VISAO MISAO OBJECTIVO HAKSESUK BOLA FH KKN HOME FH LPV ARTIGOS FH MUZIKA LIA MENON FH RESPONDE

20181113

“Sacramento Politico”: Memoria ba Centenário (tinan 100) Mgr. Martinho da Costa Lopes


“Sacramento Politico”:
Memoria ba Centenário (tinan 100) Mgr. Martinho da Costa Lopes

Housi: Martinho G. da Silva Gusmão
Docente Filosofia Politica


Iha 11 de Novembro 2018, ema oituan de’it mak hanoin hetan katak Administrador apostólico, Monsenhor Martinho da Costa Lopes halo tinan 100 ba nia moris. Nia Martinho moris iha Laleia, 11 de Novembro de 1918. Dom Carlos F.X. Belo SDB hakerek netik oituan iha ninia FB. Foinsae sira husi paroquia Becora convida hau atu ko’alia konaba ba loron massacre Santa Cruz, 12 de Novembro de 1991. Hau “secara halus” lori sira nia hanoin ba Dom Martinho Lopes no Nicolau Lobato. Artigo ida ne’e hakarak atu hatur hikas pensamento konaba ema na’in 2 ne’e iha historia ukun-an ba Timor-Leste.

Ita nia problema boot: ema ida ka rua iha Fretilin no CNRT ko’alia bebeik “hasai batina mak halo politica”. Hau la dehan partido Fretilin ka CNRT, maibe ema ida ka rua! Hare didiak: ema sira be ko’alia ne’e mesak Timor-oan no dala ruma sira mos sarani católico karik! Wainhira ko’alia nune’e, sira hanoin katak sira defende Igreja Católica? Lae! Sira hakarak atu elimina Igreja Católica husi historia Timor-Leste, atu nune’e sira bele ko’alia avontade katak sira mak funu-na’in, sira mak aswain mesak iha Timor-Leste. Sira hanoin sira sarani di’ak atu defende Igreja nia doutrina? Lae! Sira hanoin katak ita sai inimigo ba malu? Lae! Igreja Catolica la halo inimigo ba ema ida, sa tan sarani rasik! Igreja Catolica nia inimigo mak “diabo”. Biblia hanorin katak Diabo mai hanorin doutrina mesak furak maibe lasu ema atu contra Maromak rasik (nune’e Adão ho Eva monu ba pecado original; Caim oho nia alin Abel); Diabo mai koko Jesus Cristo atu hakneak no tuku tur ba rai hodi adora ukun nain sira nia “poder” (Mateus 4, 1-10; Marcos 1, 13; Lucas 4, 2). Too Diabo mak habosok Pedro (Bispo? Padre?) no tama iha Judas nia laran atu sai “traidor” (koruptor) hodi saran Jesus Cristo ba mate! Nune’e, S. Paulo ko’alia momos kedas “O Deus da paz há-de esmagar Satanás debaixo dos vossos pés, muito em breve” – “Semoga Allah, sumber damai sejahtera, segera akan menghancurkan Iblis di bawah kakimu” (Roma 16, 20).

Nudar padre, nudar sarani, nudar Timor oan, ita lalika hakruk no tauk ba Diabo! Ita harohan atu sira nebe hateten at Igreja, hatun Padre ka Bispo sira nia naran hodi hafoer, ... S. Paulo dehan “muito em breve” (segera akan) rahun, iis no dodok, ka tama ICU iha Hospital Guido Valadares.

Saida mak “Sacramento politico”?

Iha Igreja Católica ita hatene sacramento hitu (7): baptismo, eucaristia, crisma, reconciliação (kasu salan), unção (mina ba moras), ordenação (sai na’ilulik) no casamento. Ho liafuan bada, sacramento katak sinal graça nian atu ema bele hare ho matan no koko iha moris mistério Maromak nian nebe haksumik-An nudar mistério ba ita ema nia matan no nia moris.

