Kasu F-FDTL Petisionariu La iha koordenasaun iha Governo Alkatiri

Hanesan hau nia hakerek artigos rua nebe STL hatun iha fulan Abril konaba krise iha F-FDTL . Ida (1),Iha hakerek uluk ho titul “«KRISE IHA F-FDTL NE REFLEKTE BA ELITES POLITIKA SIRA NEBE MAKA KAER UKUN IHA TIMOR ORAS NE
»(STL,01/04)”, nebe iha artigo foka liu ba analise relasaun «Kausa i efeito», Krise F-FDTL Petisionariu hanesan «Efeito» ida,logika saida maka ninia «Kausa»?Kausa ba krise ne maka reflekte ba «elites politikus sira nebe maka kaer Ukun iha Timor».
Rua(2),iha artigo ida seluk STL konaba “«Decisaun nebe konsidere Inconstitucional» (STL,08/04)”. Iha mos estudantes Timor oan sira nebe estuda iha liur,hanesan sira iha Hawai,USA nebe hatou ba Prezidente Republika,Xanana Gusmao no sira husi Coimbra nebe hakerek carta naran «Carta de Coimbra» hatou sira nia carta ba Prezidente Parlamento Nacional (PN), Francisco Guterres Lu-Olo,estudantes sira iha hanoin no preokupasaun konaba krise F-FDTL nian no sira nia lian menon ba Nai Ulun sira atu Hare,Hanoin no Hodi fihir didiak dalan nebe maka diak ba resolve krise ne.
Saida maka mosu,iha esforsu husi parte hotu,proprio Xanana Gusmao atu hadame sira F-FDTL Petisionariu ho hirarquia F-FDTL liu husi «Misa iha Domingo Pascoa»,maibe tentativa liu husi resolve problema krise ne la hetan solusaun,tamba deit F-FDTL Petisionariu sira la mosu,tuir Porta Voz Gastao Salsinha katak “F-FDTL sira trauma fila ba kuartel Metinaro(STL,17/04)”.
Depois Paskoa, la iha solusaun nebe Governo nudar executivo foti hatan ba exigencia ka tuntutan F-FDTL Petisionariu sira nian, neduni hahu loron 24 to´o 28 fulan Abril hanesan loron lima nebe maka F-FDTL Petisionariu hatou ba executivo Alkatiri atu resolve problemas nebe sira hatou liu husi «Petisaun ba autoridades sira». Resposta husi Executivo no autoridades Timor nian hatudu katak artigos rua nebe maka hakerek uluk konaba kasu ne «Hau Iha razaun» tamba falta koordenasaun iha Governo Alkatiri hodi hatan ba krise ne, reflekte duni ba elites politikos sira nebe maka kaer ukun iha Timor oras ne. Hare deit husi sira ida-idak ninia diskursu no atuasaun:

1. Taur Matan Ruak,nudar CEMGFA (Chefe Estado Maior Geral das Forças Armadas),iha deklarasaun balun halo ba journalista sira katak “«Kasu ne entrega ba Governo»”. Tamba Uluk Governo entrega ba CEMGFA,neduni Taur Matan Ruak foti decisaun nebe maka laos atu hakotu lian ne maibe halo naruk tan. Ba hirarquia F-FDTL katak situsaun F-FDTL Petisaun ne «problema kiik oan ida, problema bot liu maka funu Ukun rasik an ka funu iha guirilha kontra okupsaun Indonesia». Los duni Funu kontra Indonesia ne dificil duni,maibe oras ne laos tan Funu hasoru Indonesia,neduni laos uja tan argumentu ida ho problema nebe proprio hirarquia F-FDTL maka kria rasik.
Tuir deklarasaun nebe maka Taur Matan Ruak katak “«Oras ne fo fila fali ba Governo maka resolve»”. Krise ne,tuir lolos CEMGFA mos tenke iha responsabilidade politika nebe traduz ba pratika «Dimisaun»husi cefia no mos Komandante sira nebe envolve directa iha kasu hanesan Komandante 1º Batalhão F-FDTL,komandante seluk nebe halo deklarasaun hanesan sunu deit. Tuir informasaun nebe hetan katak”F-FDTL nian nebe bolu ba akalma situasaun,neduni sira aproveite hodi tiru manifestantes sira barak maka halai ba foho,nebe maioria husi F-FDTL Petisaun no apoiantes sira”. Iha ne hatudu hirarquia F-FDTL nian nia atuasaun hodi tiru sira manifestantes sira nebe halai ba foho ne,konfirma ba saida maka F-FDTL Petisaun sira nia reivindikasaun ka tuntutan katak iha «deskriminasaun» iha instituisaun F-FDTL nian. Justifikasaun ida tan maka F-FDTL ho ordem hirarqui F-FDTL (Taur Matan Ruak,Lere Anan Timor,Falur Rate Laek , no seluk tan) ninia ordem hodi tiru «Oho mate no Kanek» sira manifestantes nebe halai iha sexta (28/04) ba foho. Tamba atitude F-FDTL nian hodi tiru sira manifestantes ne hatudu katak “Sira hirarquia F-FDTL ninia atuasaun ne hanesan lalenok ida hatudu katak sira iha ohio ba sira F-FDTL Petisaun nebe husi Loro Mono”. Neduni sira be mate no kanek ne laos mate ka kanek «solteiro» maibe iha responsabilidade maka: Governo Alkatiri,Ministro Defesa,Dr.Roque Rodrigues,Hirarquia F-FDTL nian (Taur Matan Ruak,Lere Anan Timor,Falur rate Laek,no sst).

