VISAO MISAO OBJECTIVO HAKSESUK BOLA FH KKN HOME FH LPV ARTIGOS FH MUZIKA LIA MENON FH RESPONDE

20090122

Mari Alkatiri no debate OGE2009

Husi António Ramos Naikoli*

Hahu debate konaba Orçamento Geral Estado 2009 (OGE2009), Mari Alkatiri nudar líder oposisaun, la hola parte iha diskusaun ka haksesuk malu konaba debate nebe importante ba Nasaun ida ne´e. Tamba hahu husi loron tolu haksesuk malu iha parte generalidade Mari Alkatiri ninia konsentrasaun ba buat seluk fali, oinsa maka kontra informasaun ba Jornal ka media nebe koalia no hakerek konaba Osan nebe husu ba Governu atu hadia nia uma, nia preokupa liu ho ninia imagen nudar líder do ke preokupa ba debate nasional.
Iha quinta Feira (15/01) wainhira STL hatun noticias konaba ”Alkatiri husu izmola ba Governo AMP”. Mari Alkatiri preokupa liu quando deputado Riak Leman husi bankada PSD foti konaba izmola Mari Alkatiri ba Governu ho base ba noticias nebe STL hatun. Tuir testemunya sira nebe sai sasin ba akontecimentu ida ne´e katak “Mari Alkatiri tuir debate iha uma, wainhira hare Deputado Riak Leman foti konaba kasu ne´e. Mari Alkatiri halai husi uma iis bot mai uma Fukun ka Parlamento Nasional (PN) hodi buka koalia ho Riak Leman konaba izmola ninian ba Governo”. Iha loraik fali Deputadu Renan foti tan asuntu ne´e «hodi hatudu dokumentus nebe maka Mari Alkatiri husu ba Governu AMP tulun nia ba hadia nia uman».

Iha loron ne´e duni (15/01) Mari Alkatiri liu husi konferencia imprensa dehan ba journalista katak «nia la husu izmola ba Governu AMP», ka tuir hakerek STL nian katak “Rezeita Tane Liman ba AMP (STL, 16/01)”.

Iha debate OGE2009 nebe liga ba ho kasu Mari Alkatiri nian hanesan husu osan ba Ministério Finanças (MF) hodi rehabilita nia uma, husu kareta foun Prado 4 x 4 no despesas seluk tan (Hare karta nebe maka Mari Alkatiri haruka ba MF, nebe STL iha acesso). Noticias seluk nebe STL no diários seluk hatun konaba «Bolsa Estudos husi Petronas iha Mari Alkatiri nia Ukun ka kaer Governu». Iha ne´e hakarak halo ligasaun entre diskursu politiku husi bankada Fretilin no dait ba ho kasu sira nebe maka envolve Mari Alkatiri rasik, hanesan:
Despesistas:

Iha debate loron tolu OGE209 iha generalidade (14, 15 i 16 Janeiro), husi bankada Mari Alkatiri/Fretilin nian akusa Governu AMP ho termo «Despesista». Tamba deit osan ba OGE 2009 aás, salarius ka vencimentu orgaun soberania sira mos hasae, no sst.

Maibe hare ba polemika konaba Mari Alkatiri nebe husu ba MF (Minsiterio Finanças) atu fo osan ba rehabilita ka hadia nia uma ho valor 340.544,28 USD (tuir doc. ENSUL, 28/08/2008). Despesa ba pessoal nebe fulan ida ho valor 850,000 USD ba tinan ida multiplika ka kali deit tinan ida (fulan 12) hamutuk hira maka estado selu ba segurança pesoal Mari Alkatiri nian (tuir doc. Maubere Security, 27/08/2008). Despesas seluk hanesan: ba electrecidade, reparasaun ka manutensaun ba kareta, no sst. Ne´e mos despesistas ka lae? Se osan hodi rehab ka hadia uma ida maka ninia folin aás to´o 340.544,28 USD nebe bele halo ba uma foun 2 ka 3. Hare proposta ba halo Residência oficial ba Vices (1º e 2º ) nian ho valor 300 e tal (hare proposta OGE2009 konaba gabinete PM e Vices PM nian).

Single Source:

Tuir regras Obras Publika nian, entidade nebe maka iha knar no kbit ba halo avaliasaun ba Obras ka uma sira nebe maka atu halo foun ka hadia ho Osan Estado nian, tenke liu husi Ministério Obras Publika. Hafoin loke tender ba empresas ka empreitores sira hodi ba tuir konkursu. Ne´e procedimentu legal maka ne´e. Saída maka Mari Alkatiri nudar eis-PM halo maka ne´e, kontra Lei, tamba nia fo ba ENSUL ba halo avaliasaun ba Obras ka hadia nia residência. Tamba saída maka hili ENSUL? Keta iha ligasaun ruma karik?