Saida mak “sacramento politico” (SP)? Conceito SP la’os sacramento dawalu (8). Husi liafuan “politica” ita tenki dehan katak sarani tomak nudar cidadão ida labele soe ketak moris husi politica. Politica la’os partido ninia custa. Bispo sira no Padre sira nebe moris iha Timor-Leste, sira cidadão Timor labele husik hela politica. Hanesan Nicolau Lobato dehan, “Não deve haver nesta terra neutros no processo político que ora está a decorrer. Porque não há homens apolíticos numa conjuntura como esta ...” (Labele mosu iha rai ne’e ema sira be neutro iha prosesu politico nebe lao namanas hela. Tan la iha ema ida mak apolítico iha conjuntura ida ne’e ... 1974/ 1975 nian). 

Igreja Catolica iha Timor-Leste hakesi nia-an ho politica rai Timor nian, atu halo promoção konaba Ema nia moris di’ak, justiça, damen no bem comum (Concordata 2014, artigo 1º n. 2). Ida ne’e tuir kedas saida mak Estado halo, “promover a edificação de uma sociedade com base na justiça social, criando o bem-estar material e espiritual dos cidadãos” (CRDTL, artigo 6o alínea e]). Ne’e duni iha liafuan rua mak hanesan “justiça” no “bem comum” (Igreja Catolica nia hanorin)/ “bem-estar” (Estado nia knar).

Iha “politica” husi kedas filosofo Sócrates, Platão no Aristóteles to’o ohin loron, matenek nain hare no kaer liafuan “justiça” nudar sasukat. Iha Biblia, ita rona Profeta Miqueias dehan, Maromak la husu buat seluk buat let ba ita ida-idak maibe mak ne’e de’it: “hatudu hahalok justiça (praticares a justiça), hadomi liu mak buat be fiar ba malu (amares a lealdade), no hakat ho haraik-an iha Maromak Futar Oin (andares humildemente diante do teu Deus” (6, 8). Jesus Cristo rasik dehan ho lian maka’as “Wainhira ó nia justiça mak la di’ak liu doutor Lei sira no fariseu sira nian, ó sei la tama Reino Lalehan” (Mateus 5, 20). Na’i Jesus Cristo hanorin duni: “... ukun fuan lolos nian mak justiça, laran sadia, no fiar metin ba malu” (Mateus 23, 23).

Oinsa ho “sacramento”? Fiar sarani nian, tuir S. Ireneu nia liafuan katak “Gloria enim Dei vivens homo, vita autem hominis visio Dei” (Adversus Haereses, IV.20.7) – Gloria ba Maromak leten aas ba sei hatudu iha ita ema nia moris, no ita ema nia moris sei foti aas/ tane metin wainhira hatudu Maromak nia Futar-Ilas. Ireneu hato’o liafuan ne’e atu fo hanoin konaba mistério incarnação: liu husi Na’i Jesus Cristo nia moris iha rai ne’e, ita hare Maromak nia Futar-Ilas – “Verbum caro factum est” – Maromak FutarLia nakfilak ba ema no horik hamutuk ho ita (João 1, 14). Nudar sarani, loro-loron ita halo oração Angelus. Iha misa loron Natal nia, ita rona liafuan ne’e!

Iha Natal 1974, Nicolau Lobato hatoo nia liafuan katak ita sarani celebra loron “Redenção” (Maksoy nian) hanesan loron “Libertação” (ukun rasik-an) nian. Wainhira ita hanoin hikas Maromak nia Gloria iha Lalehan leten aas ba, ita mos haksolok tan loron ne’e ita hare paz iha rai klaran ba ema laran di’ak sira. Atu bele hetan ksolok ida ne’e, ita labele kahor moris ne’e ho sasan partido nian. Hases tiha lai partido, ita hotu moris hamutuk iha fiar ida de’it, néon ida de’it. Tan ne’e ita hananu, Gloria in excelsis Deo, et in terra pax hominibus bonae voluntatis.