2. Governo Alkatiri. Mosu personagen hat (4): PM Mari Alkatiri,Ministro do Interior Rogerio Lobato, MNEC José Ramos Horta no Roque Rodrigues,Ministro da Defesa.
a) PM Mari Alkatiri iha ninia surumutuk nebe maka halao ho Prezidente Republika Xanana Gusmao iha Quinta Feira (27/04) ba Jornalista sira katak “Governo harii komisaun investigasaun ida hodi resolve krise F-FDTL Petisionariu. Tenik tan Alkatiri, Komisaun ne sei envolve komponente hotu-hotu:Governo,Parlamento Nacional, Igreja,Sociedade Civil (STL,28/04)”. Hanoin nebe maka Lu´Ólo konfirma iha deklarasaun ba LAFAEK.Com iha Quarta (26/04) katak “PM Alkatiri buka dalan atu resolve kasu F-FDTL Petisaun nian www.lafaek.com)”. Iha sexta (28/04) situsaun nebe iha inicio nebe hahu ho manifestasaun pacifico no preokupasaun husi executivo hodi harii komisaun investigasaun nebe «independente»,ikus mai transforma ba «violência» tamba deit iha Komunikadu husi Gabinete PM katak”«Manifestasaun ne ilegal»”. Iha ne tansa maka derepente Governo Mari Alkatiri muda posisaun?

b)MNEC,José Ramos Horta halo surumutuk ho Porta voz F-FDTL petisaun nian Gastao Salsinha iha Terça kalan (25/04) hodi hatou proposta konaba harii komisaun foun nebe (TP,27/04). Hare husi surumutuk nebe maka PM halo ho Prezidente Parlamento iha Quarta (26/04) no ho Prezidente Republika iha quinta (27/04) no MNEC,José Ramos Horta halo ho porta voz F-FDTL Petisaun nian iha Terça kalan (25/04), ne hatudu momos katak Governo buka duni dalan ba resolve krise F-FDTL Petisaun nian ne.

c)Ministro do Interior (MI),Rogerio Lobato, iha vizita nebe maka halo ba iha Bairo Quintal bot hodi halo deklarasaun katak “Se necessario,tau kilat iha Povo nia let (STL,28/04). No deklarasaun sira seluk tan,se bele PNTL bele show force, ka PNTL bele uja kilat hodi defende an, no sst. Deklarasaun sira ne provoka paniku iha sociedade Timor nia let,tamba povo trauma ho saida maka naran kilat,ida tan politikus sira hakarak ba fahe kilat ba povo civil nebe kontra Konstituisaun rasik,nebe hakerek katak «Knar ba kaer kilat maka PNTL no F-FDTL» maibe laos populasaun civil. Iha opiniaun balun nebe maka hetan husi pengamat politik no intelektual Timor nian maka ne:Krisi F-FDTL ne reflekte mos ba interesse politika iha Timor,liliu kalendario sira importante hanesan: Kongresso Fretilin iha fulan Maio,Eleisaun Legislativa 2007 no eleisaun Prezidencial iha 2008. Maibe hahu husi sexta (28) to´o oras ne (30/04) unika elementu husu Governo Alkatiri hamutuk ho Xanana buka akalma situsaun.