Governo AMP de facto iha diskurso maibe rekonyece de yure iha hakerek

Iha debate OGE2009 generalidade i especialidade, iha Deputado sira husi bankada Mari Alkatiri/Fretilin nian, sempre uja termo «Governo de facto». Iha surat ka karta nebe maka eis-PM Mari Alkatiri hatou ba MF hodi husu osan ba rehab uma no despesa seluk, la hakerek tuir saída maka koalia ka diskursu oficial. Hare iha surat ka karta 2 (19/02/2008 i 25/08/2008), hakerek nune: “«Ao Ministério das Finanças»”. Se tuir diskursu oficial katak Governo AMP ne´e de Faktu, nusa maka hakerek ba husu tulun hodi rehab uma no suporta ba despesas seluk mos la hakerek «”Ao Ministério das Finanças de Facto»”. Kontradisaun maka ne´e: Diskurso Governo AMP de facto no iha hakerek ne´e Governo AMP ne´e de Yure, tamba interpretasaun ba de facto/de yure, ilegal/legal, inkonstitucional/konstitucional ne´e hare husi hakerek. Tamba hare husi hakerek Mari Alkatiri ninia karta no dait ba to´o Konstituisaun RDTL nebe Mari Alkatiri rasik maka hakerek, Governo AMP De Yures, Legal no Konstitucional.

Kareta Ba deputado bandu maibe husu kareta ba Governu AMP

Waihira Parlamento Nacional (PN) decide hodi sosa kareta 65 ba membros Parlamento (MP) tomak, husi bankada Fretilin hola decisaun ida katak sira la simu kareta ne´e, ho argumento nebe publiku hotu hatene. Tamba uja argumentu principio «desciplina partidária», maske deputado balun simu tiha kareta maibe tenke fo fila fali chave kareta nian. Unika deputada Cipriana Pereira maka la entrega kareta, ninia deklarasaun ba Timor Post (14/01) katak “so entrega kareta waihira Tribunal deklara katak karetas sira nebe PN sosa ne´e inkonstitucional”.

Problema maka ne´e iha ne´e la justo waihira Mari Alkatiri nudar Sekretariu Jeral Partido Fretilin, inpoen regras «Disciplina partidária» atu deputados sira la bele simu kareta i nia bele husu ba Governo atu simu kareta. Tuir karta ka surat nebe maka Mari Alkatiri nudar eis-PM hakerek ba MF hodi husu kareta foun, iha karta hakerek nune: “O automóvel que me foi cedido tem mais de sete anos de vida. A sua manutenção é muito cara. Solicito a aquisição de uma viatura nova, do tipo Toyota Prado 4 x4 Diesel ou Toyota Land Cruiser 4 x 4 Diesel para substituir actual" (Karta Mari Alkatiri ba MF, 19/02/2008).

Bolsa de Estudos

Iha debate OGE2009 iha generalidade, deputadus sira husi bankada Mari Alkatiri/Fretilin nian akusa Ministério Educação (ME) nebe seleciona processo ba Bolsa estudos ba estudantes ba eskola iha liur la tuir procedur normal no iha irregularidade barak. Maibe mosu fali iha media nasional nebe koalia konaba irregularidade iha selesaun Bolsa husi PETRONAS nian ba Malaysia iha Governo eis-PM Mari Alkatiri nia ukun (I Governo Constitucional). Iha jornal nasional hanesan Timor Post, STL i JND hatun noticias ne´e (20Cor do texto/01). Neduni akusaun husi bankada Mari Alkatiri/Fretilin katak ME komete irregularidade hodi selesaun ba Bolsa estudos ba liur. Fiar katak kasu ida ne´e husi bankada Mari Alkatiri/Fretilin sei foti iha debate especialidade waihira to´o iha ME nian, tamba sira foti ona debate generalidade neduni buka aprofunda iha especialidade!

*Timor oan hela iha Same/Díli, Timor-Leste i artigo ne’ e hatun iha STL edisaun ohin (23/01/2009)!

1 comentário:

  1. - Ba reabilita deit uma Mari Alkatiri husu ba Ministra da Finanças 340.544,28 USD ???
    - Ba pessoal nebee fo segurança ba Mari Alkatiri husu 850.000 USD fulan ida ???
    Despesa hirak nee estado lori naha todan demais atu hatan deit necessidades ema ida nian mesak !!!
    Nee malae dehan Timor-Leste tem muita massa para suportar as despesas do ex-PM. Katak estado Timor agora riku demais nebee halo ex-governantes sira husu osan ba estado conforme sira nian hakarak...
    Kapas los, atu hadia deit uma husu fali hanesan atu halo uma andar ida ka rua (340.544,28 dolares americanos).
    Atu selu guarda costas nudar cidadão bai-bain ida mos husu osan ba estado liu fali PM Portugal(activo) nian vencimento...
    Ne kala Timor riku demais ona, kala nian povo mos moris diak hotu ona karik.
    Senceramente ha'u la hatene ema sira nunee sira nian oin tau los iha nebee ?
    Susar no terus sei dulas povo dada is hotu la dia'k maibe revolucionário ida hanesan Mari Alkatiri luta ulu-uluk ba nian interesse.
    Ema sei buka compreende karik husu 5.000 ka 6000 dolares atu hadia deit nian uma nebee hetan estragos tanba crise iha 2006. Maibe husu fali hanesan atu halo uma andar no husu atu selu ninian segurança privado fulan ida nian hanesan fali atu selu guarda costas Barack Obama ?
    Nee buat ida extraterrestre, surreal. Timor-Leste kala 2º EUA.
    Estado tenke koa despesa desnecessárias hirak nunee, para tau credibilidade instituições estado nian. Karik Mari Alkatiri sadere ba Lei Pensão Vitalícia, nunee halo nia la tetu didiak antes de hato'o proposta ba Ministerio das Finanças hodi husu osan hirak nee.
    Nudar cidadão nebee halo parte Povo terus na'in sira, haree ba realidade oras nee dadaun mak seidauk bele aplica Lei kona ba Pensão Vitalícia em curso iha curto ka média prazo. Lei nee la condiz ho realidade Povo nian, Rain Timor seidauk iha recursos suficientes atu suporta grupo elite ki'ik oan ida ho LUXO. Povo esmagadora maioria sei iha terus laran.
    Luta ba Ukun Rasik-an la'os atu hakiak eleite politicos sira sai riku ho boot !
    Saudosos Nocolau Lobato, Ma Hudo, Vicente Reis, Nino Konis Santana, Dai Tula ho herois sira seluk nebee mate rate laek la hameno hela lia atu lideres politicos sira sai moris diak iha Povo nian terus leten...
    Buka ukun-an la'os atu moris Luxo. Se elites sira buka uluk moris luxo iha ukun-an ida nee nian laran, imi atu liberta Povo oin sa ???
    Tenke hanoin ho matenek no hatene moris iha ambiente nian leet. La'os novidade karik iha biban ruma Povo revolta hasoru INJUSTIÇA. La'os buat foun lei quimica executa nian função, função transformadora matéria orgânica sai matéria inorgânica. La'os buat foun kareta topo de gama sai aku-desan, torre arranha céu ka bangunan pencakar langit menjadi rata...etc.etc.
    Ne'eduni haree salva uluk Povo terus na'in sira. Iha biban ida nee dadaun, Governantes sira la bele hanoin lai atu haksoit sai hosi knu'uk. La bele ansi atu kolu-an hatais nebee genuíno hosi bei-ala sira, humildade. Ema rain seluk la kesar ka konta ita ba ema seluk, katak governantes RDTL nian hatais la hanesan ema kaer ukun. Lae, ita la bele monu ba ilusões nebee dala ruma mosu iha ita nian hanoin, katak ita tenke nu'unee no nu'unee ba. Ema haree liu ita nian serviço, ema rain seluk nunka husik identifica governantes sira ho nian povo, nunca!
    Se ema haree povo sei descalço, ba ema nee hanoin, pelo menos nian governantes sira seidauk dok demais. Se ema haree povo isin sei krekas, ema nian hanoin ba governantes rain nee ho imaginação katak governantes sira kabun seidauk tasak liu etc.
    Hanoin no tetu didiak ba situações hirak nee, ha'u nudar cidadão babain husu atu Na'i Ulun Presidente PR, Na'i Ulun Presidente PN, Na'i Ulun Primeiro-Ministro hanesan Uma Riin ba Estado RDTL atu suspende no revoga Lei Pensão Vitalícia hodi hamosu lei seluk ba materia ida nee ho artigos no cláusulas nebee mais simbólico do que concreto.

    Victor Tavares
    Cidadão - Editor FH







    Maibe hare ba polemika konaba Mari Alkatiri nebe husu ba MF (Minsiterio Finanças) atu fo osan ba rehabilita ka hadia nia uma ho valor 340.544,28 USD (tuir doc. ENSUL, 28/08/2008). Despesa ba pessoal nebe fulan ida ho valor 850,000 USD ba tinan ida multiplika ka kali deit tinan ida (fulan 12) hamutuk hira maka estado selu ba segurança pesoal Mari Alkatiri nian (tuir doc. Maubere Security, 27/08/2008). Despesas seluk hanesan: ba electrecidade, reparasaun ka manutensaun ba kareta, no sst. Ne´e mos despesistas ka lae? Se osan hodi rehab ka hadia uma ida maka ninia folin aás to´o 340.544,28 USD nebe bele halo ba uma foun 2 ka 3. Hare proposta ba halo Residência oficial ba Vices (1º e 2º ) nian ho valor 300 e tal (hare proposta OGE2009 konaba gabinete PM e Vices PM nian).

    ResponderEliminar

Nota: só um membro deste blogue pode publicar um comentário.