Saida mak Nicolau Lobato hanoin no hatoo ne’e mai husi ninia fiar nudar sarani católico! Ema hotu hatene katak nia líder revolucionário no carismático ida nebe fiar metin duni ba Maromak, no moris tuir nia fiar católica.

Nune’e, Sacramento Politico katak sarani ida-idak nudar cidadão Timor banati tuir lia-menon Amo Papa Francisco nian liu husi Bispo sira katak, “o primeiro, a vossa contribuição como consciência crítica da nação; o segundo, movida por entranhas de misericórdia, a Igreja inteira sai em missão; e, enfim, exprimir a Boa Nova da salvação nas línguas locais” (cfr., discurso do Papa Francisco aos Bispos da Conferencia Episcopal de Timor-Leste, em visita Ad limina Apostolorum, 17 de Março de 2014).

Consciência critica da nação

Uluk knana’in, Amo Papa Francisco husu atu Bispo sira no Amo-Lulik sira hamutuk ho sarani sira atu hatudu-an nudar “consciência crítica da nação”! Ne’e katak, Bispo no Padre sira hamutuk ho ninia sarani matenek-na’in sira labele taka matan, taka néon no taka fuan ba Nação nia moris. Fanu nafatin ita nia matenek, matan moris nafatin ba ita nia rain, néon nain nafatin ba ita nia Povo.

Liafuan “critica” la hanesan ho “insulta” ka hateten at. Matenek na’in sira hanesan Immanuel Kant hanorin konaba filosofia nudar “Tribunal ... the critique of reason ... the power of reason” (cfr., Critique of Pure Reason, “Preface” Axii); F.G.W. Hegel hanorin katak wainhira ema ko’alia husi kalohan leten no la sama iha rai leten, nia “uncritically” (hanoin la kritiku) moris namlele; ema matenek tenki hanoin “necessarily dialectical” (labele hases-an husi dialektika); Karl Marx ko’alia konaba “ideology critique”.

Tan sa mak ema ida ka rua iha Fretilin no CNRT nia laran tur la metin no toba la dukur, wainhira hau hakerek artigo ruma ka ko’alia iha media TV sira? Hau hanoin nudar sarani be halo politica, sira tauk ba sira nia consciência rasik no hamaten sira nia fuan no néon. Sira tauk ba Maromak nia FutarLia nebe uluk sira rona nudar Povo baibain, agora sira sente-an hanesan “maromak rai klaran”. Hanesan São Jeronimo dehan, consciência hanesan néon badasuk oan ida nebe la lakon husi Adão nia peito maski Maromak duni sai ona nia husi Paraiso. São Boaventura dehan consciência ne’e naroman ida nebe Maromak tau iha ema nia intelecto. Atu besik liu, São Tomas de Aquino dehan, “bonum fascendum, malum vitandum” – katak buat diak ita halo, buat aat ita soe (STh. I-II. 92, 2).

Mgr. Martinho da Costa Lopes dehan dala ida, katak, “... somos muito inclinados para o esquecimento de maneira que se não houver qualquer que venha lembrar, oportuna ou importunamente, a questão provável de Timor-Leste eu creio que pouco a pouco iria deixar de ficar no ouvido e acabaríamos por esquecer tudo” (23 de Outubro de 1984). Ita hotu hakarak liu atu haluha-rai ka haluha-an nune’e ita lakohi ka la iha ona buat ruma atu hanoin tuir, iha biban ka la iha biban ruma, lalaok Timor-Leste nia moris hau fiar katak neneik no bebeik buat hotu sei too de’it iha tilun no sei haluha mohu deit. Dom Martinho hanoin katak, iha politica no iha luta ba ukun-an, aswain sira buka nafatin atu “sensibilizar” (fo hanoin nafatin ho fuan laran) konaba Povo nia terus no susar.

