Agrikultura Familiar: Forma ba Mudansa Sosial no Sustentablidade Moris Diak iha Timor-Leste

Agrikultura Familiar; 

Forma ba Mudansa Sosial no Sustentablidade Moris Diak iha Timor-Leste 

Por: Quintiliano Belo

Quintiliano Belo

Agrikultura nudar setór produtivu ida nebé importante atu dudu ekonomia Timor-Leste iha futuru. Seitor ne’e sai patrosinador prinsipal iha futuru tanba tinan ida ba tinan ida seluk rekursu mina iha tasi laran sei hotu no sei maran. Tanba ne’e laiha duvida ba kualker sidadaun ida atu hateten seitor agrikultura iha Timor-Leste laos prioridade iha dezenvolvimentu nasional. 

Rajaun fundamental nebé haforza seitor ne’e importante no tenki sai prioridade iha dezenvolvimentu nasional maka, seitor ne’e forma husi maioria uma kain kuase 70% ba leten. Rajaun ida seluk maioria husi sira maske ho karater agrikultor subsistensia, maibe sira loro-loron iha kapasidade atu prodús ai-han importante ba sira nia uma kain sem depende ba governu ate iha vontade forti atu muda-an ba moris nebé diak liu iha sira nia sosiedade. 

Loos katak, governu Timor-Leste konsege resolve ona buat balun hodi atinji metas nebé hakerek iha PEDN, maibe realidade hatudu ate agora alvu prinsipal atu transforma agrikultura subsistensia ba agrikultura emprezarial laiha mudansa, no ne’e akontese tanba problema mikro sira hanesan;

1. Governu haluha tiha tau prioridade masimu hodi halo investimentu estra-ordinaria ba agrikultor hanesan autor hodi atende treinamentu formal no naun formal nebé ho espesialidade espesifiku. Att liu tan dezenvolvimentu agrikultura nebé agora lao dadaun laos dezenvolvimentu partisipatoria, maibe dezenvolvimentu nebé halo ema sai nudar objetu. Signifika Agrikultor laos sujeitu iha dezenvolvimentu maibe Agrikultor sai fali objeitu iha dezenvolvimentu.
   
   
2. Governu laiha seriedade atu halo investimentu espesial hodi hamoris korenti agronegosiu ho modelu integradu no interligadu entre sub-seitor sira hahu kedas husi Upstream agribusiness, on-farm agribusiness, service to agribusiness ate Downstream agribusiness.
   
   
3. Governu ladauk iha politika ida nebé klaru atu aplika modelu dezenvolvimentu agrikultura, no modelu nebé agora lao dadaun la refleta realidade no nesesidade agrikultor nian, basa 60% uma kain iha deit rai entre 0.5-2.0 há, no 40% rai lolon nomos maioria depende ba udan ben hodi halo produsaun.  

Husi problema mikro hirak iha leten atan hau bele dehan, uma kain agrikultor iha Timor-Leste sei laiha nosaun atu hadiak sira nia-an iha futuru oin mai, karik governu rasik la kompreinde no la konsidera ate lakoi tane ass problema mikro temi dadaun nudar problema urjenti iha politika dezenvolvimentu agrikultura nian, no halo fali investimentu ba prioridade nebé laos urjensia hanesan deit ho mal gastus. Sosa sepatu nebé hanesan ho medida ain nian, laos sosa sepatu nebé nia medida bot liu fali ain no fim ita la uza sepatu ne’e.  Taur Matan Ruak hateten iha  RTTL, 090317.

Tanba ne’e atan hau nia hanoin, diak liu hahu agora promove modelu agrikultura ida nebé bazea ba nesidades, badaen, jestaun, mobilizasaun rekursu nebé bai-bain peritus sira hanaran agrikultura familiar tanba simplesmente iha Timor-Leste agora dadaun ezisti hela: 

1. Maioria agrikultor uma kain halao atividade agrikultura ho sistema subsistensia no kumunga filosofia risk minimization no safety first. Signifika sira nia kapasidade produsaun nato’on deit, sira la iha rai ne’ebé luan, sira pratika hela sistema agrikultura tradisional, sira produz la iha orientasaun ba merkadu tanba depende deit ba udan ben no sira produs la’os buka rendimentu ekonómiku.‘kuda ohin para hodi bele han iha aban’.
   