d)Ministro da Defesa (MD), hahu krise F-FDTL to´o oras ne ita seidauk rona deklarasaun ruma husi Dr.Roque Rodrigues. Tuir hirarquia Governo nian,nia maka tutela ba F-FDTL,kasu ne nia mos iha responsabilidade.Se uja patraun analise rai sira nebe maka demokrasia lao ba oin,krise ne MD mos tenke iha responsabilidade nebe implika ninia demisaun.

3. Prezidente Republika,Xanana Gusmao, Iha deklarasaun iha semana laran ba jornalista Timor nian katak “Seguransa entrega ba PNTL”.Akompanya no buka solusaun nebe ba kasu ne,nebe buka oinsa maka parte sira hotu bele simu. Hare iha ne Prezidente Republika ba poder konstitucional maka Konstituisaun RDTL atribuio ba Prezidencia Republika. Husi parte seluk,husi sociedade civil no F-FDTL Petisaun sira sei fiar ba Prezidente maka sei resolve ba problemas ne, Xanana ba hakalma sira nebe tauk halai ba refugiado iha Igreja Catedral Dili,Embaixada rai seluk nian iha Dili.

4. Sira seluk maka sala? Diskursu ida ne laos foun maibe sai ona hanesan «doutrina oficial» ba politikus sira,liliu sira nebe kaer Ukun iha Timor. Iha Tinan kotuk waihira Hirarqui Igreja Catolica organiza manifestasaun,mosu mos diskursu sira hanesan ne«Iha ema liur ka embaixada liur sira balun maka hamrik iha manifestantes sira nia kotuk». Ho krise F-FDTL nian ne mos,diskursu ida ne mosu nafatin iha vocabulario politikus Timor oan sira nian. Iha ne hakarak hatene deit,ema liur ka embaixada liur iha interesse ba kasu ne ka lae?interesse ba estabilidade ne regras jeral rai nebe deit maka hakarak halao relasaun diak ho rai seluk.Tuir Convenção Viena iha tinan 1961 nebe koalia konaba «Relações Diplomatica», embaixadores no diplomatas sira iha knar atu hatou ba sira Estado ka Governo saida deit maka akontece iha rai nebe sira serbisu ba,kasu konkretu Emabixada rai seluk nian nebe serbisu iha Timor sira iha obrigatorio atu halo relatorio konaba saida maka akontece.
Maibe iha ne mos ita la kompreende ba politikus Timor nian sempre hakarak fo sala nafatin ba buat nebe ita rasik maka kria ka fonte ba problema,waihira mosu sai problema bot no la konsegue resolve no ikus mai tuda sala ba ema seluk. Krise F-FDTL ema liur maka kria ka sira maka hamosu,laos hirarquia F-FDTL nian maka provoka krise?laos Governo Alkatiri maka la iha vontade politika atu resolve?Laos Ministro da Defesa maka iha kompetencia hodi resolve kasu ne hodi nonok deit?Baihira maka ita bele asumi katak «Ita mos iha kulpa ba buat sira nebe maka ita rasik maka kria».

