Harii Sistema Judicial Nebe Independente

Harii Sistema Judicial Nebe Independente
Kilat iha Eis-PM Mari Alkatiri nia Uman*


Lian bot nebe maka Rai Timor LoroSae (Leste) hasoru maka oinsa maka Harii Sistema Judicial Nebe Independente (SJI). Waihira SJI hafoin bele fo garantia ba desenvolvimento ekonomika,politika i socio-kultural. Se SJI halis ba interesse grupos ekonomika i partiadarios nebe sai hanesan karta convite ba aumenta tan maka:Violência,exclusaun social no hamate progresso no desenvolvimentu ekonomika,politika,social i kultural. Violência nebe akontece iha Timor LoroSae (Leste) no hadait ona ba Distrito sira seluk hanesan Baucau ne hatudu katak atuasaun SJI nian ladun hatudu sira nia «Imparcialidade». Faktus nebe maka akontece iha Timor LoroSae hodi ita deskonfia konaba SJI, liliu independencia no kompetencia Ministeriu Publiku (MP) no Tribunal ninia serbisu. Hahu husi Tribunal Rekursus (TR) ninia parecer favoravel konaba II Kongreso Fretilin ne «Legitimo no Legal»,mandatu ba kaer Major Alfredo Reinado ho ninia elementus sira ho argumentus katak data ka loron nebe maka estabelece atu entrega kilat limite to´o loron (25/07),ikus mai Forças Australiano sira ba hetan fali kilat iha Eis-PM Mari Alkatiri nia uman iha fulan Agosto laran (STL i Lusa,01/08). Parcialidade Tribunal no MP ninia serbisu maka aumenta tan violência iha Dili no hadait ba to´o distrito sira ona. Konsekuencia saida tan maka Timor LoroSae hasoru waihira autores moral i material ba krise Politika Militar ne «Ilibido» katak sira la hetan sala tamba nebe maka envolve iha massakres no akontecimentus sira hanesan: Massakre Loron 28/04 no 25/05,Sunu mate emar moris iha uma laran,Harii EMA no Fahe kilat ba emar civil sira.Tuir akordo nebe maka Governo RDTL ho Australia halo maka oinsa maka estabelece data ka loron ba desarma no prende kilat iha Civil nia liman. Materializasaun husi akordo ne maka GNR ho Força Australia nian ba prende kilat no kaer Major Alfredo ho ninia elementus sira iha Loron 25/07 (Lusa,25/07). Liu fulan ida,Team Advogados Major Alfredo nian,halo deklarasaun katak “Detensaun Alfredo Reinado nian ne Ilegal (Lusa,20/08). No iha loron 30 fulan Agosto,Major Alfredo Reinado halai sai husi Kadeia Becora (Lusa,RDP i RTP,30/08). Liu loron ida Major Alfredo halo deklarasaun liu husi Video nebe âgencia Reuter iha acesso,deklara katak “la fiar konaba Tribunal Timor LoroSae, dehan tan katak pronto ba julga iha Tribunal Independente (Reuter,31/08). Iha ne kestiona maka akordo husi Governo RDTL ho Australia atu prende no kaer sira nebe maka iha Kilat,data ka loron limite maka 25/07,maibe lian bot maka ne Força Australiano sira foin hetan fali Kilat iha Eis-PM Mari Alkatiri nia uman iha fulan Agosto laran nebe liu tiha ona data ka loron nebe maka limite ba prende no kaer emar sira nebe maka iha kilat. Ita mos husu tansa maka team Advogados Major Alfredo Reinado nian akusa GNR prende Majors Alfredo Reinado ne ilegal. Base ba prende no kaer Major Alfredo Reinado ne maka akordo bilateral Governos RDTL ho Australia nian. Akordo bilateral ne konsidere hanesan akordo politiku tamba la iha «base legal», tamba akordo no tratado bilateral ruma waihira