   
2. Maioria agrikultor uma kain iha forza nudar komunidade “pra-kapitalista” ho prinsipius rasionalidade sosial nebé metin no forti. Sira kumunga forza kolektivismu duke halo kompetisaun no utiliza prinsipiu ekonomia moral nudar fundasaun duke ekonomia rasiosinu. Signifika sira laos agrikultor primitivu lakoi mos atu sai agrikultor modernu liu, maibe sira iha nosaun firmi atu muda sira nia moris nebé diak liu nudar sosiedade ida iha Timor-Leste.

Atan hau mos konkorda ho ema barak nia hanoin katak, tenke apresia agrikultor subsistensia ka tradisional uluk molok hahu modelu dezenvolvimentu nebe ladauk merese iha Timor-Leste. Basa maioria husi sira iha vontade diak atu hadiak ekonomia uma kain hodi hetan moris ho dignu no kualidade pra sempre ho simplesidade. Nune’e obrigasaun pratika ida nebé governu kopia husi nasaun avansadu sira seluk hanesan Thailandia, Xina, Australia, Portugal, no Brazil ect, tuir hau nia hanoin laos  urjensia maibe dezastre.

Argumentu refere ironika tebes iha era globlizasaun hanesan ohin loron. Maibe kuandu hare no kompriende didiak fila fali, problema kopia no paste pratika laos problema nia abut, maibe problema nia abut lolos maka governu Timor-Leste ate tinan 2016 nia rohan lakonsege lori agrikultor ba situasaun moris nebé diak liu. Pior liu tan agrikultor sira nia moris iha area rural att liu fali situasaun moris ida antes, signifika katak, durante ne’e governu hatene halo maibe lahatene atu atinji saida haktuir maun Taur Matan Ruak iha RTTL, 090317.

Biar nune’e familia uma kain hirak ne’e, dezenvolve-an nafatin utiliza esperiensia tradisional nebé mai husi jerasaun familia ida antes, jerasaun nebé laiha kursu spesifiku kona ba pratika agrikultura ho tehnolojia modernu no halao vida agrikultura iha sira nia vida moris tomak iha sira nia tempu. Tanba ne’e tuir sira nia hanoin pratika agrikultura tradisional sai nudar mestri diak hodi aprende rasik atu diskobre oportunidade no desafiu sira nebé ikus mai lori sustentablidade moris diak no atinji objetivu final sira hanesan tuir mai;

1. Aspeitu ekonomia; rendimentu husi produsaun agrikula sei lori moris ne’ebe diak no sustentavel. Basa kualidade produtus agrikula aseguradu no insufisenti ai-han eradikadu. Produz ho kuantidade no kualidade tuir standarte internasiional ate sai nudar forza hodi asegura inseguransa ai-han no bele kompete iha merkadu regional no internasional hodi hetan lukru nebé diak liu iha futuru tanba uniku no Timor-Leste deit mak nain ba produtus refere.
    
2. Aspeitu sosial; Resultadu husi produsaun agrikultura sei lori impaktu direitamente ba agrikultor rasik no nia sosiedade. Explora no utiliza potensialidade no abelidade rekursus lokal ate prontu atu halo kompetisaun resultadu produsaun koletivamente.
   
   
3. Aspeitu ekolojia; Kultura pratika agrikultura nebé  respeitu natureza no garante  nafatin establidade ekosistema natureza nian. La utiliza pakote tehnolojia moderna, maibe lori valor kultural atu promove, haforza, habelun-an no preserva rekrusus ekosistema ba jerasaun sira tuir mai hodi utiliza ho masimu iha futuru. 

Husi deskrisaun iha leten hau bele dehan katak, karik hahu agora governu seriu utiliza modelu dezenvolvimentu nebé aproriadu bazea ba abilidade rekursu, nesesidade, jestaun no badaen kada uma kain agrikultor iha area rural, hau fiar no garante agrikultura Timor-Leste sei sai agrikultura ida nebé bele lori rendimentu sustentavel hodi suporta kresimentu ekonomia nasional tuir lojiku simples tuir mai; Agrikultor iha Timor-Leste hori otas hori wain defini-an katak moris ho vida agrikultura mak dalan moris (way of life) hodi asegura moris loron-loron nian. 

Kultura agrikultor Timor-Leste serve atu adapta modelu dezenvovimentu agrikultura familiar tanba nudar abut ba prosesu transformasaun sosial no sustentablidade moris diak ba sira nia-an rasik no sosiedade iha sira nia knua. Sira mos fiar katak, seitor agrikultura neneik ba bei-beik sei lori rendimentu nebé sustentavel ate rendimentu mediu-altu iha tempu oin mai.