5. Tribunal Rekursus (TR) ninia hanoin saida? Iha hakerek nebe maka STL hataun iha edisaun (8/04) konaba «Decisaun hirarquia F-FDTL ne ninia iha ka la iha Constitucionalidade»,.
No iha petisaun nebe maka F-FDTL Petisaun sira fahe ba orgaun soberania Estado nian,sira mos hatou ba TR nudar orgaun judicial Timor nian bele pronuncia tok ba kasu ne:decisaun hirarquia F-FDTL nian ho base ba regulamento interna Instituisaun nian hodi expulso ba F-FDTL nain 600 ne kompativel ka lae ho Konstituisaun RDTL?La kompativel konsidere «Inconstitucional». Tuir artigo nebe maka STL hatun iha edisaun (08/04) detekta konaba « Expulsaun 591 F-FDTL ne “INCONSTITUCIONAL (http://forum-haksesuk.blogspot.com»”.
Saida maka TR ninia posisaun konaba autoridade sira atu fahe kilat ba populasaun civil,favor ka kontra Konstituisaun?Tuir Agencia Lusa (28/04) katak “Komandante PNTL nia bot,Paulo Martins husu atu F-FDTL sira mos ba fo tulun ba halo seguransa (Lusa,28/04)”. Iha Konstituisaun Funsaun PNTL ho F-FDTL ne defini lolos no ida-idak ninia funsaun la hanesan,PNTL nudar seguransa (artigoº 147 ) no F-FDTL nudar «Defesa» (artigoº 146 ). Governo bele argumenta katak Atuasaun F-FDTL nian justifika tamba situsaun emergente neduni F-FDTL iha ligitimidade atu atua. Hare husi ninia kronologia ba krise F-FDTL Petisionarius sira ne,ita hare momos deit katak executivo Alkatiri nian maka hakarak alimenta krise no violencia no ikus mai justifika ba intervensaun F-FDTL nian. Atuasaun F-FDTL nian ne provoka liu tan sentimentu odio ba malu,tamba sira bele husi F-FDTL Petisaun hanaran an husi Loro Mono no sira be husi F-FDTL nebe simu ordem ba atua ne husi Loro Sae. Neduni sira be mate no kanek tamba atuasaun F-FDTL nian ne iha Sabado (29/04), sira be mate no kanek hatene katak “ konsekuensia husi atuasaun Soldado F-FDTL Loro Sae”.

Ikus maka ne: Tuir kronologi krise F-FDTL nian ne koresponde ba Elites politikus sira nebe kaer ukun iha Timor no falte koordenasaun no interesse politiku ida-idak nian maka joga ho krise ne. Neduni hakotu krise ne ho incidente nebe ninia impaktu negativu ba laran (Timor) no mos ba liur (Mundo).

Ba Laran: Sira be naran F-FDTL Petisionarius hotu-hotu husi Distrito sanulu (10) nebe Hirarquia F-FDTL nian dehan la Funu ba Ukun Rasik an tamba durante harii F-FDTL to´o hahu krise ne, sira petisionares akusa hirariquia F-FDTL nian sai hanesan «doutrina oficial» ba sira (Hirarquia F-FDTL,red),hanesan ritual ba sira iha han dader,han loron fahe rua (meio e dia,red) no han kalan maka dekor no kanta maka”«Loro Sae maka Funu no Loro Monu la Funu»”. Ninia konsekuensia politika maka ne;dificil ba kandidatu sira politikus ba karga hanesan Preizidente Republika,Prezidente Partido ka Sekretariu Jeral ba Partido Politiku, ba kargo seluk iha Estado, ho krise F-FDTL ne bele influencia ba decisaun, waihira kandidatu ba kargo bot ne husi Distrito tolu (3) nebe naran Loro Sae sira husi Loro Mono sei la fo tulun,mos hanesan sira kandidatu husi Distrito Sanulu (10) husi Loro Mono sira husi Loro Sae sei la fo tulun. Hanesan hakerek katak “Sira husi F-FDTL (husi Loro Sae) tiru mate no kanek sira petisionares noa apoiantes (husi Loro Mono)” aprofunda liu tan konflitus Loro Sae vs Loro Mono. Problema nebe laos bot maibe tan deit teimosia no egoismo elites politikus nian,hahu husi Alkatiri,Roque Rodrigues,Taur Matan Ruak,Lere Anan Timor no arogancia no sunu dor Falur Rate Laek nian nebe akese Loro Sae maka Funu no Loro Mono la Funu.

Ba Liur: Ba liur imagem nebe maka hatudu maka ne,ita ninia lider sira la iha kapasidade atu resolve problemas nebe maka mosu iha Institusaun Estado nian rasik. Krise F-FDTL hanesan lalenok nebe maka elites politikus sira hatudu maka ne buka hafahe emar Timor oan ba Loro Sae no Loro Monu ho objectivo politiku ida-idak nian,buka oinsa maka fo sala ba ema seluk ka bodas expiatoria.
António Ramos Naikoli* Cidadaun Timor Oan,hela iha Lisboa,Portugal!