Portugal ninia apoio ba Governo Xanana Isola Fretilin

Governo Português liu husi komunikadu fo «apoio» ba Governo Xanana Gusmao (RTP,09/08). Portugal ninia «silêncio» liu tiha loron hat (4) waihira Prezidente Republika bolu Xanana ho AMP harii Governo hafoin hasae deklarasaun hodi fo apoio ba Governo Xanana.

Iha loron nebe maka PR Ramos Horta bolu AMP harii Governo rai hotu-hotu, husi Indonesia, Australia to´o Estado Unidos America fo sira nia «apoio» ba Governo Xanana Gusmao. Waihira Portugal la mosu iha lista rai sira nebe fo «apoio» ba Governo Xanana, halo ita husu tan saida maka Portugal nonok deit? Posisaun Portugal nian bele interpreta oi-oin:

Ida (1); Diplomacia Lisboa nian hein tempo, husi tatoli PR nian hodi bolu AMP ho Xanana ba harii IV Governo Konstitucional (6/08) to´o hiit Xanana ba PM foun (08/08). Lisboa simu informasaun formal (via diplomatika), informasaun husi Komunikasaun Social, parecer husi konstitucionalista nebe hare hetan katak Prezidente Republika bolu AMP harii Governo ne´e konstitucional, sira mos simu informasaun husi servisu Secreto, nebe bele garante katak seidu ka tarde Governo Xanana sei manan emar Timor nia fuan, violencia nebe mosu iha cidade Dili ho fatin seluk hanesan spontanea deit. To´o ikus sira tetu no tais informasaun sira ne´e hotu hafoin hola decisaun hodi «apoio» ba Governo Xanana Gusmao.

Rua (2); Governo Português, iha krise politika Militar (KPM) iha tinan 2006, Portugal hatudu sira nia suporta ba executivo Mari Alkatiri nian. Ba Portugal Mari Alkatiri ho Fretilin maka bele garante ba interesse Portugal nian, Xanana ho Ramos Horta ninia politika halis liu ba Australia. Neduni ba Lisboa, Mari Alkatiri ho Fretilin maka bele garante ba interesse Portugal no CPLP iha Timor Loro Sae (Leste).

Tolu (3); husi kampanye nebe maka Fretilin desenvolve iha KPM nia laran hetan aliados husi opiniaun publika Portugues, liliu husi mas media ka pers, opinion maker ka fazedores das opiniões, hotuhotu iha diskursu «uniforme» konsidere Mari Alkatiri ne´e vitima ba interesse geoestrategica no jogo konspirasaun nebe maka envolve Xanana Gusmao ho Ramos Horta nebe representa interesse Australia iha Timor Loro Sae.

Maibe ho deklarasaun husi Governo Lisboa nian ba Governo Xanana Gusmao, ninia konsekuencia politika ba Mari Alkatiri ho Fretilin, tamba isola Fretilin iha Kontexto diplomacia internacional, tamba iha CPLP Fretilin kala hetan deit ona simpatia husi Moçambique ho rai Afrika sira seluk, maibe CPLP se maka iha liu forsa maka Portugal ho Brasil. Neduni Portugal ninia apoio ba Governo Xanana, isola Fretilin!

Forum Haksesuk
Lisboa, Portugal