Liafuan nebe Dom Martinho Lopes ko’alia, hanesan los saida mak Nicolau Lobato ninia “sensibilizar”, katak Timor oan sira aten barani, funu-na’in aswain sira nudar Um povo que surge do desumano sistema colonial” (Povo ida be hamrik hikas husi sistema kolonial nebe desumano); “Um povo que renasce das cinzas do esquecimento” (Povo ida be moris hikas husi akudesan haluha nian); Um povo que retoma a consciência de si mesmo” (Povo ida be kaer hikas consciência konaba nia an rasik).

Dom Martinho Lopes no Presidente Nicolau Lobato (sai husi Escola Soibada), futu-lia ida de’it – POVO mak luta, POVO mak hanoin, POVO mak moris, POVO mak mate.

Ema lubuk oan ida tama iha Partido politico, hanoin katak sira mak maromak; sira mak bele halo buat hotu-hotu, halo ona lalehan ho rai, no buat hotu ema hare no mos la hare. Wainhira iha Partido laran mak líder no militante hanoin nune’e, então sira sei halo nafatin odio no vingança ba “consciência critica da nação”. Nune’e, sira haketak consciência POLITICA ho consciência MORAL. Tan ne’e mak iha Partido nia laran ema lakohi rona Dom Martinho no Presidente Nicolau? Wualahu-aalam (se mak hatene)?

“Entranhas misericórdia ... Igreja inteira sai em missão”

Politica beik no maubengo sira mak dehan, “Amo sira la ba halo missa no hare sarani sira mai fali mete politica”. Tuir hau nia hanoin, ema sira laos luta nain. Sira la hatene katak husi kedas Nicolau Lobato no Xavier do Amaral, Povo fiar katak lori Amo sira, lori batina mutin sira mak funu ne’e la’o ba oin! Nicolau Lobato ko’alia momos kedas katak, la iha ema ida mak “neutro” ka “apolítico”. Timor oan hotu, ema tomak be moris iha Timor mak luta ba ukun-an. Ne’e katak, “batina mutin” mos la ses husi politica.

Tuir Nicolau Lobato nia hanoin, ema sira be mosu mak derepente kokorek no kokotek tolun la iha ne’e mesak “reaccionário” no “oportunista”. Nia dehan katak sira ne’e mak “procuram entrar no jogo sem se comprometerem, são os que tentam mover outros para o barulho, para a luta política e se põem detrás dos bastidores a observar a cena, a ver para que lado verga a balança e, depois do trabalho feito, se reclamam ruidosamente o direito de também dividir o bolo” (koko tama iha jogo nia laran maibe lakohi halo kolen-an, sira ne’e mak dudu ema seluk atu ba halo barulho, ba luta politica no hamrik iha kotuk hodi hateke tun sae lalaok sira, hare took sasan sira ne’e halis ba ida nebe, nune’e wainhira ema servisu kolen hot ona, sira mos mosu mai hodi sisi halo lian maka’as paralon sira nia direito atu fahe lisuk bolo/ dosi). Ne’e nia hatoo iha manifesto FRETILIN, 20 de Setembro de 1974 (iha foto Xanana Gusmão hamrik iha Nicolau Lobato nia sorin).

Dom Martinho da Costa Lopes hateten, “Não podia ficar silencioso perante a violação dos direitos humanos. Foi a minha missão defender este povo pobre, marginalizado e sofredor” (Hau labele duni taka ibun metin wainhira iha hau nia oin mosu violação ba direitos humanos. Hau nia missão duni atu defene POVO kiak ida ne’e, marginalizado no terus nain). Tan sa iha tempo nebe la iha manu inan mak kokorek ka manu aman mak kokotek (sengaja hau hakerek terbalik), atu hakilar Dom Martinho Lopes lalika loke ibun ka mete politica, no haruka nia ba halo missa de’it? Tauk-ten no ikun tuuk, los ka lae? Agora mak kokorek no kokotek, los ka lae? Nicolau Lobato dehan duni, funu hotu tiha mak “reaccionário” no “oportunista” sira mak atu haklalak husu fahe dosi (20.11.1974).