sai hanesan base legal kuando orgaun soberania sira hanesan Parlamento Nasional (PN) ratifika no Prezidente Republika (PR) promulga,hafoin bele aplika iha sistema judicial interna. Maibe autoridades sira bele argumenta katak Detensaun ne hodi estabelece ba ordem publika,maibe duvida maka ne,nusa maka Autoridades sira aplika «dois pesos e duas medidas» konaba prende kilat,data ka loron limite tuir akordos bilateral ne maka 25/07,neduni kaer Major Alfredo no prende kilat no kartus nebe hetan iha uma Major Alfredo nia uman ne. Maibe la komprende tansaida maka Autoridades sira la halo mos hanesan konaba Kilat nebe maka hetan Eis-PM Mari Alkatiri nia uman?Nusa maka foin foti kilat fulan Agosto laran no la prende eis-PM Mari Alkatiri?
Fila fali ba kaer Major Alfredo Reinado no elementus sira,waihira GNR ba kaer tamba hetan denuncia husi uma nebe maka Major Alfredo sira hela ba ne,ida ema Português ida nian. Ho akontecimentu ba Major Alfredo Reinado nian ne mosu tese oi-oin hanesan:
Ida (1); Detensaun Major Alfredo Reinado ne hanesan estrategia kontra ataka husi Eis-PM Mari Alkatiri kontra Xanana.
Rua (2);Iha tese seluk katak,detensaun ne hanesan koligasaun husi Servisu Secreto Portugal (SSP) ho grupos Mari Alkatiri (GMA) oinsa maka buka elimina grupos Majores (Reinado,Tara i Marcos),F-FDTL Petisaun sira,oposisaun politika sira no kritikus sira.
Tolu (3); tese ida tan katak Detensaun Major Alfredo ne hanesan estrategia husi Governo RDTL ho Australia nian konaba ba detensaun ba autores sira moral i material konaba massakres loron 28/04 i 25/05,EMA no fahe kilat ba emar civil,no sst. Kaer Major Alfredo hanesan loke odamatan ba kaer sira seluk,hare deit liu loron ida,Ministerio Publiku (MP) informa atu bolu Brigadeiro Taur Matan Ruak ba hatou ninia depoimentu konaba “Massakre iha loron 25/05 nebe provoka mate PNTL nain 10 no kanek nain 30(Lusa,26/07)”. Se kaer deit sira nebe maka responsavel iha akontecimentus hanesan:loron 28/04,25/05,sunu ema mate moris iha uma laran,fahe kilat no harii EMA, imagen saida maka Republika Timor LoroSae hatudu ba liur (mundo) no ba rai laran (Timor). Maibe liu fulan ida kaer Major Alfredo Reinado maibe Justisa no MP ladun hatudu sira nia kompetencia no imparcialidade,iha maka tendencia ba manipulasaun Sistema Judicial, Governo suspende deit funsaun ba Responsavel PNTL nian hanesan Paulo Martins,Ismael Babo no Lino Saldanha,maibe la hatene medidas sira maka PM no Ministro da Defesa foti konaba hirarquia F-FDTL nian nebe envolve iha krise Politika Militar ne.
Neduni iha biban badak oinsa maka maka Harii Sistema Justisa nebe Indepdendente!

*(1)Iha Akordo bilatera husi Governos RDTL ho Australia,hodi estabele data limite ba prende kilat no kaer autores sira maka loron 25/07,maibe tuir STL fo tatolin katak Força Australiano sira foin hasae kilat iha Eis-PM Mari Alkatiri nia uman iha fulan Agosto laran (STL i Lusa,01/08).
(2)Iha hakerek ne,sempre uja Majores Alfredo Reinado,Alves Tara no Marcos Tilman,tamba saida maka la hakerek sira Eis-Majores,tamba:seidauk iha ordem ida hodi hasae sira husi F-FDTL,nem tribunal civil ka militares ruma hola decisaun konaba ida ne.Neduni sei hakerek nafatin «Major»