ho ASDT. Iha biban nebe maka Fretilin kaer Ukun hahu husi tinan 2002-2006 dehan aat katuas Xavier Amaral. Oportunista politika, tamba waihira lakon ona poder hakbesik ba katuas Xavier Amaral,oinsa maka harii Plataforma hodi hatun Xanana ho AMP. Atitude Politika Mari Alkatiri ho ninia grupo, hatudu momos katak «Sira ne´e Hamrok ba poder», ema nebe buka oinsa maka to´o poder lalais, labele husik AMP ukun to´o tinan 2012, neduni sira buka liu husi dalan oi-oin atu ba kaer Ukun. Uluk hakbesik ba Major Alfredo Reinado (MAR) hodi kontra Xanana, hare fila fali STL (17/01/2008,p.05) no Mari Alkatiri haktuir ba Agencia Lusa katak «Convergência dos objectivos Comum (Lusa,17/01/2008)», hare mos Forum Haksesuk (FH) «A Convergência dos Objectivos Comum entre Mari Alkatiri e Alfredo Reinado Foi uma estrategia Falhado», sani ka le iha FH (http://www.forum-haksesuk.blogspot.com/). Ikus mai hare katak hakbesik ba MAR la fo resultado, besik fali ona ba Katuas Xavier Amaral ho ASDT.

KADEIRA AIN RUA:

Katuas Xavier Amaral kontra Mari Alkatiri

Katuas Xavier Amaral,iha nini diskursu no deklarasaun ba journalista sempre ataka no dehan aat Mari Alkatiri. Iha biban balun maka Katuas Xavier Amaral dehan aat Mari Alkatiri, to´o dehan ho lia fuan nebe nudar ema politik nain labele uja iha ninia diskursu hanesan «nia laos Timor oan, labele vota ba nia tamba nia laos katolika, no sst», lia fuan sira dala barak mos Xavier Amaral hasae ba publiku. Tamba deit katuas Xavier Amaral la gosta Mari Alkatiri, waihira Lu´olo halai taru ba eleisaun Presidencial iha 2ª volta ho Ramos Horta, katuas Amaral dehan: “«Sira nain rua ne´e mesak aat hotu, buka oinsa maka vota ba ida nebe maka aat witoan liu»”. Hare deklasaraun balun nebe STL cita Katuas Xavier dehan nune: ”Se ita hili Ramos Hota, maka sei halo ita ulun moras deit, mas kuandu hili Lu Olo, ita ele mate mohu. Diak liu hili ema nebee halo ita ulun moras deit mas late, duke hili ema nebee bele oho ita,” Xavier hatete iha kampainye prezidensial iha tinan 2007 (in STL06/05/2008)”.

KADEIRA AIN TOLU:

Katuas Xavier Amaral ninia posisaun ladun representa ASDT, tamba saida?

Hatan:

Ida (1); Se maka lori ka bolu Gil Alves no Abilio Lima ba tama ASDTL? Laos katuas Xavier Amaral maka bolu. Sira nain rua (Gil Alves ho Abilio Lima) la kontribuio ba organizasaun partido iha periudo nebe maka ASDT sei iha Oposisaun ba Governo Mari Alkatiri/Fretilin. Tamba saida maka Katuas Xavier Amaral tau kedan Gil Alves ba Sekjen, laos tamba nia perigu ka Assuwain, maibe tamba nia empresario ka Pengusaha nebe sucesso, minimo Gil Alves mos kontribuio financeiramente (Osan) ba organizasaun (ASDT). Nusa maka uluk Katuas Xavier Amaral la hanoin uluk bolu Gil Alves tama ASDT to´o fo sai nudar ema konfiansa ho kargo Sekjen.

Rua (2); Iha fulan Jeneiro laran tinan ida ne´e (2008), ulun bot ASDT nian husi Distritu 13 haruka karta ida ba Prezidente ASDT katuas Xavier Amaral atu hasai Gil Alves no Abilio Lima husi ASDT, konsekuencia hasae sira husi Governo AMP nudar representante ASDT nian. Resposta katuas Xavier Amaral nian,maka ne´e demite hotu ulun bot sira nebe maka halo surat ba husu Gil Alves ho Abilio Lima (pelo menos ida ne´e maka resposta Katuas Xavier Amaral nian ba karta ulun bot ASDT nian husi distritu). Ikus mai Katuas Xavier Amaral mos uja argumento nebe maka ulun bot ASDT distritu nian, neduni autoridade moral katuas Xavier Amaral nian iha nebe, waihira uja argumentu hanesan saida maka ulun bot ASDT distritu nian.

Tolu (3); Iha eleisaun legislativa 2007 ASDT halo koligasaun ho PSD, partido rua ne´e hamutuk hetan Deputado 11 (6 husi PSD no 5 husi ASDT). Nain 5 ne´e konta ho katuas Xavier Amaral, maibe katuas Xavier Amaral hola decisaun hodi ba harii Plataforma ho Mari Alkatiri/Fretilin la hetan suporta husi Deputado nain 4 seluk, tamba sira hakarak «Honra komprimisu ho AMP». Tamba sira hatene katak «Harii Plataforma ho Fretilin» ho objektivu lori fila fali Mari Alkatri ho ninia grupo fila ba kaer Ukun, husi sorin ida. Husi sorin seluk, Deputado 4 ASDT nian mos hatene hare katak “«ASDT labele hare deit ba imagem ema ida nian»”, partido ida labele moris naruk waihira joga iha ema ida ninia imagem, se nune partido sei la ba oin, tamba depende hela deit ba ema ida, maka katuas Xavier Amaral, se Katuas Xavier Amaral tur metin iha kadeira ain tolu (Plataforma ne´e hanesan kadeira ain tolu), ASDT mos metin, se kadeira ain tolu monu, ASDT mos monu.

Lian Ikus maka ne´e: Harii Plataforma ne´e ho Kadeira Ain Tolu, tamba sira ninia hakarak oinsa maka fahe kadeira ba malu. Maibe kadeira sira nebe sira atu ba tur ne´e harii ho ain tolu deit, neduni kleur ka besik kadeira sei monu mesak. Tamba sira tur ba leten la metin tamba falta kadeira ain ida. Kadeira Poder nebe maka sira fahe ba malu maka ne´e: Kala Mari Alkatiri ba tur iha kadeira PM nian, Xavier Amaral ba tur iha kadeira Presidente Parlamento Nasional no Lu´olo kala ba tur iha kadeira Presidente Republika nian. Tamba kadeira sira nebe sira atu ba tur ne´e ho roda ain tolu deit, neduni kala tur mos metin, bele mos sira la ba tur iha kadeira sira ne´e. Se hakas ba tur iha kadeira ain tolu, sira sei monu tebes hanesan Salazar (Presidente Portugal nian) monu iha kadeira iha tinan 1968.

Harii Plataforma ida ke, hare la iha lia ulun (Principio), lia isin (meio) no lian ikun (fins). Sira ninia hakarak maka fahe poder ba malu, laos hare ba interesse nasional maka tau iha oin maibe interesse grupo nian, hodi konfundi saida «kadeira poder ba sira»!

*Timor Oan, hela iha Lisboa, Portugal!