Hau hanoin Dom Martinho Lopes hatur ona Igreja Catolica ninia missão, katak “Quando nós arriscamos por um ideal estamos prontos a sofrer tudo, ate própria morte” (Wainhira ita hatama-an iha risco laran tan mehi ida, ita hotu pronto duni atu terus ba buat hotu, to’o mate). Lae, uluk nee maubengo no maubeik sira tauk mate. Sira tauk foti risco. Sira tauk Dom Martinho Lopes loke ibun. Sira manobra atu hasai Dom Martinho. Agora, mehi ukun-an ne’e to’o ona mak sira mosu mai haruk Batina Mutin labele halo politica. Wainhira terus no susar mosu ona ... ka eleição iha odamatan ona mak loro-loron misa la falta.

Wainhira mosu massacre iha Kraras, Viqueque (1982) ... ema hotu tauk mate, ema tomak nakdedar no subar meti-metin iha uma laran, Dom Martinho da Costa Lopes mak hamrik iha TNI/ ABRI nia oin hodi dehan “... em virtude da missão profética, que me assiste, sinto-me na necessidade imperiosa de denunciar ao mundo inteiro, como fiz esta tarde, o genocídio que se está praticando em Timor para que, ao morremos, o mundo saiba ao menos que morremos de pé” (... iha roman missão profética nian, nebe hau kaer iha liman, hau sente labele duni halai husi knar boot ida ne’e atu haklaken ho lian-maka’as ba rai tomak, hanesan hau halo loraik ida ne’e, konaba ba genocídio nebe ema sira halo iha Timor atu nune’e, ita hotu mate karik, mundo tomak hatene katak ita mate iha ain-leten/ mate ho aten brani hamrik).

Ne’e hanesan saida mak Nicolau Lobato dehan, “a última bala é a minha vitoria” (kilat musan ikus liu hau manan)? ... ka dehan ba nia belun escola Padre Alberto Ricardo da Silva (bispo) “Quando souber da minha morte, reze uma missa por minha alma” (wainhira rona lia konaba hau nia mate, reza hela misa ida ba hau nia alma). Hanesan los wainhira Mau-Koli mate iha Maubisse, 1974, nia hare fo fuan tomak katak POVO ki’ik sira bele “... deu o seu sangue pela sagrada causa da libertação do nosso povo” (fakar nia ran ba knar lulik atu halo libertação ba povo rasik).

Hau sente liafuan hirak ne’e mak hanaran “entranhas misericórdia”, hare ba POVO nia terus, hare ba POVO nia halerik ... Bispo no Amo-lulik sente iha fuan laran too kabun laran “necessidade imperiosa de denunciar” (hamrik metin duni ho knar boot atu haklaken).

Boas Novas nas línguas locais

Ikus liu, Bispo no Padre sira hanesan Apostolo sira uluk la lori bukae eh kohe, la iha osan ka buat seluk tan. Dom Martinho dehan “Não temos dinheiro. A nossa força é apenas a razão, a justiça e Deus” (1986) – Ami la iha osan. Ami nia kbiit mak razão de’it, justiça no Maromak.

Wainhira Papa Francisco dehan ba Bispo sira atu haklaken Evangelho iha “línguas locais”, ne’e la’os de’it iha Fataluku ka Makasae, Waima’a ka Nau-eti, Tetum ka Bunak, Mambae ka Kemak, Baikenu ka Galolen ... no “língua materna” barak iha Timor-Leste. Amo Papa temi liafuan “justa hermenêutica” lori hatudu katak, “línguas locais” ne’e hatudu ba liafuan sira mai husi POVO/ SARANI nia moris. Sira rona Evangelho, ikus mai sira hatan ho knanuk katak “liu husi rai fuik ema halerik, liu husi nakukun ema tanis”. Iha misa laran ka halo procissão iha dalan boot sira, ita rona POVO/ SARANI hananu ho liafuan sira “terus”, “tanis”, “hamlaha”, “hamrok”, “moras”, ... to’o “mate”.

Karl Marx dehan buat furak tebes: “Religious suffering is at the same time an expression of real suffering and a protest against real suffering. Religion is the sight of the oppressed creature, the feeling of heartless world, and the soul of soulless circumstances. It is the opium of the people(Sofrimento religioso iha biban hanesan hatudu sofrimento real no protesto hasoru sofrimento real. Religiao ne’e fatin ba ema terus nain sira, fatin sentimento nian ba mundo nebe fuan laran lakon ona, klamar ba moris be klamar la iha ona. Nia hanesan opio ba povo). Ema nebe la kaer kona livro Marx nian, maibe mangame paralon ko’alia konaba religiao la hatene katak Mundo ne’e fo terus no susar barak ba POVO. Wainhira sira la hetan ona POLITICO sira mai defende ka tulun sira iha terus no mate nia larna, POVO halai ba RELIGIÃO. Marx “defende” Povo no Religião! La’os hamaten religião.

Molok Marx, filosofo seluk naran Edmund Burke ko’alia ona konaba “political value of religion” – katak, ema hotu nebe halo politica hakarak de’it buka atu hadau poder (ho dalan hotu-hotu), maibe wainhira hetan tiha ukun sira lakohi hola responsabilidade konaba oinsa mak “uso do poder” ne’e, sai fali “abuso do poder”. NAÇÃO no POVO nia moris la depende ba ESTADO nia PODER, maibe liu-liu responsabilidade oinsa mak halao knar ukun rai ne’e.
Loron ida, molok atu husik hela Timor, Dom Martinho hateten katak, POVO/ SARANI tomak koko atu “viver na esperança para resistir” (moris iha esperança nia laran hodi resiste). Nia bolu nafatin ninia sarani sira atu “vamos vivendo essa esperança, porque o catolicismo é uma religião de esperança” (mai ita hamoris esperanca ida ne’e, tan fiar katolika nian hanesan religião esperanca nian). Nia dehan ida ne’e iha Lecidere, 4.10. 1983 – ikus mai, nia husi Dili, 12 de Maio de 1983 duni.

Boas Novas (Liafoun Diak) ba Povo Timor mak “esperança”. Hanesan São Paulo dehan, “De facto, foi na esperança que fomos salvos” – Sesungguhnya dalam harapanlah kita semua diselamatkan (Roma 8, 24). Tan ne’e mak filosofo marxista ateu Ernst Bloch dehan katak religião Católica (Cristão) hanesan religião esperança nian – “Dove c’é la speranza, ivi la religione” (iha nebe mosu esperança iha neba religião moris). Dom Martinho Lopes haklaken katak catolicismo ne’e hatur iha esperança nia leten.

Nicolau Lobato dehan, A madrugada de 25 de Abril de 1974 teve repercussão direta nos destinos do nosso Povo. A madrugada de 25 de Abril abriu ao nosso Povo um novo horizonte – um horizonte de esperança (dader-san nakukun 25 Abril 1974 hamosu lian-foun mai los kedas ba ami nia POVO nia destino. Dadersan nakukun 25 Abril loke ba ami nia POVO horizonte foun ida – horizonte esperança nian).

Lorosae tun ba loro-monu, husi tasi-feto ba fali tasi mane TIMOR néon ida de’it, laran ida de’it, mehi ida de’it, lian ida de’it: UKUN RASIK-AN. Se mak lakohi tau liman fuan iha luta ba UKUN-AN, nia la haten halo politica maibe hadau de’it mak poder.

Klak-Fuik, Becora
1918 – 11 de Novembro – 2018

Sem comentários:

Enviar um comentário

Nota: só um membro deste blogue pode publicar um comentário.